OMANU vosi va liyaka lasakalalo ndaño muẽle afendeli va Suku. Ukualosamo wa soneha hati, ‘asakalalo a nduila vutima.’ (Osamo 94:19) Kuenje Yesu wa popia okuti koloneke via sulako ‘asakalalo omuenyo’ a laikele oku tateka omanu oku vumba Yehova. (Luka 21:34) Nye ci popiwa kokuove? Anga hẽ o kasi oku liyaka lekambo liolombongo, lovitangi viepata, ale ekambo liuhayele? Yehova o pondola oku ku kuatisa ndati oku yula ovitangi viaco?

Tu sukila ekuatiso oco tu liyake lasakalalo etu. Upostolo Paulu wa soneha hati, “Tu sipataiwa kuosi.” “Tu sakalaisua ño-o ... tu pupowaiwa.” Pole, eye wa popiavo hati, “ka tu vandi,” “haimo ka tu konyoha,” kuenda “ka tu fi.” Nye ci tu kuatisa oku pandikisa? “Unene wa piãla”—okuti unene u tunda ku Yehova Suku yetu Ukuonene Wosi.—2 Va Korindo 4:7-9.

Sokolola ndomo wa tambuile “unene wa piãla” kosimbu. Ivaluka hẽ ndomo ohundo yimue yi vetiya ya ku kuatisa oku limbuka ocisola cocili ca Yehova? Ekolelo liove kolohuminyo via Yehova lia pamele hẽ eci wa enda oku longisa omanu catiamẽla kelavoko Lioluali luokaliye? Eci tu enda kolohongele loku eca atambululo etu, tu tambula ongusu yoku pandikisa lasakalalo omuenyo, kuenda tu kuata ombembua yovutima okuti tu pondola oku vumba Yehova lesanju.

Ocili okuti pamue o vetiyiwa oku kuama olonjila vialua vonjanja yimosi. Pole, Yehova o yongola okuti tu sanda tete Usoma kuenda oku pitisa kovaso ovopange Aye. (Mateo 6:33; Luka 13:24) Nye ci popiwa nda elambalalo, ekambo liuhayele, ale ovitangi vepata vi ku tateka oku linga ovopange aco? Ale, nye ci popiwa nda upange woku sanda eteku u nyana otembo yove kuenda ongusu nda wa pesila kekongelo? Omo lioku liyaka lovitangi vialua okuti, otembo yitito kuenda ekambo liongusu yoku linga ovina viaco viosi, pamue o yeva esumuo. Pamue o sima nda okuti Yehova o kasi oku ku kisika ovina vialua.

Yehova wa sunguluka. Eye lalimue eteke a ka tu kisika oku linga ovina ka tu tẽla. Handi vali, eye wa kũlĩha okuti oco tu kuate vali uhayele kuenda oku yula esumuo, cambata otembo.—Osamo 103:13, 14.

Kũlĩhĩsa ndomo Yehova a tata uprofeto Eliya. Anga hẽ eci Eliya a sumuile kuenda a kuatele usumba, yu wa tilila vekalasoko, Yehova wa tateka uprofeto loku u handeleka oco a tiukile kocikele caye? Sio. Olonjanja vivali Yehova wa tumile ungelo waye oco a pasule Eliya kuenda wo wĩha okulia oco a lie. Ndaño noke yoku pita 40 koloneke, Eliya lopo wa sakalalele kuenda wa kuatele usumba. Nye Yehova a linga vali oco o kuatise? Catete, Yehova wa lekisa okuti o pondola oku u teyuila. Cavali, Yehova wa lembeleka Eliya ‘lokandaka ka leñehako.’  Oku sulako, Yehova wo situluila okuti handi kua kala olohulukãi viafendeli Vaye vakuekolelo. Kuenje eci ca kuatisa Eliya oku kuata vali ombili kupange waye wuprofeto. (1 Olosoma 19:1-19) Nye tu lilongisilako? Eci Eliya a sakalalele, Yehova wa lekisa epandi kuenda ohenda kokuaye. Yehova ka pongolekele. Eye o tu tatavo lonjila yaco.

Eci o sima kueci o pondola oku eca ku Yehova, lekisa esunguluko. Ku ka sokise eci o pondola oku linga etaili leci wa endaenda oku linga. Ocindekaise: Ukuakuyoloka nda wa liwekapo oku pindisa etimba vokuenda kuanyamo, ale olosãi vialua, ka ka tẽla oku yoloka vali ciwa ocipikipiki. Pole, eye o fetika oku likapela ovimãho vitito viu kuatisa oku pama kuenda oku pandikisa. Akristão va sokisiwa la vakuakuyoloka. Ovo va lipindisa poku likapela ovimãho viwa. (1 Va Korindo 9:24-27) Momo lie ku likapela ocimãho cespiritu o tẽla oku tẽlisa cilo? Ndeci, citava okuti o likapela ocimãho coku endaenda kolohongele. Pinga ku Yehova oco a ku kuatise oku tẽlisa ocimãho cove. Osimbu o pama vali kespiritu, o ka ‘seteka kuenda o limbuka okuti Yehova ukuahenda.’ (Osamo 34:8) Limbuka okuti cosi o linga oco o lekise ocisola cove ku Yehova, ndaño citito, kokuaye ci kuete esilivilo.—Luka 21:1-4.

Yehova wa kuatisa ndati June oku tiuka kokuaye? Ukãi waco wa tu sapuila hati: “Nda amamako oku likutilila ku Yehova, oku pinga oco a ndi kuatise. Kuenje ndatembo yange yukãi wa ndi sapuila okuti ku ka kala ohongele yimbo volupale luange. Nda nõlapo oku enda eteke limosi kohongele yimbo. Hesanjukuolio nda kuata omo lioku kala vali pamosi lafendeli va Yehova! Ohongele yaco ya kala ekuatiso nda lavokaile. Cilo ñuete esanju lioku vumba vali Yehova. Kaliye omuenyo wange u kuete esilivilo. Handi vali, nda limbuka okuti si pondola oku kala lika liange ale oku liamũha. Ngeca olopandu omo handi kua ndi supila otembo yoku tiuka.”