Yesu wa pinduiwa keteke liatatu noke yolofa viaye. Eteke liaco, eye wa moleha olonjanja vitãlo kolondonge viaye. Vokuenda kuoloneke akũi akuãla Yesu wa enda oku li molehĩsa. Osimbu olondonge via kala loku luluvalela, eye wa londa kilu. Eci pa pita oloneke ekũi, Suku wa sukumũila espiritu sandu kolondonge via Yesu via kala loku kevelela ko Yerusalãi.

Noke, ovanyali va Suku va kapa ovapostolo vo kayike, pole, ungelo wa va yovola. Ndonge Stefano wa sosuiwa lovawe toke eci a fa. Pole, tuka lilongisa ndomo Yesu a nõla umue pokati kovanyali vaco oco a linge ukuenje wa velapo wa Suku, una weya oku kala upostolo Paulu. Eci pa pita anyamo atatu lolosãi epandu noke yolofa via Yesu, Suku wa tumĩle upostolo Petulu oco aka kundile Korneliu lepata liaye.

Eci pa pita ekũi latatu kanyamo, Paulu wa linga ungende waye watete woku kunda. Vungende waye wavali, Paulu wa endele la Timoteo. Tuka lilongisa ndomo Paulu kumue lava a endaenda lavo kovongende va kuata esanju lialua koku vumba Suku. Oku sulako, Paulu wa kapiwa vokayike ko Roma. Eci pa pita anyamo avali wa yovuiwa. Pole, noke vo kapele vali vokayike kuenje wa pondiwa. Onepa YEPANDUVALI yi lombolola ovolandu vokuenda kueci ci soka akũi atatu lavali kanyamo.