Ocituwa coku litukusa kovimatamata viuyali oco omunu a tẽlise oloñeyi viaye, ci koka ohele konepa yespiritu, momo ci vetiya oku kuata ovisimĩlo ka via sungulukile viatiamẽla koku lipekela. * Wosi o kuete ocituwa caco, o sima okuti omanu va lulikiwila lika oku tẽlisa oloñeyi vioku lipekela. Omunu waco, ka tendi oku lipekela ndonjila yoku lekisa ocisola pokati komanu va kuele, eye o tenda elinga liaco ndepuluvi lioku tẽlisa ño oloñeyi. Pole, onjongole yaco yi pita ombamba. Ocituwa caco ka ci kuatisa omunu oku ipaya oloñeyi vietimba viatiamẽla ‘kevĩho liukahonga, kevĩho, . . . kuenda kolonjongole vĩvi,’ momo oloñeyi vi amamako oku li vokiya.​—Va Kolosai 3:5.

Upostolo Paulu wa soneha hati: “A vakuacisola . . . tu liyelisi kovina viosi vi vĩhisa etimba levi vi vĩhisa utima. Tu suisipo okukola kuetu loku sumbila Suku.” (2 Va Korindo 7:1) Nda handi kua siatele oku kapako ondaka eyi, ku ka sumue, momo Yehova ‘ukuakuecela’ kuenda o yongola oku ku kuatisa. (Osamo 86:5; Luka 11:9-13) Nda utima wove u ku vetela evelo kuenda o likolisilako oku siapo ocituwa caco, ci lekisa okuti ove o kuete ovisimĩlo viwa. Ivaluka okuti, “Suku wa piãla, ovitima vietu vi sule, kuenje eye wa kũlĩha cosi.” (1 Yoano 3:20) Suku, ka luluvalela lika kakandu etu; eye o kũlĩhĩsavo ekalo lietu. Ocituwa caco  ci vetiya Yehova oku tu yevelela locikembe eci tu u pinga ongecelo. Ka tu ka liwekipo oku likutilila ku Suku lumbombe, ndomõla enda ku isiaye eci a kuata ovitangi. Yehova o ka ku kuatisa oco o kuate utima wa yela. (Osamo 51:1-12, 17; Isaya 1:18) O sukila oku likolisilako oku linga ovina wa siata oku pinga volohutililo, ndeci oku yuvula oku tala omanu va kasi epõlola kuenda akamba vãvi. *

Nda ku tẽla oku imbapo ocituwa coku li tẽlisa oloñeyi ove muẽle, kuata utõi woku sapuilako umue ngandiove Ukristão, ale ekamba liove lia pama kespiritu. *​—Olosapo 1:8, 9; 1 Va Tesalonike 5:14; Tito 2:3-5.