Ovapostolo 12 va sanjuka omo lioku kundila vimbo liosi lio Galilea kuenje va lomboluila Yesu “ovina viosi ovo va linga leci va longisa.” Pole, ovo va kava kuenda ka va kuete otembo yoku lia, momo omanu valua va kasi oku iya kokuavo. Omo liaco, Yesu o va sapuila hati: “Enjui, tuendi pocitumãlo cimue culika oco tu puyukipo kamue.”—Marko 6:30, 31.

Ovo va iñila vowato, citava okuti ocipepi lo Kafarinau kuenje va enda kocitumãlo cimue ci kasi ocinãla lutundilo Wolui Yordão, kesinya likuavo lio Betesaita. Omanu valua, va mola eci ovo va tunda, pole, vakuavo va yeva lika esapulo liaco. Omo liaco, vosi va lupukila kohulo yolui kuenje va pitĩla tete kocitumãlo caco.

Eci Yesu a loka vowato o mola owiñi walua kuenje o va kuatela ohenda, momo va kasi ndolomeme ka vi kuete ungombo. Omo liaco, o fetika “oku va longisa ovina vialua” viatiamẽla Kusoma. (Marko 6:34) Yesu o sakulavo ‘ava va vela.’ (Luka 9:11) Noke olondonge viu sapuila viti: “Ocitumãlo cilo ocipãla kuenda ekumbi lia enda, tuma omanu oku enda kovaimbo oco ovo muẽle va ka lande okulia.”—Mateo 14:15.

Yesu o va tambulula hati: “Ka va ka ende; ene vu va ĩha eci va lia.” (Mateo 14:16) Ndaño okuti Yesu wa kũlĩha ale ovina a laika oku linga, pole, o seteka Filipu poku u pula hati: “Pi tu landa olombolo oco omanu va lie?” Ocili okuti Filipu eye lika o sesamẽla oku puliwa, momo onjo yaye ya kala ocipepi lo Betesaita. Pole, oku landa olombolo ka ci tetulula ocitangi va kasi laco, momo kuli eci ci soka 5.000 kalume. Etendelo liaco liosi oku kongelamo omãla kumue lakãi, citava okuti li tendiwa olonjanja vivali! Omo liaco, Filipu o tambulula hati: “Olombolo viovita vivali kolodenariu [odenariu yimosi ofeto yeteke limosi liupange] ka vi tẽla okuti omunu lomunu o tambula kamue.”—Yoano 6:5-7.

Citava okuti oco Andereu a lekise okuti ka ci tẽliwa oku tekula omanu vosi, o popia hati: “Palo pali kakuenje umue o kuete olombolo vitãlo viosevata lotulõsi tuvali. Vi tẽla hẽ nye kowiñi owu ndeti?”—Yoano 6:9.

Otembo yonjovo, o Paskoa yunyamo 32 K.K., ka ya pongiyiwile kuenda ovikũla kolomunda handi vi talala. Yesu o pinga kolondonge viaye oco vi sapuile omanu oku tumãla kowangu vovimunga vi soka 50 kuenda 100. Noke o kuata olombolo vitãlo lolõsi vivali kuenje o linga ohutililo yolopandu ku Suku. Yesu o timbula olombolo viaco kuenda olõsi, kuenje o vi eca kolondonge oco va vi avele komanu. Kuenje omanu vosi va lia toke vekuta!

Noke Yesu o sapuila olondonge viaye hati: “Ongololi ovimuanyuila via supapo, okuti lacimue ci peseka.” (Yoano 6:12) Ovo va tẽla oku yukisa eci ci soka 12 kakualu eyuka ovimuanyuila via supapo!