1, 2. Elaleko lipi lia velapo omunu a pondola oku tambula? Kuenda nye tu sukila oku lipula?

 ELALEKO lipi lia velapo ove wa tambuile ale? Citava okuti ivaluka eci va ku lalekele kocipito cimue ndeci, kuvala wekamba liove. Pamue ivaluka eteke va ku laleka oku talavaya kupange umue uwa. Eci wa tambula elaleko liaco, citava okuti wa yeva esanju lialua. Oku kũlĩha ocili Cembimbiliya, ci kuete esilivilo lia velapo okuti alaleko osi wa tambuile a sule. Omunu lomunu wa tambula elaleko liaco. Pole, ndomo tu tava kelaleko liaco, ci kuete esilivilo lialua komuenyo wetu.

² Helie wa linga elaleko liaco? Yesu Kristu, Omõla wongunga wa Yehova Suku Tõlo, eye wa linga elaleko liaco. Olio li sangiwa Vembimbiliya, kelivulu lia Marko 10:21, ku popia hati: “Linga ondonge yange.” Ndaño okuti Yesu wa lalekele omunu umosi, pole, elaleko liaco lia lingiwavo kokuetu. Tu sukila oku li pula ndoco: ‘Ndi kasi hẽ oku tava kelaleko liaco?’ Pamue ove o lipula ndoco: Helie ka tava kelaleko eli? Pole, kuli omanu valua ka va tava. Momo lie ka va tavela?

3, 4. (a) Momo lie umalẽhe umue wa kemãlele calua a pulila Yesu catiamẽla koku kuata omuenyo ko pui? (b) Ovituwa vipi viwa Yesu a muila kumalẽhe ohuasi?

³ Tu konomuisi ulandu wulume umue wa lalekiwile la Yesu okuti tunde eci elaleko liaco lia lingiwa, pa pita ale ci soka 2.000 kanyamo. Ulume waco wa kemãlele. Eye wa kuata ovina vitatu omanu va siata oku tenda  okuti via velapo ndeci, olohõlo, ukuasi kuenda oluhimo. Embimbiliya liu tukula hati, “umalẽhe” umue “wa kuatele ukuasi walua” kuenda wa tukuiwavo hati, ‘osoma.’ (Mateo 19:20; Luka 18:18, 23) Umalẽhe waco wa kuata ocituwa ciwa coku yeva olondaka via Yesu kuenda wa vi sanjukilile.

⁴ Olombiali vio koloneke viaco, ka via kapeleko olondaka via Yesu. (Yoano 7:48; 12:42) Pole, eye wa li tepele calua lolombiali vio koloneke viaco. Embimbiliya li tu sapuila hati: “Osimbu [Yesu] a kala vonjila, ulume umue wa lupukila kokuaye kuenda wa petamẽla kolomãhi viaye loku u pula hati: ‘Olongisi Uwa, ocina cipi ndi sukila oku linga oco ndi piñale omuenyo ko pui?’” (Marko 10:17) Ulume waco wa yonguile calua oku vangula la Yesu. Momo wa lupukila kokuaye pokati kowiñi, ndomunu umue ohukũi. Lesumbilo lialua, wa kekamẽla Kristu. Eye wa lekisa umbombe kuenda wa kuata onjongole yoku yeva ovina viespiritu. Yesu wa sola calua ocituwa caco. (Mateo 5:3; 18:4) Kuenje, “Yesu oku vanja kokuaye, wo kuatela ocisola.” (Marko 10:21) Yesu wa tambulula ndati epulilo liumalẽhe waco?

5. Yesu wa tambulula ndati umalẽhe ohuasi? Kuenda tua kũlĩha ndati okuti ‘ocina co kambelele’ ka ca lombolokele oku landisa ovipako viaye viosi? (Tala etosi.)

⁵ Yesu wa lekisa okuti Isiaye eye wo wĩha olonumbi vioku tambulula epulilo liatiamẽla koku kuata omuenyo ko pui. Eci a tukula Ovisonehua, umalẽhe wa kumbulula hati, nda siata oku pokola Kocihandeko ca Mose. Omo okuti Yesu wa kuata ukũlĩhĩso walua, wa limbuka eci ca kala vutima waye. (Yoano 2:25) Eye wa limbuka okuti umalẽhe waco, wa kuata ocitangi cimue ca kala  oku tateka ukamba waye la Suku. Noke, Yesu wo sapuila hati: “Kuli cimue ca ku kambela.” Ocina caco nye? Yesu wamisako hati: “Kuende ka landise ovina o kuete, vi eca kolohukũi.” (Marko 10:21) Anga hẽ olondaka via Yesu vi lomboloka okuti ka citava oku vumba Suku lovipako? Sio. a Eye wa lekisa ocina cimue ci kuete esilivilo lialua.

