TALA ungelo okasi loku yikula ndeti epito lio kayike. Alume ava va kasi loku tunda ndeti vokayike, olondonge via Yesu. Tu konomuisi ndomo va kapiwamo.

Pa pita otembo yitito tunde eci olondonge via Yesu via tambula espiritu sandu. Eci ceya oku pita ceci okuti, Petulu la Yoano va kala loku enda konembele ko Yerusalãi. Konele yepito kua kala ulume umue ocilema tunde eci a citiwa. Omanu va enda loku tuala pocitumãlo eci, oco eye a pinge olombongo komanu va iñila vonembele. Eci eye a mola Petulu la Yoano, wa va pinga ekuatiso. Nye ovapostolo vo wĩha?

Ovo va talama kuenda va vandekela ulume ocilema. Petulu wa popia hati: ‘Si kuete olombongo pole, eci ñuete oco ndu ku ĩha. Vonduko ya Yesu, enda!’ Petulu wo kuata peka. Lonjanga ulume wa katuka, kuenje wa fetika oku enda. Eci omanu va ci mola, va komõha kuenda va sanjuka calua omo liocikomo caco.

Petulu wa popia lomanu hati: ‘Ocikomo eci ca lingiwa lunene wa Suku, una wa pindula Yesu kolofa. Osimbu Petulu la Yoano va kala loku vangula lomanu, asongui vetavo veya kokuavo. Ovo va tema calua omo Petulu la Yoano va kala loku sapuila omanu okuti Yesu wa pinduiwa. Ovo va kuata Petulu la Yoano kuenje va kapiwa vokayike.

Eteke likuavo asongui va liongolola. Va vilikiya Petulu la Yoano, kumue lulume va kayisa. Asongui vava pula hati: ‘Lunene welie wa ci lingi?’

Petulu wa kumbulula hati, lunene wa Suku, una wa pindula Yesu kolofa. Ovitunda ka via kũlĩhĩle eci va linga lavo. Momo ka va tẽlele oku patãla ocikomo caco. Omo liaco, va handeleka ovapostolo oku liwekapo oku vangula eci catiamẽla ku Yesu, noke va tundisiwa.

Ovapostolo vamamako oku kunda catiamẽla ku Yesu kuenda oku sakula olombei. Ovolandu atiamẽla kovikomo va yevala kolonepa vialua. Ndaño muẽle omanu vo kolofeka via kala ocipepi lo Yerusalãi va nenavo olombei kovapostolo oco va sakuiwe. Eci ca temisa calua asongui, kuenje ovo va kuata ovapostolo noke va vakapa vokayike. Pole, ovo ka va kailemo otembo yalua.

Vuteke waco ungelo wa Suku wa yikula okayike, ndomo o cilete palo. Ungelo wa popia lavo hati: ‘Kuendi kalongisi omanu vonembele.’ Keteke likuavo, eci asongui va tuma alume oku kopa ovapostolo vokayike, ovo ka va kailemo. Noke va sangiwa vonembele oku longisa kuenje va vambata Vekanga.

Asongui va popia lavo hati: ‘Tuo handelekeli, siti, ko ka longisi vali eci catiamẽla ku Yesu. Puãi haimo wa yukisi o Yerusalãi lovilongua viene.’ Noke ovapostolo va kumbulula hati: ‘Cetu oku pokola ku Suku, komanu hacoko.’ Ovo vamamako oku kunda “olondaka viwa.” Anga hẽ eyi hanganguko yiwa tu kuete oku kuama?

Ovilinga kocipama 3 toke 5.