Kua pita ale oloneke vitatu tunde eci Nataneli a linga umue pokati kolondonge viatete via Yesu. Yesu kumue lolondonge vimue viatete, va linga ungende oku enda kimbo lio Galilea kuna olondonge viaco via citiwila. Ovo va kasi oku enda ko Kana kuna kua citiwila Nataneli. O Kana ka sangiwa kimbo liolomunda, konano yo Nasara olupale Yesu a kulila. Ovo va lalekiwa kocipito cimue cuvala ko Kana.

Ina ya Yesu o kasivo kocipito caco. Omo okuti, Maria ekamba liepata liolohueli, eye o kasi oku kuatisa kocipito caco. Noke eye o limbuka okuti kua kamba ocina cimue coku eca komanu va kasi kocipito. Omo liaco, Maria o sapuila Yesu hati: “Ovo ka va kuete ovinyu.”—Yoano 2:3.

Maria o pinga ku Yesu oco a tetulule ocitangi caco catiamẽla kovinyu. Yesu o sapuila Maria vupopi wocindekaise hati: ‘Okãi, o kuete nye lame?’ (Yoano 2:4) Omo okuti, Yesu eye Osoma ya nõliwa la Suku, Isiaye kilu Yehova, eye lika o pondola oku u sapuila eci a sukila oku linga, pole, epata kuenda akamba havoko. Omo liaco, Maria o lekisa olondunge poku ecelela okuti omõlaye o tetulula ocitangi caco, kuenje o sapuila omanu va kasi oku ava hati: “Cosi eye a ku sapuili, ci lingi.”—Yoano 2:5.

Kuli asanga epandu ovawe oku kapa ovava, vesanga lesanga mu iñila eci ci soka 40 kalitulu. Yesu o sapuila omanu va kasi oku ava hati: “Yukisi asanga lovava.” Noke Yesu o va sapuila hati: “Suiko tumue, ka tu tuali kusongui wocipito cuvala.”—Yoano 2:7, 8.

Usongui wocipito o komõha omo liovinyu yiwa, pole, ka kũlĩhĩle okuti ya pangiwa locikomo. Eye o vilikiya sandombua, kuenje u sapuila hati: “Omunu ukuavo tete eca ovinyu yiwa, noke eci omanu va kolua oco a eca eyi hayiwako. Pole, ove wa seleka ovinyu yiwa toke cilo.”—Yoano 2:10.

Eci oco ocikomo catete Yesu a linga. Olondonge viaye viokaliye poku mola ocikomo caco, ekolelo liavo ku Yesu lia pamisiwa. Noke Yesu la inaye kuenda vamanjaye, va enda volupale luo Kafarinau konano Yokalunga ko Galilea.