6. Elaleko lipi Yesu a linga kumalẽhe ohuasi? Kuenda eye wa situlula ndati ovisimĩlo via kala vutima waye?

⁶ Oco Yesu a lekise kumalẽhe eci co kambelele, wo sapuila hati: “Linga ondonge yange.” Sokolola okuti umalẽhe waco wa lalekiwa Lomõla wa Suku Tõlo, oco a linge ondonge yaye. Yesu wo likuminya oku u sumũlũisa, poku popia hati: “O ka kuata ukuasi kilu.” Anga hẽ eye wa tava kelaleko liaco? Ulandu wamisako hati: “Ulume wa nyumãla omo lietambululo a yeva, noke wa enda lesumuo, momo wa kuatele ovokuasi alua.” (Marko 10:21, 22) Olondaka via Yesu via situlula ocitangi cumalẽhe waco. Eye wa solele vali ovipako kuenda oluhimo a kuata. Ocisola a kuatela ukuasi ca velelepo okuti, ocisola a kuatela Kristu ci sule. Eci co kambelele, ocituwa coku lieca olumue, loku sola Yesu lutima wosi kuenda Yehova. Omo okuti eye ka kuatele ocisola caco, ka tavele kelaleko eli lia velapo. Tua kongeliwa ndati velaleko lia lingiwa kumalẽhe waco?

7. Momo lie ci kuetele esilivilo oku kũlĩha okuti tua kongeliwavo velaleko lia Yesu?

⁷ Yesu ka lalekele lika ulume waco, ale omanu vañamiñami.  Yesu wa popia hati: “Nda umue o yongola oku ñuama, ka ka lisokolole vali eye muẽle, . . . amameko oku ñuame.” (Luka 9:23) Limbuka okuti, nda “umue” o “yongola,” citava okuti o kala ondonge ya Kristu. Suku o koka omanu vakuavitima via sunguluka oco veye Komõlaye. (Yoano 6:44) Yesu ka lalekele lika olohuasi, olohukũi, omanu vakuekova limosi, pamue vakuafeka yimue, ale ocitumbulukila cimue. Pole, omanu vosi va kuete epuluvi lioku tava kelaleko lia Yesu. Olondaka via Yesu viokuti: “Linga ondonge yange,” vi tiamisiwilavo kokuove. Momo lie o yonguila oku kala ondonge ya Kristu? Kuenda nye ca kongeliwa voku kala ondonge yaye?

8. Nye omanu vosi va sukila? Kuenda momo lie?

⁸ Kuli cimue tu sukila oku limbuka. Tua lulikiwa lonjongole yoku kuata asongui vawa. Havosiko va tava okuti tua lulikiwa lonjongole yaco. Uprofeto Yeremiya wa popia hati: “A Yehova, nda kũlĩha ciwa okuti onjila yomunu ka ya tiamẽlele kokuaye muẽle. Omunu enda, ka ca tiamẽle kokuaye ndaño muẽle oku songuila oku enda kuaye.” (Yeremiya 10:23) Omanu ka va tẽla oku li viala ovo muẽle. Oku viala lãvi kuolombiali, ku lekisa okuti omanu ka va tẽla oku li songuila ovo muẽle. (Ukundi 8:9) Koloneke via Yesu, asongui vetavo va enda oku kangisa omanu kuenda oku va kemba. Yesu wa limbukile okuti, omanu va kala “ndolomeme ka vi kuete ungombo.” (Marko 6:34) Cimuamue haico ci kasi oku pita koloneke vilo. Vosi yetu tu sukila asongui vana okuti va koleliwa. Anga hẽ Yesu usongui umue wa koleliwa? Tu  konomuisi esunga lieci tu popela okuti Yesu wa koleliwa.

9. Oku li tepa kupi ku kasi pokati ka Yesu lasongui vakuavo?

⁹ Catete, Yesu wa nõliwa la Yehova Suku. Pole, olombiali violuali via siata oku nõliwa lomanu ka va lipuile haivo vakuacame. Yesu wa li tepa calua lolombiali viaco. Onduko yaye yi lekisa esunga liaco. Onduko “Kristu” ale “Mesiya” yi lomboloka, “Ombuavekua” ya nõliwa la Yehova oku linga upange umue u kola. Yehova Suku wa sapuila Omõlaye hati: “Tala! Ukuenje wange una nda nõla, wa soliwa, haeye nda sanjukila! Ndi ka kapa espiritu liange vokuaye.” (Mateo 12:18) Ululiki wetu eye lika wa kũlĩha ciwa usongui tu sukila. Omo okuti Yehova o kuete ukũlĩhĩso wa velapo, tu kuete esunga lioku kolela kusongui eye a nõla.—Olosapo 3:5, 6.

