ECI Daviti a ponda Goliata, Avinere kesongo kolohoka via va Isareli, wa tuala Daviti ku Saulu. Saulu wa sanjukile calua la Daviti kuenje wo lingisa kesongo kolohoka viaye. Eye wa sapuila Daviti oco a kale kelombe lia soma Saulu.

Noke eci olohoka via tiuka koku liyaka la va Filisiti, akãi va fetika oku imba hati: ‘Saulu wa ipaya olohulukãi, pole Daviti wa ipaya olohuluwa.’ Eci Saulu a ci yeva wa fetika oku tema. Momo omanu va kala loku sivaya calua Daviti okuti Saulu ci sule. Pole omõlaye Yonatão ka temẽle. Eye wa solele calua Daviti kuenda Daviti wa solelevo Yonatão. Omo liaco, kavali kavo va lisila ohuminyo yoku linga akamba otembo yosi.

Daviti wa kala usiki wolohalupa kuenje Saulu wa solele calua ovisikilo viaye. Pole eteke limue onyeño ya Saulu yo vetiya oku linga ocina cimue cĩvi. Eci Daviti a kala loku sika ohalupa, Saulu wa tikula onjelia yaye kuenje wa imba loku popia hati: ‘Ndi tomela Daviti vocimano.’ Daviti wa yandulukamo kuenje wa puluka konjelia yaco. Noke Saulu wa seteka vali oku tomela Daviti vocimano, pole Daviti wa puluka. Daviti weya oku limbuka okuti, kaliye o sukila oku lunguka.

Ove hẽ ivaluka ohuminyo Saulu a lingile? Eye wa popele okuti, omõlaye ukãi o weca komunu wosi oka ponda Goliata. Saulu wa popia la Daviti okuti, nda wa ponda ci soka ocita casuãlali va Filisiti, omõlange Mikale o linga ukãi wove. Sokolola ño handi ondaka eyi! Saulu wa kala loku lavoka okuti, Daviti oka pondiwa la va Filisiti. Omo okuti va Filisiti ka va tẽlele oku ponda Daviti, Saulu wa eca omõlaye ukãi ku Daviti.

Eteke limue Saulu wa sapuila Yonatão lakuenje vaye vosi ocisimĩlo caye coku ponda Daviti. Pole Yonatão wa popia la isiaye hati: ‘Ku ka ponde Daviti. Daviti la limue eteke a ku lingile cĩvi. Ovina viosi vinene eye a linga, wa vi lingila oku ku popela. Wa mola ndeci eye a kapele omuenyo waye kohele eci a ponda Goliata kuenje ove wa ci sanjukilile calua.’

Saulu wa yeva kondaka yomõlaye kuenje wa likuminya okuti ka pondi vali Daviti. Daviti wa tiukila vali konjo ya Saulu oku vumba kokuaye. Eteke limue eci Daviti a kala loku sika ohalupa, Saulu wa seteka vali oku tomela Daviti vocimano. Pole Daviti wa yepamo kuenje usongo wa sa vocimano. Eyi ya kala onjanja yatatu. Kaliye Daviti wa limbuka okuti wa sukilile oku tila!

Vuteke waco Daviti wa enda konjo yaye. Pole Saulu wa tuma alume vamue oco va ponde Daviti. Mikale eci a yeva ocisimĩlo ca isiaye, wa sapuila ulume waye hati: ‘Vuteke ulo nda kua tundile vonjo yilo, hẽla o fa.’ Vuteke waco Mikale wa kuatisa Daviti kuenje wo pitisa ponjanela. Daviti wa lisalamisile vokuenda kueci ci soka anyamo epanduvali oco ka ka sangiwe la Saulu.

1 Samuele 18:1-30; 19:1-18.