Eci Yesu a limbuka okuti va Fariseo la vakuacitundo ca Herode va yongola oku u ponda, eye kumue lolondonge viaye va enda toke Kokalunga ko Galilea. Omanu vo kolonepa vialua va enda toke ku Yesu. Omanu va tunda ko Galilea, kalupale o Turo a sangiwa konele yokalunga, ko Sidono, kutundilo Yolui Yordão, ko Yerusalãi kuenda kombuelo yo Indumea. Yesu o sakula omanu valua. Omo liaco, omanu vana va kuete ovovei ka a kuete esaku va likolisilako oku amela kokuaye oco eye a va lambe. Ovo ka va tẽla vali oku talamẽla kuenje va yayulako oku amẽla kokuaye oco vo lambe.—Marko 3:9, 10.

Omo okuti owiñi wa luile, Yesu o sapuila kolondonge viaye oco vi pongiye owato umue utito okuti, o kala ocinãla cimue longongo kuenda lowiñi wo ñuala. Vowato a kala, ca ecelela okuti o longisa omanu, ale enda kocitumãlo cikuavo oco a ka kuatise omanu vakuavo.

Ndonge Mateo wa lombolola okuti ovopange a Yesu a tẽlisa “olondaka viuprofeto Isaya.” (Mateo 12:17) Ocitumasuku cipi Yesu a tẽlisa?

“Tala! Ukuenje wange nda nõla, wa soliwa, haeye nda sanjukila! Ndu wĩha espiritu liange kuenda o ka lekisa kolofeka eci ci lomboloka esunga. Eye ka ka hoya, ndaño oku kaluka, lomue o ka yeva ondaka yaye volokololo. Eye ka ka teya oluneva lua penga, ale oku ima ondiyelo yi tuima, toke eci esunga li yula. Olofeka vi kuata elavoko vonduko yaye.”—Mateo 12:18-21; Isaya 42:1-4.

Ocili okuti, Yesu eye ukuenje wa soliwa haeye Suku a nõla. Eye o situlula eci ci lomboloka esunga liocili, lina li kasi oku pengisiwa loviholo lialongiso esanda. Omo okuti va Fariseo va enda oku kuama Ocihandeleko ca Suku lonjila yavo muẽle, va linga ovina ka via sungulukile kuenda ka va kuatisa omunu o vela keteke Liesambata. Yesu poku lombolola eci ci lomboloka esunga lia Suku, kuenda oku lekisa okuti espiritu lia Suku li kasi laye, eye o leluisa ocilemo comanu koviholo ka via sungulukile. Eli olio esunga lieci asongui vetavo va yonguila oku u ponda. Ocili okuti, ca kala ocituwa cimue ka ca sungulukile!

Olondaka viokuti, “eye ka ka hoya, ndaño oku kaluka, lomue o ka yeva ondaka yaye volokololo” vi lomboloka nye? Eci Yesu a sakula omanu, ka ecelela okuti omanu vaco ale olondele vo situlula pamue oku ‘ci sapuila komanu vakuavo.’  (Marko 3:12) Eye ka yongola okuti omanu va popia volokololo eci catiamẽla kovina a linga. Handi vali, ka yongola okuti omanu va sandeka asapulo ka a sungulukile atiamẽla kokuaye.

Yesu o kunda esapulo li lembeleka komanu vana va kasi ndoluneva lua penga okuti, lua ketikiwa pokati kuenda lu kasi oku teka. Ovo va kasi ndondiyelo yi tuima okuti, ndopo yima. Yesu ka teya oluneva lua penga ale oku ecelela okuti ondiyelo yi kasi oku tuima, ima. Pole, eye o lembeleka vakuesunga locisola kuenda ohenda. Omo liaco, Yesu eye elavoko liomanu vosi!