Eci Yoano upapatisi a tẽlisa olosãi epandu kupange woku kunda, kotembo yaco Yesu okuti o kasi leci ci soka 30 kanyamo, enda kokuaye Kolui Yordão. Momo lie a endelako? Eye ka endeleleko oco a ka linge epasu, ale oku kũlĩhĩsa ndomo upange wa Yoano u kasi oku enda. Pole, Yesu enda ku Yoano oco o papatise.

Pole, Yoano ka tava kepingilo liaco, kuenje o popia hati: “Ove, ove o sesamẽla oku ndi papatisa, cilo iya kokuange?” (Mateo 3:14) Yoano o kuete esunga lioku popia ndoco. Momo wa kũlĩha okuti, Yesu Omõla olikasi wa Suku. Ivaluka okuti, Yoano wa lisenga lesanju vimo lia inaye Elisavete, eci Maria a va nyula osimbu a mina Yesu. Citava okuti, Elisavete eye wa lombolola ovina viaco ku Yoano. Pamue Yoano wa yeva ovina omanu va kala oku popia viatiamẽla kesapulo ungelo a eca lioku citiwa kua Yesu. Handi vali, citava okuti, wa yeva eci catiamẽla kovangelo va molẽha kovangombo vuteke Yesu a citiwa.

Yoano wa kũlĩha okuti, eye o papatisa lika omanu vana va likekembela akandu avo. Pole, Yesu ka kuete ekandu. Ndaño okuti, Yoano ka tava kepingilo liaco, pole, Yesu o popia laye hati: “Ci lingiwe, yilo oyo otembo yoku linga eci ca tu sungulukila.”—Mateo 3:15.

Momo lie Yesu a sukilile oku papatisiwa? Momo epapatiso lia Yesu ka lia lombolokele oku likekembela akandu. Pole, lia lombolokele okuti, eye o kasi oku lieca olumue koku linga ocipango ca Isiaye. (Va Heveru 10:5-7) Yesu wa kala kalupindelu, pole, ya pitĩlapo otembo yoku fetika upange woku kunda, una Isiaye wo kilu o tumĩle oku linga palo posi. Anga hẽ Yoano o lavoka okuti, ku molẽha cimue ca litepa poku papatisa Yesu?

Kũlĩhĩsa olondaka Yoano a popia noke viokuti: “Una wa numa oku papatisa lovava, wa ndi sapuila hati: ‘Wosi o mola okuti espiritu lio lokila loku u wila, eye una o papatisa lespiritu sandu.’” (Yoano 1:33) Kuenje Yoano wa kũlĩhĩle ale okuti, espiritu sandu lia laikele oku lokila komunu umue eye a papatisa. Omo liaco, citava okuti eci Yesu a tunda vovava Yoano ka komõhele poku “mola espiritu sandu lia Suku lia loka ndopomba kuenje lia wila [Yesu].”—Mateo 3:16.

Handi vali, vokuenda kuepapatiso lia Yesu, ‘ilu lio yulukila.’ Ovina viaco vi lomboloka nye? Vi lomboloka  okuti, osimbu Yesu a papatisiwa, wa ivaluka ekalo liomuenyo waye eci a kala kilu. Eye wa kala oku ivaluka omuenyo waye wespiritu kilu ndomõla a Yehova Suku kuenda ovina o longisa osimbu keyile palo posi.

Handi vali, vepuluvi liepapatiso lia Yesu, kilu kua tunda ondaka yimue ya linga yiti: “U Omõlange wa soliwa, ndo sanjukila.” (Mateo 3:17) Ondaka yaco yelie? Handakako ya Yesu, momo eye o kasi la Yoano. Pole, ondaka yaco ya Suku. Eci ci lekisa okuti, Yesu Omõla a Suku, pole, hayeko Suku.

Ocili okuti, Yesu letimba liositu wa tendiwile okuti omõla a Suku, ndeci ulume watete Adama. Ndonge Luka noke yoku lombolola epapatiso lia Yesu, wa soneha ndoco: “Eci Yesu a fetika upange waye woku kunda wa kuata 30 kanyamo, ndeci va simĩle okuti, omõla a Yosefe, omõla a Heli, . . . omõla a Daviti, . . . omõla a Avirahama, . . . omõla a Noha, . . . omõla a Adama, omõla a Suku.”—Luka 3:23-38.

Ndaño okuti Adama wa kala ukuetimba liositu, wa tukuiwa okuti “omõla a Suku,” ndeci ca kala Yesu. Yesu poku papatisiwa o fetika omuenyo wokaliye okuti, woku kala Omõla wa Suku wespiritu. Omo liaco, Yesu o kuete epondolo lioku longisa ocili ca Suku kuenda oku lekisa komanu onjila yi tuala komuenyo ko pui. Ovolandu a kuãimo atiamẽla komuenyo wa Yesu, a ka lombolola eci catiamẽla ku Yesu wa eca omuenyo waye ndocilumba coku yovola omanu vakuakandu.