Yesu noke yoku pita 40 koloneke a kala vekalasoko kuenda osimbu handi ka endele ko Galilea, o sandiliya Yoano, una wo papatisa. Eci Yoano a mola okuti, Yesu o kasi oku iya, o sapuila omanu va kalapo hati: “Kameme ka Suku, una upa akandu oluali, yo! Eye una nda popele siti: ‘Konyima yange ku iya ulume wa livanga, momo eye tete wa kala komuenyo.’” (Yoano 1:29, 30) Ndaño okuti, Yoano eye ukulupo wa Yesu, pole wa kũlĩhĩle okuti osimbu handi eye ka citiwile, Yesu wa kala ale kilu letimba liespiritu.

Noke yoku pita olosemana vimue osimbu Yesu ka papatisiwile, citava okuti Yoano wa kala latatahãi nda Yesu eye muẽle wa laikele oku kala Mesiya. Eye wa popia hati: “Puãi ndaño sio kũlĩhĩle, esunga lieci ndeyilila oku papatisa lovava lieli okuti, eye o situluiwa ku va Isareli.”—Yoano 1:31.

Omo liaco, Yoano o lomboluila kolonjeveleli viaye ovina via pita eci a papatisa Yesu poku popia hati: “Nda mola espiritu sandu lia loka kilu ndopomba kuenje lio wila. Ndaño sio kũlĩhĩle, pole Una wa numa oku papatisa lovava, wa ndi sapuila hati: ‘Wosi o mola okuti espiritu lio lokila loku u wila, eye una o papatisa lespiritu sandu.’ Kuenje nda ci mola yu nda imba uvangi wokuti u Omõla wa Suku.”—Yoano 1:32-34.

Keteke likuavo osimbu Yoano a kasi lolondonge viaye vivali, Yesu o pitĩla. Kuenje Yoano o popia hati: “Kameme ka Suku, yo!” (Yoano 1:36) Noke olondonge vivali via Yoano Upapatisi, vi kuama Yesu. Umue pokati kolondonge viaco Andereu. Ukuavo o tukuiwavo hati Yoano, citava okuti eye wa soneha ovolandu a-a. Omo okuti, Yoano omõla a Salome, citava okuti wa kala epalume lia Yesu. Handi vali, citava okuti Salome manji a Maria kuenda ulume waye Sebedeo.

Eci Yesu a vanja konyima wa mola okuti Andereu kumue la Yoano va kala oku u kuama, yu wa va pula hati: “Nye vu sanda?”

Ovo vo pula vati: “A Rambei, pi [wa] sikĩla?”

Yesu wa va tambulula hati: “Enjui, oco vu tale.”—Yoano 1:37-39.

Ca kala kelivala lia kuãla kekumbi. Andereu la Yoano va kala la Yesu toke kesulilo lieteke liaco. Andereu o sanjuka calua kuenda vepuluvi limue o sandiliya manjaye Simono o tukuiwavo Petulu kuenje u sapuila hati: “Tua sanga Mesiya.” (Yoano 1:41) Noke Andereu ambata Petulu toke ku Yesu. Ovolandu a kuãimo a lombolola okuti, Yoano wa sandiliyavo manjaye Tiago kuenje wo ambata toke ku Yesu. Pole, Yoano ka lombolola ulandu waco poku soneha eci catiamẽla kovina via pita.

Keteke lia kuamamo, Yesu o sanga Filipu wo ko Betesaita. Imbo liaco, lia kala ocipepi lo  konano Yokalunga ko Galilea kuenda Andereu la Petulu omo va citiwila. Yesu o laleka Filipu hati: “Linga ondonge yange.”—Yoano 1:43.

Kuenje Filipu o sanga Nataneli, o tukuiwavo hati Bartolomeu kuenje u sapuila hati: “Tua sanga una Mose kuenda Ovihandeleko Lovaprofeto va sonehele okuti: Yesu omõla a Yosefe u Nasara.” Nataneli ka tava kolondaka viaco kuenje o sapuila Filipu hati: “Ko Nasara hẽ ku tunda cimue ciwa?”

Filipu u laleka hati: “Enju, ndo tale.” Yesu o mola okuti Nataneli o kasi oku iya kokuaye kuenje u sapuila hati: “Tala, u Isareli wocili okuti kokuaye ka kuli elimbi.”

Nataneli o pula hati: “Wa ñulĩha ndati?”

Yesu o tambulula hati: “Osimbu Filipu ka ku kovongele eci wa kala vemehi liuti ukuyu, nda ku mola.”

Nataneli o komõha kuenje o popia hati: “A Rambei, ove Vumõla a Suku, haive vu Soma ya Isareli.”

Yesu o tambulula hati: “Wa ci kolela omo nda ku sapuila okuti nda ku mola vemehi liuti ukuyu? O ka mola ovina via velapo okuti evi vi sule.” Kuenje Yesu o va likuminya hati: “Ocili ndu sapuili siti vu mola ilu lia yuluka kuenda ovangelo va Suku va londa loku loka ku Mõlomunu.”—Yoano 1:45-51.

Noke yovina evi, Yesu lolondonge viaye viokaliye, va tunda Kocimbota co Yordão kuenje va enda ko Galilea.