Yesu eye Utue wekongelo Liakristão. (Va Efeso 5:23) Yesu koloneke vilo oku upisa kilu, o kasi oku songuila olondonge viaye palo posi pocakati ‘cukuenje wa kolelua haeye wa lunguka.’ (Tanga Mateo 24:45.) Yesu eye wa nõla “ukuenje wa kolelua” kuenda wo wĩha omoko yoku nõla olonjila vimue. Ndaño lomoko yaco, ukuenje wa kolelua o vumba Kristu kuenda vamanjaye. Helie ukuenje wa kolelua? Ukuenje wa kolelua o tu tata ndati?

1. Helie “ukuenje wa kolelua haeye wa lunguka”?

Yehova wa siata oku talavaya lomunu umue ale locimunga cimue citito calume va eca olonumbi kafendeli vaye. (Malakiya 2:7; Va Heveru 1:1) Noke yolofa via Yesu, ovapostolo kuenda akulu vo ko Yerusalãi ovo va kuata omoko yoku songola. (Ovilinga 15:2) Poku kuama onjila yimuamue koloneke vilo, ocimunga cimue citito cakulu vekongelo okuti Osungu Yolombangi Via Yehova, ceca okulia konepa yespiritu kuenda ci songuila upange woku kunda. Ocimunga caco ci tukuiwa okuti, ‘Ukuenje wa kolelua haeye wa lunguka, cina [Yesu] a nõla.’ (Mateo 24:45a) Vosi vana va panga onepa Kosungu Yolombangi Via Yehova, Akristão va wavekiwa lespiritu sandu, okuti va lavoka oku likongela la Kristu Vusoma waye kilu eci omuenyo wavo u sulila palo posi.

2. Okulia kupi konepa yespiritu ukuenje wa kolelua a siata oku eca?

Yesu wa popia hati ukuenje wa kolelua wa laikele ‘oku eca [Kakristão] okulia votembo ya sokiyiwa.’ (Mateo 24:45b) Ndeci okulia tu lia ku tu pamisa ketimba kuenda oku kuata uhayele, okulia konepa yespiritu okuti olonumbi Viondaka ya Suku, ku tu ĩha ongusu tu sukila oco tu amameko oku kolela ku Yehova kuenda oku linga upange Yesu a tu kundika. (1 Timoteo 4:6) Tua siata oku tambula okulia kuaco kuespiritu pocakati colohongele viekongelo, kolohongele vimbo, kolohongele viofeka, valivulu a kunamẽla Vembimbiliya, volovideo vi tu kuatisa oku kũlĩha ocipango ca Suku kuenda oku pamisa ukamba wetu laye.

 LILONGISA ONDONGOSI

3. Afendeli va Yehova va sukila oku sokiyiwa ciwa

Poku kuama olonumbi via Yesu, Osungu Yolombangi Via Yehova yi sokiya upange Wolombangi Via Yehova. Yesu wa songuila Akristão vatete lonjila yimuamue. Tala OVIDEO.

Tanga 1 Va Korindo 14:33, 40, noke konomuisa epulilo li kuãimo:

• Ovinimbu evi, vi lekisa ndati okuti Yehova o yongola okuti Olombangi viaye vi sokiyiwa ciwa?

4. Ukuenje wa kolelua haeye wa lunguka o sokiya upange wetu woku kunda

Upange woku kunda wa kala upange wa velapo wa lingiwa Lakristão vatete. Tanga Ovilinga 8:14, 25, noke konomuisa apulilo a kuãimo:

• Pokati Kakristão vatete, helie wa enda oku eca olonumbi ndomo ku lingiwa upange woku kunda?

• Petulu la Yoano va kapeleko ndati olonumbi viovapostolo vakuavo?

Oku kunda, okuo upange wa velapo wa siata oku sokiyiwa Losungu Yolombangi Via Yehova. Tala OVIDEO.

 Yesu wa lekisa ndomo upange woku kunda u kuete esilivilo. Tanga Marko 13:10, noke konomuisa apulilo a kuãimo:

• Momo lie upange woku kunda u kuetele esilivilo lialua Kosungu Yolombangi Via Yehova?

• Momo lie tu sukilila okuti “ukuenje wa kolelua haeye wa lunguka” o sokiya upange waco voluali luosi?

5. Ukuenje wa kolelua eca olonumbi

Osungu Yolombangi Via Yehova yeca olonumbi Kakristão va sangiwa voluali luosi. Oyo yi nõla ndati olonumbi va eca? Kũlĩhĩsa ndomo osungu yakulu Yakristão vatete va ci linga. Tanga Ovilinga 15:1, 2, noke konomuisa apulilo a kuãimo:

• Nye ca koka ema pokati Kakristão vamue vatete?

• Kulie Paulu la Barnaba kuenda vakuavo va endele oku ka pinga ekuatiso oco va potolole ocitangi caco?

Tanga Ovilinga 15:12-18, 23-29, noke konomuisa epulilo li kuãimo:

• Osungu yakulu vatete, nye ya enda oku linga osimbu ka ya nõlele onjila yimue poku sanda olonumbi via Suku viatiamẽla kocitangi cimue?—Tala ocinimbu 12, 15, kuenda 28.

Tanga Ovilinga 15:30, 31 kuenda 16:4, 5, noke konomuisa apulilo a kuãimo:

• Nye Akristão vatete va linga poku tambula olonumbi via eciwa losungu yakulu?

• Yehova wa va sumũlũisa ndati omo liepokolo liavo?

Tanga 2 Timoteo 3:16 kuenda Tiago 1:5, noke konomuisa epulilo li kuãimo:

• Osungu Yolombangi Via Yehova koloneke vilo, pi yi sanda olonumbi poku nõla onjila yimue?

 NYE WA LILONGISA?

Osungu Yolombangi Via Yehova oyo “ukuenje wa kolelua haeye wa lunguka” wa nõliwa la Kristu. Oyo yeca olonumbi lokulia kuespiritu Kakristão voluali luosi.

Oku Pitulula

• Helie wa nõla “ukuenje wa kolelua haeye wa lunguka”?

• Osungu Yolombangi Via Yehova ya siata oku tu tata ndati?

• O tava okuti, Osungu Yolombangi Via Yehova oyo “ukuenje wa kolelua haeye wa lunguka”?