Eci Yesu a kala palo posi ndomunu wa lipua, ka liyakele lovitangi vialua kuenda asakalalo ndevi via siata komanu. Pole, lopo wa lekisa ohenda yalua komanu. Eye wa lekisa onjongole yoku va kuatisa kovina viosi, oku kongelamo vina vi molẽha ndu okuti ka vi kuete esilivilo. Ocili okuti, ohenda yo vetiya oku kuatisa vakuavo. Tala ovolandu a sangiwa Kovipama 32, 37, 57, 99.

Omanu vakuanyamo a litepa ndeci, amalẽhe kuenda akulu, ka va kuatele ohele yoku enda ku Yesu omo ka lekisile okuti ka kuete otembo ale oku li tenda okuti wa velapo calua. Omanu omo lioku limbuka okuti va kapiwako laye, ovo va lianjele kovaso aye. Tala ovolandu aco Kovipama 25, 27, 95.

Yesu wa enda oku likutilila lutima wosi, ci kale lika liaye, ale lafendeli vocili. Wa enda oku likutilila kapuluvi alua, okuti ka ci lingile lika poku lia. Wa siatele oku likutilila ku Isiaye oco o pandule, oku u sivaya kuenda oku pinga olonumbi, osimbu ka nõlele onjila yimue ya velapo a sukila oku kuama. Tala ovolandu a sangiwa Kovipama 24, 34, 91, 122, 123.

Ndaño okuti Yesu pamue wa sukilile oku puyukapo, wa pitisile kovaso olonjongole viomanu vakuavo okuti, viaye vi sule. Ka kuatele ocituwa coku likapako okuti eye “tete.” Kuenje wa sia ongangu tu pondola oku kuama. Konomuisa ovolandu aco Kovipama 19, 41, 52.

Yesu wa linga ovina vialua okuti, oku longisa lika catiamẽla koku ecela ci sule. Eye wa lekisa ocituwa caco poku tata ciwa olondonge viaye kuenda omanu vakuavo. Sokolola kovolandu a sangiwa Kovipama 26, 40, 64, 85, 131.

Ca popiwile ale okuti va Yudea valua va laikele oku likala Mesiya kuenda ovanyãli vaye va ko ponda. Lolondaka evi, Yesu nda ka sukilile oku likolisilako oku lingila ovina vialua omanu. Pole, eye wa lekisa ombili kefendelo liocili. Ombili a lekisa ya linga ongangu kolondonge viaye viosi vi laika oku liyaka lekambo lionjongole yomanu ka va tava kolondaka viwa kuenda kelambalalo. Tala Ovipama 16, 72, 103.

Yesu wa velelepo omanu ka va lipuile volonepa vialua, ndeci: kukũlĩhĩso kuenda kolondunge. Ocili okuti oku lipua kuaye kua enda oku u kuatisa oku loñoloha ketimba kuenda kovisimĩlo okuti omanu vakuavo ci sule. Ndaño ndoco, wa lekisa umbombe poku kuatisa vakuavo. Tala ovolandu aco Kovipama 10, 62, 66, 94, 116.

Eci ovapostolo lomanu vakuavo va enda oku liwekapo oku setukula Yesu, ale oku siapo oku kapako alungulo aye, eye olonjanja viosi wa lekisa epandi kokuavo. Yesu wa enda oku pitulula alongiso ovo va sukilile oco va kuate ukamba la Yehova. Sokolola ndomo Yesu a lekisa epandi, Kovipama 74, 98, 118, 135.