Noke liuvala ko Kana, Yesu o linga ungende woku enda ko Kafarinau. Inaye kuenda vamanjaye okuti Tiago, Yosefe, Simono, kuenda Yuda, va enda kumosi laye.

Momo lie Yesu a endela ko Kafarinau? Momo lua tungiwa lonjila yimue ya leluka oku pitĩla volupale luaco haluo lunene okuti, o Nasara kuenda o Kana a sule. Handi vali, valua pokati kolondonge viokaliye via Yesu, vi sangiwa vo Kafarinau ale ocipepi limbo liaco. Kuenje eci cecelela okuti, Yesu o va pindisila vimbo va citiwila.

Osimbu Yesu a kasi vo Kafarinau, o linga ovina vialua vi komõhisa. Kuenje omanu valua va sangiwa volupale luaco kuenda vovaimbo a lisungue, va yeva ovina vi kasi oku lingiwa. Pole, noke Yesu kumue lolondonge viaye okuti alume va Yudea, va enda ko Yerusalãi oco va ka linge ocipito co Paskoa yunyamo 30 K.K.

Osimbu va kasi vonembele vo Yerusalãi, olondonge vi limbuka ocina cimue ci komõhisa catiamẽla ku Yesu okuti, lalimue eteke va ci muile.

Ocihandeleko ca Suku ca kisikile okuti, va Isareli va lumba ovinyama vonembele kuenda akombe va sukila eci va lia osimbu va kasi volupale. Kuenje Ocihandeleko ci ecelela okuti, ava va linga ungende toke ko Yerusalãi va nena olombongo oco va lande ‘olongombe, olomeme, lolohombo,’ kuenda ovina vikuavo okuti, va talavaya lavio osimbu va kala volupale. (Esinumuĩlo 14:24-26) Omo liaco, vakuakulinga olomĩlu vo Yerusalãi, va landisa ovinyama kuenda olonjila vocitali cimue kosamua yonembele. Pole, vamue va nyana omanu poku va pinga ondando ya tĩla.

Loku tema kualua, Yesu o sandola ovingangu violombongo, o kupula olomesa viavo kuenda o tundisa vosi vakuakulinga olomĩlu. Noke o popia hati: “Upi ovina evi palo! Liwekipo oku linga onjo ya Isiange onjo yomĩlu!”—Yoano 2:16.

Eci olondonge via Yesu vi mola ovina viaco, vi ivaluka ocitumasuku catiamẽla Komõla wa Suku cokuti: “Ombili yonjo yove yi ndia.” Pole va Yudea va pula vati: “Omo o kasi oku linga ovina evi, ondimbukiso yipi o tu lekisa? Yesu o va tambulula hati: “Nyõli onembele eyi kuenje ndi yi tumbulula voloneke vitatu.”—Yoano 2:17-19; Osamo 69:9.

Va Yudea va sima okuti, Yesu o kasi oku vangula eci catiamẽla konembele yi letiwe. Omo liaco, va pula vati: “Onembele eyi ya tungiwa vokuenda kuanyamo a soka 46 kuenda ove o yi tumbulula voloneke vitatu?” (Yoano 2:20) Pole, onembele Yesu a kasi oku tukula yi lomboloka etimba liaye. Noke yanyamo atatu, olondonge vi ivaluka olondaka evi eci Yesu a pinduiwa.