NDA ove wa file noke wa pinduka, ina yove nda wa liyeva ndati? Eye nda wa sanjuka calua. Anga hẽ omunu wa fa o pondola vali oku kala lomuenyo? Eci oco ca pita kosimbu.

Kũlĩhisa ulume u lukãi kuenda okamõla aka. Ulume u uprofeto Eliya. Ukãi u, ocimbumba cimue co kofeka yo ko Sarepata kuenda omõlaye. Eteke limue omõla waco wa fetika oku vela. Omo okuti oku vela kuaco kua piãlele calua, omõlaco weya oku fa. Noke Eliya wa sapuila ukãi waco hati: ‘Nena kulo omõla.’

Eliya wa tikula omõla kuenje wa londa laye kosapalalo yu wo pekelisa pula. Noke wa likutilila hati: ‘A Yehova, tava okuti omuenyo womõla ulo u tiukamo vali.’ Kuenje omõla wa pinduka. Eliya wa loka lomõla kosapalalo kuenje wa popia lukãi hati: ‘Tala omõlove o kasi vali lomuenyo!’ Eli olio esunga lieci ukãi a sanjukila.

Ulume umue ukuavo okuti wa kalavo uprofeto wa Yehova, Elisia. Elisia wa kala oñuatisi ya Eliya. Pole vokuenda kuotembo, Yehova wa ecavo unene kokuaye woku linga ovikomo. Eteke limue Elisia wa enda kolupale luo Siuname kuna kua kala ukãi umue wo lingilile ovina viwa. Ukãi waco weya oku kuata oñaña.

Vokuenda kuotembo, omõlaco wa kula. Eteke limue komẽle, omõlaco wa enda toke ku isiaye wa kala oku talavaya vepia. Noke omõla wa kaluka hati: ‘Utue wange u kasi loku ndi vala.’ Eci vo tuala konjo, omõla haico a fa. Inaye weya oku sumua calua. Noke wa enda toke ku Elisia.

Eci Elisia a pitila wa enda toke vohondo mua kala ocivimbi. Eye wa liyala kilu liomõla wa fa kuenda wa likutilila ku Yehova. Noke etimba liomõla lia fetika oku kuata owuya kuenje wa ta ohesi olonjanja epanduvali. Eci omõlaco a pinduka, inaye wa kuata esanju lialua.

Ocili okuti, voluali mua siata oku fa omanu valua. Olofa viaco via siata oku sumuisa apata avo kuenda akamba. Etu ka tu kuete unene woku pindula omanu kolofa. Yehova eye lika okuete unene waco. Noke tu ka lilongisa ndomo eye a ka pindula olohuluwa viomanu vana va fa.

1 Olosoma 17:8-24; 2 Olosoma 4:8-37.