Oku tundisiwa kua umue ngandietu vekongelo omo lioku linga ekandu kuenje ka likekembela, ku nena esumuo lialua. Tu lekisa okuti tu kuetele ocisola Suku, poku kapako onumbi Yembimbiliya yatiamẽla komanu va tundisiwa. * Konomuisa apulilo amue omanu va siata oku linga.

Tu tenda ndati omunu wa tundisiwa vekongelo? Embimbiliya li popia hati: “Nda kuli umue ukuẽle ketavo wa pia kevĩho liukahonga, pamue kocipululu, pamue koku fendela oviteka pamue koku imbula, pamue koku kolua, pamue kundiandia, ndaño oku lia laye koka li laye.” (1 Va Korindo 5:11) Catiamẽla ku vana va liwekapo oku “kala vovilongua via Kristu,” tu lunguiwa hati: “ko ko tambuli vonjo ndaño oku u lama. Momo omunu ulama wa tava kovilinga viaye vĩvi.” (2 Yoano 9-11) Tu sukila oku yuvula oku kuata ukamba ale oku vangula ovina viespiritu lomanu vana va tundisiwa vekongelo. Utala Wondavululi 15 ya Cembanima wo 1981, kemẽla 21, wa lekisa okuti: “Enanga liatete lituala omunu oku fetika ombangulo la vana va tundisiwa vekongelo oku va pulisa hati, ‘Ciwa?’ Anga hẽ tu yongola oku eca enanga liaco liatete lava va tundisiwa?”

Anga hẽ onumbi yoku yuvula omanu va tundisiwa ya tĩla oku yi pokola? Sio, ka ya tĩlile. Catete, tu lekisa okuti tu kasi oku pokola ku Suku kuenda Kondaka yaye. Etu ka tu pokola lika ku Yehova kovina vina via leluka. Pole tu pokolavo kovina vi molẽha ndu okuti via tĩla. Ocisola tu kuetele Suku, ci tu vetiya oku pokola kovihandeleko viaye, loku limbuka okuti eye ukuesunga, ukuacisola kuenda ovihandeleko viaye vi tu kuatisa. (Isaya 48:17; 1 Yoano 5:3) Cavali, oku yuvula ukamba lomanu va tundisiwa ka ci tu teyuila lika  etu, pole ci teyuilavo ekongelo kovituwa vi kapa kohele ekalo liayo kespiritu. (1 Va Korindo 5:6, 7) Catatu, epokolo lietu kolonumbi Viembimbiliya, li pondola oku kuatisa omunu wa tundisiwa. Oku pokola kesokiyo liocisoko cesombiso, ci kuatisa ondingekandu oku kapako elungulo a tambula kakulu vekongelo. Oku yuvula ukamba laye, ci ko kuatisa oku kuata “olondunge,” loku siapo ekandu liaye kuenda oku likolisilako oku tiuka ku Yehova.​—Luka 15:17.

Nye ci popiwa nda umue ngandietu wa tundisiwa vekongelo? Ocili okuti ukamba u kasi pokati kepata u kapiwa voseteko. Tu tata ndati ngandietu wa tundisiwa vekongelo? Ka tu tẽla oku lombolola ndomo tu pondola oku tetulula ovitangi viosi vi iyililako, pole tu konomuisa ovina vivali.

Olonjanja vimue, omunu wa tundisiwa vekongelo o kala vonjo yimuamue la vakuepata liaye. Ocili okuti, oku tundisiwa ka ku tepa usitue, momo o ka amamako oku linga upange weteke leteke vepata. Pole, vakuepata va sukila oku yuvula oku sapela laye ovina viatiamẽla kespiritu. Omo liaco, vosi vakuepata liaye va sukila oku kapako onumbi yaco. Nda poku linga efendelo liepata omunu wa tundisiwa haipo a kasi, ka citava okuti o linga onepa kefendelo liaco. Nda omunu wa tundisiwa handi omõla, olonjali viaye vi kuete ocikele coku u longisa kuenda oku u pindisa. Ovio, vi amamako oku linga laye elilongiso Liembimbiliya. *​—Olosapo 6:20-22; 29:17.

Pamue omunu wa tundisiwa o nõlapo oku kala ocipãla lepata. Ndaño olonjanja vimue o sandiliya epata, pole epata li sukila oku tepulula ukamba u kasi pokati kavo. Akristão vakuepokolo ka va lisandela esunga lioku kuata ukamba lomunu wa tundisiwa okuti ka kasi konjo yavo. Epokolo li tu vetiya oku kuama olonumbi Viovisonehua  viatiamẽla komanu va tundisiwa vekongelo. Oku pokola kesokiyo liaco ci kuatisa ondingekandu oku tava epindiso. *​—Va Heveru 12:11.