10. Momo lie omanu va sukilila oku kuama ongangu ya Yesu?

¹⁰ Cavali, Yesu wa sia ongangu tu sukila oku kuama. Eye usongui umue o kuete ovituwa viwa tu sukila oku kuama. Yesu wa lekisa ovituwa vi tu kuatisa oku kala omanu vawa. Ovituwa vipi vi tu vetiya oku kolela kusongui umue? Utõi? Olondunge? Ocikembe? Ale yu o lekisa epandi eci a liyaka locitangi cimue ca tĩla? Nda wa lilongisa ovolandu atiamẽla ku Yesu eci a kala palo posi, o ka limbuka okuti, eye wa kuata ovituwa viaco. Yesu wa setukula ovituwa viaco ku Isiaye. Eye wa kala omunu umue wa lipua kolonepa viosi. Ovina a linga, leci a popia kuenda ocikembe a lekisa, tu lilongisilako cimue. Embimbiliya li popia okuti, eye “wo sili ongangu oco vu kuami volomãhi viaye lekolelo.”—1 Petulu 2:21.

11. Yesu wa lekisa ndati okuti “ungombo uwa”?

¹¹ Catatu, Yesu wa tẽlisa olondaka viokuti: “Ame ndungombo uwa.” (Yoano 10:14) Omanu kosimbu va  kũlĩhĩle ciwa olondaka evi. Angombo va enda oku tata ciwa olomeme viavo. “Ungombo uwa,” wa enda oku teyuila olomeme poku vi pitila kovaso. Daviti kukululu ya Yesu, vutila waye wa kala ungombo. Olonjanja vimue omuenyo waye wa kala kohele omo lioku teyuila olomeme kovinyama via tema. (1 Samuele 17:34-36) Yesu ka kapele lika omuenyo waye kohele oco a teyuile olondonge viaye. Pole, eye wa vi fila. (Yoano 10:15) Asongui vapi va siata oku lekisa ocituwa caco coku lieca olumue?

12, 13. (a) Ungombo uwa wa kũlĩha ndati olomeme viaye? Kuenda kolonepa vipi ovio vio kũlĩha? (b) Momo lie ove o yonguila oku kuata Ungombo Uwa?

¹² Yesu wa kala “ungombo uwa” konepa yikuavo. Eye wa popia hati: “Nda kũlĩha olomeme viange kuenda olomeme viange via ndi kũlĩha.” (Yoano 10:14) Tu sokololi handi kolondaka evi. Vamue va sima okuti oku tata ocunda ocina cimue ca leluka ale ka ci kuete esilivilo. Pole, ungombo o sukila oku kũlĩha ciwa olomeme viaye. O sukilavo oku kũlĩha olomeme vina via citiwa ndopo, evi vi vela, levi via lemẽhiwa, okuti vi sukila oku tatiwa ciwa loku ambatiwa poku linga ungende. Olomeme via kũlĩha ciwa ungombo wavio. Ovio vi limbuka ondaka yaye kuenda ka vi tava oku kembiwa lungombo ukuavo. Eci ungombo a vi vilikiya omo liohele yimue, vi pokola lonjanga kondaka yaye kuenda vi tila. Olomeme vi kuama ungombo oku a vi songuila. Eye wa kũlĩha oku vi sukila oku enda. Ungombo wa kũlĩha oku kuli owangu uwa, okuti kuli olui kuenda ocitumãlo ca koka. Osimbu eye a vi lava, olomeme vi limbuka okuti via kolapo.—Olosamo 23.

¹³ Anga hẽ ku sanjukila oku kuata usongui umue uwa? Ka kuli omunu umue wa lisoka la Yesu, koku tata ciwa olondonge viaye. Eye wa likuminya oku tu ĩha omuenyo  uwa cilo kuenda omuenyo ko pui koloneke vi laika oku iya! (Yoano 10:10, 11; Esituluilo 7:16, 17) Tu sukila oku kũlĩha ciwa eci ci lomboloka oku kala ondonge ya Kristu.

14, 15. Momo lie oku li tukula okuti Ukristão ka ci lombolokela oku kala ondonge ya Kristu?

¹⁴ Koloneke vilo, omanu vamue va sima okuti va tava ale kelaleko lia Kristu. Kuenje va li tukula hati Akristão. Pamue va tiamẽla ketavo limue okuti olonjali viavo oko vi kasi tunde osimbu. Kuenda va popia okuti va kolela Yesu Ndupopeli wavo. Anga hẽ eci oco ci lomboloka oku kala olondonge via Kristu? Eci hẽ oco ocisimĩlo ca Yesu poku tu laleka oco tu kale olondonge viaye? Kuli ovina vialua via kongeliwa voku kala ondonge ya Kristu.

