SAULU wamamako oku sandiliya Daviti. Eye wa pongiya eci ci soka olohulukãi vitatu kasualãli vaye oco va sande Daviti. Eci Daviti a ci limbuka, vuteke waco wa tuma olondavululi oco va kũlĩhise oku ku kasi Saulu lalume vaye. Noke Daviti wa pula vamue pokati kalume vaye vavali hati: ‘Helie oyongola oku enda lame kocilombo ca Saulu?’

Avisiai wa kumbulula hati: ‘Ame ngenda love.’ Avisiai wa kala omõla a Ceruya manji a Daviti. Osimbu Saulu lalume vaye va kala loku pekela, Daviti la Avisiai va iñila uyombeki vocilombo cavo. Va ambata osipata ya Saulu kuenda esanga liaye liovava lia kala kovitue viaye. Lomue wa va mola ale oku va yeva, momo va kala lotulo tua piãla.

Kaliye kũlĩhisa Daviti la Avisiai. Ovo va puluka kuenje va talama kilu liomunda. Daviti wa vilikiya Avinere kesongo kolohoka via va Isareli hati: ‘A Avinere, momo lie kua tatelele cime cove soma? Kũlĩhisa, pi pa kasi onjelia lesanga liaye liovava?’

Saulu wa pasuka. Eye wa limbuka ondaka ya Daviti kuenje wa pula hati: ‘Amõlange a Daviti, anga eyi ondaka yove?’ Kũlĩhisa ndomo Saulu la Avinere va kasi.

Daviti wa kumbulula Saulu hati: ‘Ame a cime cange.’ Noke Daviti wo pula hati: ‘Nye o sandela omuenyo wange? Ũvi we nda ku linga? Cilo a soma, osipata yove yeyi. Tuma alume vove oco veye vope osipata.’

Saulu wa popia hati: ‘Nda lueya. Nda linga uveke.’ Noke Daviti wa enda lonjila yaye kuenje Saulu wa tiukila konjo yaye. Pole Daviti wa popia lutima waye hati: ‘Eteke limue ndi laika muẽle oku fila peka lia Saulu. Kokuange ca velapo oku tilila kofeka ya va Filisiti.’ Eci oco muẽle Daviti a linga. Daviti wa kuata uloño woku kemba va Filisiti. Va Filisiti veya oku sima okuti kaliye Daviti o pondola oku tiamẽla kolohoka viavo.

Vokuenda kuotembo, va Filisiti veya vali oku liyaka la va Isareli. Saulu lomõlaye Yonatão, va pondiwila kuyaki waco. Kuenje, Daviti weya oku sumua calua. Eye wa soneha ocisungo cimue hati: ‘Ndi ku kuetele upongo, a manjange, a Yonatão. Ocisola cove lame ca piãlele enene!’

Noke Daviti wa tiukila ko Isareli vofeka yo Hevirone. Kua kala omanu vamue va yonguile okuti Isivosiete omõla a Saulu eye o kala osoma. Vakuavo va nõlele Daviti okuti eye o kala osoma. Omo liaco, pokati kalume vaco, peya oku kala uyaki. Pole alume va Daviti va yula. Eci eye a fetika oku viala, wa kala leci ci soka akũi atatu kanyamo. Vofeka yo Hevirone wa vialamo eci ci soka anyamo epanduvali kolosãi epandu. Eye wa kuatele omãla vamue valume va citiwila vofeka yaco. Olonduko viavo vievi: Aminone, Avisalome kuenda Adoniya.

Vokuenda kuotembo Daviti lalume vaye, veya oku tambula olupale luo Yerusalãi. O Yerusalãi ya kala olupale lumue lua posoka. Yohava omõla a Ceruya mukãi wa Daviti, eye wa kala kesongo kovoyaki. Daviti weya oku sumũlũisa Yohava kue-nje wa linga kesongo kolohoka viaye. Kaliye Daviti wa fetika oku viala vo Yerusalãi.

1 Samuele 26:1-25; 27:1-7; 31:1-6; 2 Samuele 1:26; 3:1-21; 5:1-10; 1 Asapulo 11:1-9.