Yosefe o pasula Maria oco a ece kokuaye esapulo limue lionjanga. Ungelo wa Yehova wa molẽha ku Yosefe vonjoi kuenje wo sapuila hati: “Votoka, ambata okamõla la inaco kuendi Kegito, oko vu kala toke eci ndu sapuili cimue, momo Herode o kasi oku sandiliya okamõla oco a ka ponde.”—Mateo 2:13.

Yosefe la Maria kumue lomõla wavo, va tila lonjanga vokuenda kuteke. Ovo va ci linga vepuluvi lia sunguluka, momo Herode wa limbuka okuti vakuakukũlĩhĩsa olombungululu, ka va tẽlisile ovina a va tumile. Ovo va tunda vofeka, pole, ka va sapuilile Herode ocitumãlo Yesu a kala. Omo liaco, ca temisa calua Herode. Oco a ponde Yesu, eye wa eca ocihandeleko cokuti, omãla vosi valume va kuete anyamo avali ale vana okuti ka va tẽlisile anyamo aco, okuti va kasi vo Beteleme, va pondiwa. Eye wa tukula anyamo aco, omo liovina via popiwa la vakuakukũlĩhĩsa olombungululu va tundile Kutundilo.

Oku pondiwa kuomãla vosi valume ocina cimue cĩvi! Ka tua kũlĩhĩle etendelo liomãla valume va pondiwa, pole, oku lila loku lisiõsiõla kuolonjali viaco, kua tẽlisa ocitumasuku cuprofeto wa Suku okuti, Yeremiya.—Yeremiya 31:15.

Kotembo yaco, Yosefe kumue lepata liaye va tilila Kegito kuenje oko va kala. Noke ungelo wa Yehova wa molẽha vali ku Yosefe vonjoi kuteke umue. Kuenje wa popia laye hati: “Votoka, ambata okamõla la inaco, [kuende] kofeka yo Isareli, momo u wa kala oku sanda omuenyo wokamõla, wa fa.” (Mateo 2:20) Omo liaco, Yosefe kumue lepata liaye, cilo va nõlapo oku tiukila kofeka yavo. Kuenje kua tẽlisiwa ocitumasuku cikuavo Cembimbiliya ci popia hati: Omõla a Suku upiwa Kegito.—Hosea 11:1.

Citava okuti, Yosefe o yongola oku kala lepata  liaye ko Yudea okuti, ocipepi lolupale luo Beteleme, muna va kala osimbu ka va tilile Kegito. Pole, o yeva okuti, ongangala Arkelau omõla a Herode, eye o kasi oku viala vo Yudea. Vonjoi yikuavo Suku wa lungula Yosefe catiamẽla kocitangi ca laikele oku pita. Kuenje Yosefe kumue lepata liaye, va linga ungende woku enda konano yolupale luo Nasara kimbo lio Galilea okuti, ocipãla loku va Yudea va enda oku fendelela. Omo liaco, Yesu wa kulila vimbo liaco kuenje kua tẽlisiwa ocitumasuku cikuavo ci popia citi: “Eye o ka tukuiwa okuti u Nasara.”—Mateo 2:23.