Kolonepa vialua violuali, omanu va kuete ovisimĩlo via litepa viatiamẽla kovinyua vi koluisa. Vamue eci va kasi lakamba vavo, va sole oku nyua cimue. Vakuavo va nõlapo okuti, ka va nyui ocinyua lacimue ci koluisa. Handi vakuavo, va nyua toke eci va kolua. Nye Embimbiliya li popia catiamẽla kovinyua vi koluisa?

1. Anga hẽ ekandu oku nyua ovinyua vi koluisa?

Embimbiliya ka li pisa oku nyua ovinyua vi koluisa. Eci Embimbiliya li popia catiamẽla kolombanjaile Suku a tu ĩha, lia kongelamo ‘ovinyu yi sanjuisa utima womunu.’ (Olosamo 104:14, 15) Alume kuenda akãi vamue vakuekolelo va tukuiwa Vembimbiliya, va nyuile ale ovinyua vi koluisa.—1 Timoteo 5:23.

2. Lipi elungulo Embimbiliya li eca ku vana va nõlapo oku nyua ovinyua vi koluisa?

Yehova o pisa oku nyua calua kuenda uholua. (Va Galatia 5:21) Ondaka yaye yiti: “Ku ka kale pokati ka vana va nyua ovinyu yalua.” (Olosapo 23:20) Nda tu nõlapo oku nyua, ndaño okuti pokolika, ka tu ka nyui calua okuti noke ka tu sokolola vali ciwa, ka tu tẽla oku likandangiya kolondaka, kovilinga vietu, ale tu kapa kohele uhayele wetu. Nda ka tu tẽla oku likandangiya poku nyua, tu sukila oku liwekapo.

3. Tu sumbila ndati onjila vakuetu va nõlapo yatiamẽla kovinyua vi koluisa?

Omunu lomunu eye o nõla nda o nyua ovinyua vi koluisa ale sio. Tu yuvuli oku pisa omunu o nõlapo oku nyua lonjila ya sunguluka ovinyua vi koluisa kuenda ka tu ka kisiki omunu umue oku nyua cina eye ka yongola. (Va Roma 14:10) Ka tu ka nyui ovinyua vi koluisa nda vi kokela vakuetu ocilondokua. (Tanga Va Roma 14:21.) Etu ka tu sandi “olonjongole [vietu] muẽle, pole, te viomunu ukuavo.”—Tanga 1 Va Korindo 10:23, 24.

 LILONGISA ONDONGOSI

4. Nõla nda o nyua ale sio

Yesu wa tendele ndati oku nyua ovinyua vi koluisa? Oco o kũlĩhe etambululo liaco, kũlĩhĩsa ocikomo catete eye a linga. Tanga Yoano 2:1-11, noke konomuisa apulilo a kuãimo:

• Oku upisa kocikomo eci, nye tu lilongisa konjila ndomo Yesu a tenda ovinyua vi koluisa kuenda vana va nyua?

• Omo okuti Yesu ka pisa oku nyua ovinyua vi koluisa, Ukristão o sukila oku tenda ndati omunu o nõlapo oku nyua?

Omo liaco, ndaño okuti Ukristão o kuete elianjo lioku nyua ovinyua vi koluisa, ka ci lomboloka okuti, eye o sukila oku ci linga vapuluvi osi a yongola. Tanga Olosapo 22:3, noke konomuisa ndomo asunga a kuãimo a ku kuatisa oku nõla nda o nyua ale sio:

• Ove o ka endisa ocendelo cimue ale oku talavaya lomakina yimue.

• Ove wemina.

• Ondotolo yimue ya ku lungula oco ku ka nyue ovinyua vi koluisa.

• Ove ku tẽla oku likandangiya konjongo yeci o nyua.

• Ocihandeleko ka ci ku ecelela oku nyua ovinyua vi koluisa.

• Ove o kasi lomunu umue wa nõlapo oku yuvula oku nyua omo okuti, kosimbu ka tẽlele oku likandangiya oku nyua..

Anga hẽ citava okuti kocipito cuvala ale kovipito vikuavo ku kala ovinyua vi koluisa? Oco o tale eci ci pondola oku ku kuatisa oku nõla onjila yimue, tala OVIDEO.

Tanga Va Roma 13:13 kuenda 1 Va Korindo 10:31, 32. Noke yoku tanga ovisonehua evi, konomuisa epulilo li kuãimo:

• Oku kapako onumbi eyi, ci ku kuatisa ndati oku nõla onjila yimue yi ka sanjuisa Yehova?

 5. Nõla onjongo yeci o tẽla oku nyua

Nda o nõlapo oku nyua ovinyua vi koluisa, ivaluka okuti: Ndaño Yehova ka pisa oku nyua ovinyua vi koluisa, eye o pisa oku nyua calua. Momo lie? Tanga Hosea 4:11, 18, noke konomuisa epulilo li kuãimo:

• Nye ci pita nda omunu umue o nyua calua?

Nye ci tu kuatisa oku yuvula oku nyua calua? Tu sukila oku kuata ocituwa ca sunguluka ale oku kũlĩha onjongo yetu. Tanga Olosapo 11:2, noke konomuisa epulilo li kuãimo:

• Momo lie ca sungulukila ocisimĩlo coku tumbika onjongo yeci o nyua?

6. Ceci ci pondola oku kuatisa umue oku liwekapo oku nyua calua ovinyua vi koluisa

 NYE WA LILONGISA?

Yehova wa linga eliangiliyo liovinyua vi koluisa oco vi tu sanjuise, pole, eye o pisa oku nyua calua kuenda uholua.

Oku Pitulula

• Embimbiliya li tenda ndati ovinyua vi koluisa?

• Yipi ohele yi tunda koku nyua calua ovinyua vi koluisa?

• Tu lekisa ndati esumbilo konjila vakuetu va nõla yatiamẽla kovinyua vi koluisa?