KUA pita ocina cimue cĩvi. Yoano upapatisi wa pondiwa. Herodiya ukãi wa Soma ka solele Yoano. Eye wa vetiya Soma okuti o tuma oku teta utue wa Yoano.

Eci Yesu a ci yeva wa sumua calua. Eye wa enda pocitumãlo cimue culika. Pole omanu vo kuama. Eci Yesu a mola owiñi, wa va kuatela ohenda. Eye wa fetika oku va longisa ovina vialua viatimẽla kusoma wa Suku. Kuenda wa sakula olombei.

Eci ekumbi lia iñila olondonge vieya kokuaye via popia laye hati: ‘Ekumbi lia enda. Mulo vekalasoko. Sandula omanu oco va ende kovaimbo avo ha va lilandela okulia.’

Yesu wa va kumbulula hati, ‘ka va endi. Ene muẽle va ĩhi okulia.’ Yesu wa pula Filipu hati: ‘Pi vu pondola oku landa okulia ku tẽla, oco tu tekule omanu vosi ava?’

Filipu wa kumbulula hati: ‘Ci sukila olombongo vialua oco tu lande okulia ku tẽla.’ Andereu wa popia hati: ‘Ukuenje u, wambata okulia kuetu, okuete lika olombolo vitãlo lolombisi vivali.’ Okulia kuaco kua kala kutito.

Yesu ‘wa sapuila omanu oco va tumale powangu.’ Noke wa eca olopandu ku Suku, kuenje okulia kuaco wa ku tepaisa. Olondonge via eca olombolo lolombisi komanu vosi. Ca kala eci ci soka olohulukãi vitãlo kalume, kuenda akãi valua lomãla. Ovo valia toke eci va tẽla. Eci olondonge viongolola eci ca supilepo, va yukisa eci ci soka ekũi la vivali kolohumba.

Yesu wa sapuila olondonge viaye oku iñila vowato oco va yoke Okalunga ko Galilea. Vokuenda kuteke kua kala ofela yalua, kuenda ofela yaco ya tuñunya owato. Olondonge via kala lusumba walua. Kuenje vokati kuteke va mola umue wa kala loku endela kilu liovava. Ovo va kaluka lusumba omo omunu waco ka vo limbukile.

Yesu wa popia lavo hati: ‘Koka yokoki, Ame.’ Ka va kaile loku tava. Petulu wa popia hati: ‘A Ñala, nda ove muẽle, mañinye okuti njiya kokuove loku endela kilu liovava.’ Yesu wo tambulula hati: ‘Enju.’ Petulu, wa tunda vowato kuenje wa endela kilu liovava. Noke eye wa kuata usumba omo a kala loku vomba, kuenje Yesu wo popela.

Noke, Yesu wa tekula vali olohulukãi viomanu. Onjanja eyi wa va tekula lika lolombolo epanduvali lolombisi viñamiñami. Vosi yavo va tẽla. Eci hẽ ka ci komohisa ndomo Yesu a enda oku tata omanu? Eci eye aka viala ndosoma vusoma wa Suku, etu lacimue tu ka sakalala laco.

Mateo 14:1-32; 15:29-38; Yoano 6:1-21.