KOLELA okuti eci o tiuka ku Yehova eye o ku tambula. Eye o ku kuatisa oku liyaka lasakalalo, oku yula evalo kutima, kuenda oku sanga ombembua yi tunda koku kuata utima u yela. O vetiyiwavo oku vumba Yehova kumue lafendeli vakuavo. Ocitangi cove ci sokisiwa leci Cakristão vo kocita catete, vana upostolo Petulu a sonehela hati: “Wa kaili loku tungayala ndolomeme, kaliye puãi, wa tiukili kungombo wovitima viene, haeye ukuaku vi lava.”—1 Petulu 2:25.

Oku tiuka ku Yehova oco ocina ca velapo o pondola oku linga. Momo lie? Momo o ka sanjuisa utima wa Yehova. (Olosapo 27:11) Ndomo wa ci kũlĩha, ovilinga vietu vi pondola oku sanjuisa ale oku sumuisa Yehova. Ocili okuti Yehova ka tu kisika oku u sola, ale oku u vumba. (Esinumuĩlo 30:19, 20) Onoño yimue ukuakukonomuisa Embimbiliya ya lombolola ndoco: “Lomue o tẽla oku ku yikuilako utima wove. Te wa ci linga ove muẽle.” Nda tua fendela Yehova lutima weyuka ocisola, tu pondola oku nõla oku yikula epito liaco. Nda tua ci linga, tu u wĩha ombanjaile yimue yi kuete esilivilo okuti epandi lietu, kuenda tu sanjuisa calua utima waye. Omo liaco, lacimue ci sokisiwa lesanju tu kuata poku eca ku Yehova efendelo eye a sesamẽla.—Ovilinga 20:35; Esituluilo 4:11.

Eci o fetika oku linga vali ovopange Akristão, ovina o sukila konepe yespiritu vi suapo. (Mateo 5:3) Ndamupi? Omanu voluali va siata oku lipula vati: ‘Momo lie tu kasilili komuenyo?’ Ovo va sandiliya atambululo kapulilo atiamẽla kocimãho comuenyo. Omanu va kuete esukila liaco momo Yehova wa va lulika lonjongole yaco. Eye wa tu lulika lonjila yimue okuti tu sanga esanju koku u vumba. Ka kuli esanju lia velapo okuti eli li tunda koku kũlĩha okuti tu fendela Yehova locisola ci sule.—Osamo 63:1-5.

Kũlĩha okuti Yehova o yongola okuti ove o tiuka kokuaye. O ci kũlĩha ndati? Kũlĩhĩsa: Ombrochura yilo ya pongiyiwa lolohutililo vialua. Cilo o kuete ombrochura yaco omo pamue ukulu umue wekongelo ale manji ukuavo eye wa ku ĩha. Noke wa vetiyiwa oku yi tanga kuenda oku kapako esapulo liaco. Cosi eci, uvangi wokuti Yehova ka ku ivalele. Puãi, eye o kasi oku ku koka kokuaye.—Yoano 6:44.

Tu lembelekiwa poku kũlĩha okuti Yehova lalimue eteke a ivalako afendeli vaye va nyelela. Eci oco manji umue ukãi o tukuiwa Donna a sola. Eye wa popia hati: “Nda tinduka vocili kamue kamue, pole, noke nda sokolola olondaka vi sangiwa kelivulu Liosamo 139:23, 24, li popia ndoco: ‘Ñulĩhise, a Suku. Kũlĩha utima wange. Seteke. Kũlĩha ovisimĩlo viange, hu vanji nda ñasi lovituwa vievĩho. Songuile vonjila ka yi pui.’ Kuenje nda limbuka okuti sia tiamẽlele koluali, kuenda nda kũlĩha okuti ndi sukila oku tiamẽla kocisoko ca Yehova. Nda fetika oku limbuka okuti Yehova lalimue eteke a ka ndi yanduluka; nda sukilile lika oku sanda onjila yoku tiuka kokuaye. Kaliye nda sanjuka omo oco nda linga!”

Tu likutilila okuti ove o kuata vali “esanju lioku sanjukila Yehova.” (Nehemiya 8:10) Ove lalimue eteke o ka livela omo lioku tiuka ku Yehova.