TALA ño! Nye ci kasi loku pita ndeti palo? Anga hẽ kakuenje u wa kupukila ndeti posi wa lilemẽha? Ulume u okasi loku tundilila ndeti vonjo, Paulu. O letevo hẽ Timoteo? Anga kakuenje u wa kupuka ponjanela?

Eci oco ca pita. Paulu wa kala loku linga ohundo kolondonge vioko Torasi. Paulu wa kũlĩhĩle okuti oka pita otembo yalua oco a va pasuise vali. Momo eye wa laikele oku linga ungende ukuavo. Omo liaco, wamamako oku vangula toke vokati kuteke.

Kakuenje o tukuiwa Eutuko wa tumalele ponjanela, noke wa suñila. Wa kupuka kosapalalo yatatu toke posi! Ndomo o cilete omanu va sakalala. Eci alume va yelula kakuenje, va limbuka okuti wa fa!

Eci Paulu a mola okuti kakuenje wa fa, eye wa li yala kilu liaye kuenje wo kuata. Noke Paulu wa popia hati: ‘Ko ka yokoki. Eye o kasi ciwa.’ Eci ocikomo! Paulu wo pindula! Omanu va sanjukile calua.

Vosi yavo va londa vali ko sapalalo oku kalia. Paulu wamamako loku vangula toke komẽle. Pole, Eutuko ka pekelele vali! Noke Paulu la Timoteo kuenda ava va kala loku enda lavo va londa vonaviyu. Wa kũlĩha oku va endela?

Paulu ndopo a pitĩla kungende waye watatu, eye okasi loku enda konjo yaye. Vungende owu Paulu wa kala anyamo atatu ko Efeso lika liaye. Ungende waco wa luile vali okuti wavali ci sule.

Eci a tunda ko Torasi, onaviyu ya talamapo kamue vo lupale luo Melita. Omo okuti, ca kala ocipepi loko Efeso, Paulu wa tuma oku vilikiya akulu vekongelo oco va ende ko Melita oku ka vangula laye onjanja ya sulako. Eci Paulu a londa vo naviyu ovo va sumuile calua!

Noke onaviyu ya pitĩla vali ko Kaisarea. Osimbu Paulu a kala konjo ya Filipu, uprofeto Agabo wa lungula Paulu. Eye wa popia okuti Paulu oka kapiwa vokayike eci a enda ko Yerusalãi. Kuenje eci ca tẽlisiwa. Eci Paulu a kapiwa vokayike ko Kaisarea wa kalamo anyamo avali. Noke wa tumiwa ko Roma oco aka sombisiwe la soma yoko Roma Kaisare. Tu konomuisi eci ca pita vungende waye toke ko Roma.

Ovilinga kocipama 19 toke 26.