Omanu vo ko Nasara noke yoku seteka oku ponda Yesu, eye enda ko Kafarinau ocipepi Lokalunga ko Galilea ka tukuiwavo okuti, ‘ociva co Genesarete.’ (Luka 5:1) Eci ci tẽlisa ocitumasuku ca Isaya cokuti, vana va kasi ko Galilea konẽle yokalunga va mõla ocinyi ca piãla.—Isaya 9:1, 2.

Cilo vo Galilea, Yesu amamako oku kunda okuti, “Usoma wo kilu u kasi ocipepi.” (Mateo 4:17) Yesu o sanga olondonge viaye vikuãla. Ovo va lingile ale ungende kumue la Yesu, pole, eci va tiuka vo Yudea va tiukila kupange wavo woku pipa olõsi. (Yoano 1:35-42) Pole, otembo yoku amamako oku kuama Yesu ya pitĩla, oco a va pindise okuti noke vamamako lupange woku kunda eci eye a enda.

Osimbu Yesu a kala oku endela kohulo yokalunga, o mola Simono Petulu la manjaye Andereu kuenda vamue pokati kakamba vavo okuti, va kasi oku tonga owanda. Yesu enda toke kokuavo, o londa vowato wa Petulu kuenje o pinga oco owato wamele naito vovava. Noke yocinãla cimue, Yesu o tumãla kuenje o fetika oku longisa omanu va kala kohulo yokalunga ocili catiamẽla Kusoma.

Noke Yesu o sapuila Petulu hati: “Kuende apa pa longa kuenda lowisi awanda ene oco vu kuati olõsi.” Petulu o kumbulula hati: “Olongisi, tua talavaya uteke wosi kuenda ka tua kuatele lacimue, pole omo liondaka yove tu lowisa awanda.”—Luka 5:4, 5.

Ovo va lowisa awanda kuenje va kuata olõsi vialua okuti awanda aco a fetika oku toka! Omo liaco, lonjanga yalua va kovonga vana va kala vowato ukuavo oco veye va va kuatise. Kuenje awato aco avali eyuka olõsi okuti, a fetika oku vomba. Petulu eci a ci mola wa kekamẽla Yesu loku popia hati, “A Ñala nunde, momo ndukuakandu.” Pole, Yesu o tambulula Petulu hati: “Ku ka yokoke. Oku upisa cilo, o linga enyanga liomanu.”—Luka 5:8, 10.

Yesu o sapuila Petulu la Andereu hati: “Ñuami, ndu lingisi anyanga vomanu.” (Mateo 4:19) Eye o kovonga vali anyanga vavali volõsi okuti, Tiago la manjaye Yoano omãla va Sebedeo. Ovo va tavavo lonjanga kelaleko liaco. Omo liaco, alume ava vakuãla va siapo upange wavo woku pipa olõsi kuenje viamamako oku kala olondonge viatete via Yesu.