OCIPAMA 41
Nye Embimbiliya li Popia Catiamẽla Koku Lipekela?
Omanu valua va kuete osõi yoku vangula catiamẽla koku lipekela. Omo liaco, Embimbiliya poku tukula ondaka oku lipekela, li ci linga lonjila yi teta onimbu, pole, lesumbilo. Ovina olio li popia, vi tu kuatisa. Eci ca sunguluka. Ocili okuti, Yehova eye Ululiki wetu. Handi vali, eye wa kũlĩha eci ci tu kuatisa. Eye o tu sapuila eci tu sukila oku linga oco tu u sanjuise kuenda ovina vi tu kuatisa oku sanjukila omuenyo otembo ka yi pui.
1. Cipi ocisimĩlo ca Yehova catiamẽla koku lipekela?
Oku lipekela, ombanjaile yimue ya tunda ku Yehova. Eye o yongola okuti oku lipekela, ku sanjuisa ulume lukãi okuti vana va tokekisa olohuela. Ombanjaile yaco, ka yecelela lika kolohueli oku kuata omãla, pole, yi va ecelelavo oku li lekisa ocisola pokati lonjila yimue yi va sanjuisa. Eli olio esunga lieci Ondaka ya Suku yi popela hati: “Sanjukila ukãi wo vumalẽhe wove.” (Olosapo 5:18, 19) Yehova o lavoka okuti, Akristão olohueli va kala vakuacili lolohueli viavo okuti, lalimue eteke ka va ka linge ukahokolo.—Tanga Va Heveru 13:4.
2. Nye ci lomboloka evĩho liukahonga?
Embimbiliya li tu sapuila okuti, “vakuevĩho liukahonga . . . ka va ka piñala Usoma wa Suku.” (1 Va Korindo 6:9, 10) Asonehi Vembimbiliya kelimi lio Helasi, va tukula ondaka por·neiʹa, oco va lombolole ondaka evĩho liukahonga. Vondaka yaco, mua kongela (1) omanu va lipekela a okuti, ka va tokekisile olohuela, (2) oku lipekela kuomanu vakuavimatamata vimuamue kuenda (3) oku lipekela locinyama. Tu sanjuisa Yehova loku kuatisiwa nda tu “yuvula evĩho liukahonga.”—1 Va Tesalonike 4:3.
LILONGISA ONDONGOSI
Kũlĩhĩsa ndomo o yuvula evĩho liukahonga kuenda ndomo o kuatisiwa poku amamako oku liyelisa kovituwa.
3. Tila evĩho liukahonga
Ulume umue ukuekolelo o tukuiwa Yosefe, wamamako oku liyelisa kovituwa. Tanga Efetikilo 39:1-12, noke konomuisa apulilo a kuãimo:
-
Nye ca vetiya Yosefe oku tila? —Tala ocinimbu 9.
-
O sima okuti Yosefe wa nõla onjila ya sunguluka? Momo lie?
Koloneke vilo, umalẽhe umue o pondola oku setukula ndati Yosefe kuenda oku tila evĩho liukahonga? Tala OVIDEO..
Yehova o yongola okuti, vosi yetu tu yuvula evĩho liukahonga. Tanga 1 Va Korindo 6:18, noke konomuisa apulilo a kuãimo:
-
Ovina vipi vi kokela omunu umue oku linga evĩho liukahonga?
-
Ove o pondola oku tila ndati evĩho liukahonga?
4. O pondola oku tamalãla keyonjo
Nye ci pondola oku tĩlisa oku tamalãla keyonjo lioku linga evĩho liukahonga? Tala OVIDEO, noke konomuisa epulilo li kuãimo.
-
Manji wa lekisiwa vovideo, eci a limbuka okuti ovina vimue a kala oku linga levi a sima via ponduile oku u kokela oku lueyela ukãi waye, nye a linga?
Ndaño muẽle Akristão vakuekolelo, va siata oku likolisilako oco vamameko oku kuata ovisimĩlo via yela. O pondola oku amamako ndati oku yuvula oku sokolola kevĩho liukahonga? Tanga Va Filipoi 4:8, noke konomuisa apulilo a kuãimo:
-
Ovina vipi tu sukila oku sokolola?
