Okuakutanga wa Soliwa:

“Linga ondonge yange.” (Marko 10:21) Lolondaka evi, Yesu Kristu wa tu laleka vosi oco tu linge olondonge viaye. Anga hẽ wa siata oku tava kelaleko liaco? Nda wa ci linga o ka kuata onima yiwa. Momo lie?

Yehova wa tuma Omõlaye wongunga palo posi oco a ece omuenyo waye ndocisembi. (Yoano 3:16) Eye wa tu fila kuenda wa lekisa ndomo tu pondola oku kala komuenyo. Kovina viosi eye a linga, wa lekisa epokolo kuenda wa sanjuisa Isiaye. Yesu wa lekisa ndomo tu pondola oku setukula Isiaye. Ovituwa viaye kuenda ovina a linga, via eca uvangi wokuti eye Omõla a Suku.—Yoano 14:9.

Yesu eye “ongangu.” Omo liaco, Embimbiliya li popia hati, “kuami volomãhi viaye lekolelo.” (1 Petulu 2:21) Oco tu kuate ukamba uwa la Yehova kuenda oku endela vonjila yi tuala komuenyo ko pui, tu sukila oku kuama ongangu ya Kristu.

Voku kuama ongangu ya Yesu, mua kongela oku kũlĩha ciwa omuenyo waye eci a kala palo posi. Tu sukila oku konomuisa ovolandu a sangiwa Vembimbiliya a tiamẽla ku Yesu. Oku sokolola lutate kovina Yesu a popia levi a linga kuenda ndomo tu kuama ongangu yaye, ci tu kuatisa oku linga olondonge viaye.

Elivulu lilo, lika ku kuatisa oku kuatela ocisola Yesu kuenda Yehova. Ocisola caco, ci ka ku vetiya oku kuama ongangu ya Yesu loku sanjuisa Yehova cilo kuenda otembo ka yi pui.