¹⁵ Tu konomuisi ovisoko Viatavo Esanda, vina via siata oku li tukula okuti olondonge via Kristu. Anga hẽ ovio via kapako alongiso a Yesu Kristu? Ale pokati kavo pa sangiwa lika ukuse, ungangala kuenda undiandia wa siata oku muiwa voluali?

16, 17. Nye ca kambela pokati ka vana va litukula hati Akristão? Kuenda olondonge via Kristu vi limbukiwa ndati?

¹⁶ Yesu wa lekisa okuti olondonge viaye vi limbukiwila kovilinga viavo. Eye wa popia hati: “Havosiko va nukula vati, a ‘Ñala, a Ñala,’ va ka iñila Vusoma wo kilu, te lika vana va linga ocipango ca Isiange o kasi kovailu.” (Mateo 7:21) Momo lie vana va tukula Yesu Ndañala, ka va siatele oku linga ocipango ca Suku? Sokolola umalẽhe ohuasi wa tukuiwa kefetikilo. Vana va li tukula okuti Akristão, va siata oku kambisako ocina cimue okuti: Oku sola Yesu kuenda Una wo tuma.

 ¹⁷ Eci ci lingiwa ndati? Anga hẽ omanu vana va li tukula okuti Akristão va sole muẽle Kristu? Ka vo sole. Oku popia lika hati ndi sole Yesu kuenda Yehova ka ci tẽla. Yesu wa popia hati: “Nda umue o ndi sole, o pokola kondaka yange.” (Yoano 14:23) Yesu poku lekisa okuti eye ungombo, wa popia hati: “Olomeme viange vi yeva ondaka yange kuenda nda vi kũlĩha kuenje vi ndi kuama.” (Yoano 10:27) Eci ci tu kuatisa oku limbuka nda tu kuetele ocisola Yesu, ovilinga vietu.

18, 19. (a) Oku li longisa catiamẽla ku Yesu ci tu kuatisa oku linga nye? (b) Elivulu lilo li kuete ocimãho ce? Kuenda olio li ka kuatisa ndati vana va sima okuti olondonge via Kristu?

¹⁸ Ovilinga vietu vi lekisa eci tua tuwa vutima. Omo liaco, tu sukila oku pongolola tete ekalo lietu liovutima. Yesu wa popia hati: “Eci ci lomboloka omuenyo ko pui okuti, ovo va ku kũlĩha okuti, ove lika wu Suku yocili kuenda va sukila oku kũlĩhavo una ove wa tuma, Yesu Kristu.” (Yoano 17:3) Nda tua kuata ukũlĩhĩso wasuapo watiamẽla ku Yesu, ci ka vetiya utima wetu oku linga apongoloko. Ukũlĩhĩso waco u ka pamisa ocisola tu u kuetele kuenda oku tava kelaleko lioku kala olondonge viaye otembo yosi.

¹⁹ Elivulu eli, li kuete ocimãho coku tu kuatisa oku linga olondonge via Yesu. Ka li lombolola ovina viosi viatiamẽla komuenyo wa Yesu kuenda kupange waye woku kunda. b Olio lia pangiwila oku tu kuatisa oku kuata elomboloko liwa ndomo tu pondola oku kuama Yesu. Li tu kuatisavo oku sokolola Ovisonehua loku li pula ndoco: ‘Ndi kasi hẽ oku kuama Yesu lutima wosi?’ (Tiago 1:23-25) Pamue tunde osimbu o kuete onjongole yoku songuiwa  Lungombo Uwa. Ku tava hẽ okuti oco tu songuiwe laye tu sukila oku amamako oku kuata ovituwa viwa? Embimbiliya li popia hati: “Amamiko oku li seteka nda vu kasi vekolelo; amamiko oku seteka eci ene muẽle wa tuwi.” (2 Va Korindo 13:5) Tu likolisiliko oku kũlĩhĩsa nda tu kasi muẽle oku songuiwa la Yesu Ungombo Uwa, una Yehova a nõla oco a kale usongui wetu.

20. Nye tu ka lilongisa vocipama cavali?

²⁰ Elivulu lilo, li ka ku kuatisa oku pamisa ocisola o kuetele Yesu kuenda Yehova. Nda ocisola caco ca songuila omuenyo wove, o ka kuata ombembua kuenda esanju voluali lulo. Handi vali, o ka eca olopandu ku Yehova omo a tu ĩha Ungombo Uwa. Ocili okuti elilongiso lietu liatiamẽla ku Kristu li sukila oku kuata ociseveto ca pama. Ondaka eyi tu ka yi konomuisa Kocipama 2, ci ka lombolola ocikele ca Yesu koku tẽlisa ocipango ca Yehova catiamẽla koluali.