-
Oku tanga Embimbiliya loku litumbika kupange wa Yehova, ci tu kuatisa ndati oku tamalãla keyonjo lioku linga ekandu?
5. Olonumbi via Yehova vi tu kuatisa
Yehova wa kũlĩha eci ci tu kuatisa. Eye o tu sapuila ndomo tu liyelisa kovituwa kuenda asumũlũho a tunda koku ci linga. Tanga Olosapo 7:7-27, ale tala OVIDEO, noke konomuisa apulilo a kuãimo.
-
Umalẽhe wa li kapa ndati vekalo limue li koka ohele?— Tala Olosapo 7:8, 9.
-
Ndomo ca lekisiwa Kolosapo 7:23, 26, evĩho liukahonga li koka ovitangi vialua. Nda tuamamako oku liyelisa kovituwa, ovitangi vipi tu ka yuvula?
-
Oku liyelisa kovituwa, ci tu kuatisa ndati oku sanjukila omuenyo otembo ka yi pui?
Omanu vamue va sima okuti, ovina Embimbiliya li popia viatiamẽla koku lipekela kuomanu vakuavimatamata vimuamue, ka vi lekisa ocisola. Pole, Yehova Suku ukuacisola, o yongola okuti omanu vosi va sanjukila omuenyo otembo ka yi pui. Oco tu kuate asumũlũho aco, tu sukila oku kapako olonumbi viaye. Tanga 1 Va Korindo 6:9-11, noke konomuisa epulilo li kuãimo:
-
Catiamẽla kovisimĩlo via Suku, anga hẽ oloñeyi vioku lipekela lomanu vakuavimatamata vimuamue ovio lika ka via sungulukile?
Oco tu sanjuise Suku, vosi yetu tu sukila oku linga apongoloko. Tu sukila hẽ oku likolisilako? Tanga Olosamo 19:8, 11, noke konomuisa apulilo a kuãimo:
-
O sima okuti olonumbi via Yehova viatiamẽla kovituwa, via sunguluka? Momo lie?
Yehova wa kuatisa omanu valua oku pokola kolonumbi viaye viatiamẽla kovituwa. Eye oku kuatisavo
OMANU VAMUE VA POPIA VATI: “Omanu vavali va lisole nda va lipekela, ca sunguluka.”
-
Nda wa popia nye?
NYE WA LILONGISA?
Oku lipekela, ombanjaile yimue ya tunda ku Yehova okuti, ya eciwa kulume kuenda kukãi waye oco va yi sanjukile.
Oku Pitulula
-
Nye ca kongela vevĩho liukahonga?
-
Nye ci tu kuatisa oku yuvula evĩho liukahonga?
-
Tu kuatisiwa ndati poku kuama olonumbi via Yehova viatiamẽla kovituwa?
OCO O KŨLĨHE OVINA VIKUAVO
Lilongisa esunga lieci Suku a yonguila okuti, nda ulume lukãi va yongola oku kala kumosi, va sukila oku tokekisa olohuela.
Lilongisa esunga lieci Embimbiliya li longisila okuti, tu sukila oku suvuka ocituwa coku lipekela comanu vakuavimatamata vimuamue, pole, ka tu suvuka omanu vaco.
“Oku Lipekela Kuomanu Vakuavimatamata Vimuamue Ekandu?” (Ocipama ci sangiwa lika vo Internet)
Lilongisa ndomo ovihandeleko via Suku viatiamẽla kevĩho liosi liukahonga vi tu teyuila.
Vulandu losapi “Ovo va Ndi Tata Lesumbilo,” limbuka eci ca vetiya umue wa enda oku lipekela lomanu vakuavimatamata vimuamue oku linga apongoloko, oco a sanjuise Suku.
“Embimbiliya li Pongolola Omuenyo Womanu” (Utala Wondavululi 1 wa Kupupu 2011)
a Volonjila ka vi taviwa vioku lipekela, mua kongela ovilinga ndeci: Oku lipekela, oku kapa vomẽla loku sipula kocimatamata cuyali comunu umue, ketundisilo kuenda oku sisita kocimatamata cuyali comunu ukuavo ndonjila yoku linga ukahonga.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
