Eci Yesu, Petulu, Tiago kuenda Yoano va loka komunda va sanga owiñi walua. Kuli ocitangi cimue. Vakuavisonehua va liongoluila kovaso yolondonge kuenje va fetika oku lihoyisa lavo. Omanu va sanjuka poku mola Yesu kuenje va lupukila kokuaye oco vo lame. Eye o pula hati: ‘Nye vu kasi oku lihoya lavo?’—Marko 9:16.

Ulume umue o kekamela Yesu kuenje o lombolola hati: “Olongisi, nda nena omõlange kokuove, momo o kuetiwe londele yu tateka oku vangula. Kuenje eci ondele yu kuata, yu wimba posi, vomela mu tunda efelefele, o likeleketa ovayo kuenda ka kuata ongusu. Nda pinga kolondonge viove oco va tundise ondele yaco, pole, ka va tẽlele oku ci linga.”—Marko 9:17, 18.

Citava okuti, vakuavisonehua va kala oku pisa olondonge omo okuti ka via tẽlele oku sakula ukuenje kuenda citavavo okuti va kala oku sepula alikolisilo avo. Kuenje Yesu ka tambulula lonjanga isia yukuenje waco o kasi lesakalalo, pole, o sapuila owiñi hati: “Acitumbulukila ca kamba ekolelo haico ca vĩha, toke otembo yipi ñala lene? Toke pi ndi pandikisa lene?” Ocili okuti olondaka evi vi tiamisiwila ku vakuavisonehua va kala oku kokela ovitangi kolondonge via Yesu osimbu ka kasi pokati kavo. Noke, Yesu o sapuila ku isia o kasi lesakalalo hati: “U neni kokuange.”—Mateo 17:17.

Eci ukuenje amela ku Yesu, ondele yu wimba posi kuenje yi fetika oku u tanyisa. Ukuenje o fetika oku tiñoloha loku tunda efelefele vomela. Yesu o pula isiaco hati: “Eye o kasi laco tunde otembo yipi?” Isia o tambulula hati: “Tunde vutila, pamue yu wimba vondalu ale vovava, [olonjanja vialua] oco yu ponde.” Eye o livondela Yesu hati: “Nda wa panga, tu kuatele ohenda kuenda tu kuatise.”—Marko 9:21, 22.

 Isia yomõla ka kuata vali ekolelo, momo olondonge via Yesu ka via tẽlele oku u kuatisa. Yesu poku tambulula ulume waco, eca kokuaye elavoko li lembeleka poku u sapuila hati: “Wa popia hoti, ‘Nda wa panga’! Ku una o kuete ekolelo ovina viosi vi tẽliwa.” Vepuluvi liaco isia yomõla o livondela Yesu hati: “Ñuete ekolelo! Nda nda kamba ekolelo ñuatise!”—Marko 9:23, 24.

Yesu o limbuka okuti owiñi u kasi oku amela kokuaye. Omo liaco, o handeleka ondele kovaso omanu vosi va kalapo poku popia hati: “A ndele yi lingisa omunu ocitende loku kuata ocitangi coku vangula, hu handeleka siti, tunda vokuaye kuenda ku ka iñile vali vokuaye!” Ondele poku tunda yi lingisa okuti ukuenje o kaluka kuenda o tanya. Pole, cilo ukuenje wa pekela posi kuenda ka tẽla oku li senga. Omanu vamue poku ci mola va popia vati: “Eye wa fa!” (Marko 9:25, 26) Pole, eci Yesu a kuata vokuokuo kukuenje waco, eye o votoka kuenje “kowola yaco haico a kaya.” (Mateo 17:18) Ka tu kuete atatahãi lieci omanu va komõhela omo liovina Yesu a linga.

Vepuluvi limue lia pita eci Yesu a tuma olondonge kupange woku kunda, ovo va tẽla oku tundisa olondele. Omo liaco, osimbu va kasi vonjo yimue lika liavo, va pula Yesu vati: “Momo lie ka tua tẽlelele oku yi tundisa?” Yesu o va lomboluila okuti ka va ci tẽlele omo ka va lekisile ekolelo poku popia hati: “Ondele eyi yi tunda lika lohutililo.” (Marko 9:28, 29) Ca sukilile oku kuata ekolelo lia pama loku likutilila ku Suku, oco ondele yi kuete unene yi tundisiwe.

Yesu o malusula lolondaka viokuti: “Ocili, ndu sapuili siti: Nda wa kuateli ekolelo ndolumema wulemba, nda vu popia lomunda eyi, ‘Tunda palo sondolokela oko’ kuenda oyo yi sondoloka kuenje vu ka tẽla oku linga ovina viosi.” (Mateo 17:20) Ocili okuti, ekolelo li kuete unene walua!

Ovitangi vina vi tu tateka oku amamako oku linga upange wa Yehova, vi pondola oku mõleha ndu okuti ka vi yuliwa kuenje ovitangi viaco vi pondola oku kala ndomunda okuti ka yi tava oku yi sondolola. Pole, nda tua lekisa ekolelo lia pama tu ka yula ovitangi viosi tua siata oku liyaka lavio.