Esapulo 86: Olumbungululu Lua Songuila Alume
OLETE hẽ olumbungululu oluo ulume u a kasi oku ilika ndeti? Alume ava va tundilila Kutundilo. Ovo olonoño violombungululu. Olumbungululu lua va songuila toke ko Yerusalãi. Ovo va kũlĩhĩle okuti olumbungululu olu lu kasi oku va songuila ku umue wa velapo.
Eci alume va pitĩla ko Yerusalãi va pula hati: ‘O li pi wa citiwa ha lingi Soma ya va Yudea?’ Va “Yudea” onduko yikuavo ya va Isareli. ‘Tua mõla olumbungululu luaye Kutundilo.’ ‘Kuenje tueya oku u fendela.’
Eci Herode, Soma yoko Yerusalãi a ci yeva, co yokokisa calua. Momo eye ka yonguile okuti o soma yi kuavo yi piñala pomangu yaye. Omo liaco, Herode wa vilikiya ovitunda vinene kuenje wa vi pulisa hati: ‘Pi ku citiwila soma wa likuminyiwa?’ Ovo va tambulula hati: ‘Embimbiliya li popia okuti ko Beteleme.’
Herode wa vilikiya alume vaco vo Kutundilo, wa popia lavo hati: ‘Kuendi ka sandiliyi lutate okamõla kaco. Kuenje nda wa ka sangi, ndo sapuiliko, ndi yongolavo oku ka ka fendela.’ Pole, Herode wa yonguile oku sanga okamõla kaco oco a ka ponde!
Noke olumbungululu lua songuila alume toke ko Beteleme. Kuenje lua talama apa pa kala okamõla. Eci va iñila vonjo, va sanga Maria lakamõla, Yesu. Va eca olombanjaile vialua ku Yesu. Noke Yehova wa lungula alume vaco konjoi oco ka va ka tiukile vali ku Herode. Kuenje ovo va tiukila kimbo liavo lonjila yiñi.
Eci Herode a yeva okuti alume vo Kutundilo va pita konjila yiñi, wa tema calua. Kuenje wa handeleka okuti, omãla vosi vimbo lio Beteleme vakualima avali kuenda vatitopo vali va pondiwa. Pole, Yehova wa lungula Yosefe vonjoi oco eye lepata liaye va tilile Kegito. Noke eci Yosefe a yeva okuti Herode wa fa, wa tikula Maria la Yesu kuenje va tiukila kimbo liavo ko Nasara, okuti oko Yesu a kulila.
Helie ove o sima okuti eye wa tuisa olumbungululu luaco? Ivaluka okuti, olumbungululu lua songuila tete alume ava ko Yerusalãi. Satana Eliapu wa yonguile oku ponda Omõla wa Suku. Kuenda wa kũlĩhĩle okuti Herode Soma yo Yerusalãi wa kalavo lovisimĩlo vioku ponda Yesu. Eci ci lekisa okuti, Satana eye wa tuisa olumbungululu luaco.
Mateo 2:1-23; Mika 5:2.
Apulilo
- Alume ava vociluvialuvia velie? Kuenda momo lie va kasi oku ilikila olumbungululu?
- Momo lie Soma Herode a yokokelele? Kuenda nye eye a linga?
- Olumbungululu lua songuila alume toke pi? Pole momo lie ovo va tiukilila kofeka yavo lonjila yiñi?
- Herode wa ecele ocihandeleko cipi? Kuenda momo lie?
- Yehova wa tumile Yosefe oku linga nye?
- Helie wa tuisa olumbungululu luokaliye? Kuenda momo lie?
Epulilo likuavo
- Tanga Mateo 2:1-23.
Eci vakuakutanga olombungululu va nyula Yesu eye wa kuata anyamo añami? Kuenda pi Yesu otembo yaco a kala? (Mat. 2:1, 11, 16)
Ove o ka ci Sola
YESU—ONJILA, OCILI HAEYE OMUENYO
Vakuakukũlĩhĩsa Olombungululu va Nyula Yesu
Momo lie olumbungululu ovo va mola lua va songuila toke ku Kusoma Herode ongangala okuti ku Yesu hakoko?
