Owiñi walua, u liongoluila ocipepi la Yesu vofeka yo Dekapoli kutundilo Wokalunga ko Galilea. Ovo veya oco va yevelele Yesu loku sakuiwa kuenda va nena akualu anene a kuete okulia.

Noke yotembo yimue, Yesu o sapuila olondonge viaye hati: “Ñuetele ohenda owiñi, momo va kasi ale lame oloneke vitatu, pole, ka va kuete lacimue coku lia. Nda nda va tuma onjala kolonjo viavo, va ambukila vonjila, momo vamue pokati kavo va tunda kupãla.” Kuenje olondonge vi pula viti: “Kocitumãlo kulo kupãla pãla, pi omunu opa olombolo vi tẽla oku tekula omanu ava?”—Marko 8:2-4.

Yesu o popia hati: “Olombolo viñami vu kuete?” Olondonge vi tambulula viti: “Tu kuete epanduvali kolombolo kuenda otulõsi tumue.” (Mateo 15:34) Omo liaco, Yesu o pinga oco owiñi u tumãle posi. Eye o tikula olombolo kuenda olõsi, eca olopandu ku Suku kuenje o vieca kolondonge oco va vi avele owiñi. Vosi va lia kuenje vekuta. Ovimuanyuila via supapo viongoluiwa kuenje via tẽla epanduvali kakualu anene eyuka. Vepuluvi liaco, ava va lia va soka 4.000 kalume okuti, akãi kuenda omãla ka va tendiwile!

Yesu noke yoku usika owiñi, eye kumue lolondonge viaye va londa vowato kuenje va enda vimbo lio Magadana kutakelo Wokalunga ko Galilea. Kocitumãlo caco, va Fariseo kumue la va Sadukeo, va seteka Yesu loku pinga kokuaye ondimbukiso yi tunda kilu.

Yesu poku limbuka ovisimĩlo viavo, o tambulula hati: “Koñolosi vu popia hoti, ‘ku kala otembo yiwa, momo kilu kua kusuka,’ komẽle hoti, ‘kutalala, ombela etaili yi loka, momo kilu kua kusuka kuenda kua uvala.’ Ene vu tẽla oku limbuka ndomo kilu ku kasi, pole, ka vu tẽla oku limbuka ondimbukiso yolotembo.” (Mateo 16:2, 3) Omo liaco, Yesu o sapuila va Fariseo la va Sadukeo okuti ka ku eciwa ondimbukiso layimue, te lika ondimbukiso ya Yona.

Yesu kumue lolondonge viaye, va iñila vowato kuenje va enda konano Yokalunga ko Betesaita. Osimbu va kala oku linga ungende, olondonge vi limbuka okuti ka viambatele olombolo. Ovo va kuete lika ombolo yimosi. Yesu poku ivaluka ombangulo a kuata la va Fariseo kuenda va Sadukeo okuti oloñuatisi via Herode, o lungula olondonge viaye hati: “Lavululi; lunguki letumbisa lia va Fariseo kuenda etumbisa lia Herode.” Olondonge vi sima okuti Yesu o kasi oku popia eci catiamẽla kolombolo va ivala oku ambata. Eye o limbuka okuti ka ca va lombolokele ciwa kuenje o popia hati: “Momo lie vu lihoyisila pokati omo ka vu kuete olombolo?”—Marko 8:15-17.

Tunde eci Yesu a linga ocikomo coku tekula omanu valua, ka pa pitile otembo yalua. Eli olio esunga lieci olondonge vi sukilila oku kũlĩha okuti Yesu ka sakalalele omo liolombolo ka va kuete. Omo liaco, Yesu o va pula hati: “Ene ka vu ivaluka  eci nda avela olombolo kueci ci soka 5.000 kalume, akualu añami ovimuanyuila wongololi?” Ovo vo tambulula vati: ‘Ekũi la vivali.’ Yesu amisako hati: “Eci nda avela olombolo epanduvali kueci ci soka 4.000 kalume, akualu añami ovimuanyuila wongololi?” Ovo vo tambulula vali vati: “Epanduvali.”—Marko 8:18-20.

Kuenje Yesu o pula hati: “Ndamupi ka wa limbukili okuti sia kale oku vangula catiamẽla kolombolo?” Eye amisako loku popia hati: “Lunguki letumbisa lia va Fariseo la va Sadukeo.”—Mateo 16:11.

Kaliye olondonge vi kuata elomboloko liovina Yesu a yongola oku popia. Etumbisa lia siata oku kapiwa kosema ya tamiwa ale kombolo oco yi tumbe. Yesu o sokisa etumbisa ndocindekaise cevĩho. Eye o kasi oku lungula olondonge viaye oco vi lunguke ‘lalongiso a va Fariseo la va Sadukeo,’ vana va kuete ocituwa coku yapuisa omanu.—Mateo 16:12.