Filemone 1:1-25
1 Ame ndi Paulu, haime ndimandekua mekonda lia Kristu Yesu kuenda manjetu Timoteo, tu sonehela Filemone, ekamba lietu liupange wa soliwa,
2 kuenda Afia manjetu ukãi, la Arkipo okuti asualali kumue letu kuenda kekongelo li kasi konjo yaye:
3 Ohenda ya piãla lombembua yi tunda ku Suku Isietu kuenda ku Ñala Yesu Kristu yi kale lene.
4 Sia la liwekapo oku pandula Suku eci ndu ku tukula volohutililo viange,
5 eci ndi yeva ekolelo liove locisola o kuetele Ñala Yesu kuenda olosandu viosi.
6 Ndi likutilila okuti ekolelo wa lekisi, liu kuatisi oku kũlĩha ovina viosi viwa tu kuete omo lia Kristu.
7 Ñuete esanju lialua kuenda ci ndembeleka oku yeva ocisola cove, momo ovitima* violosandu via pamisiwa mekonda liove wumanji.
8 Omo liaco, ñuete utõi woku vanguila vu Kristu loku ku handeleka oco o linge eci ca sunguluka,
9 kuenje ndu ku livondela locisola, momo ame ndi Paulu nda kuka, haime ndi mandekua mekonda lia Kristu Yesu.
10 Ndu ku livondela omo liomõlange Onesimo, una okuti nda linga isiaye eci nda kala vokayike.*
11 Tete eye ka kuatele esilivilo kokuove, puãi cilo o kuete esilivilo kokuove kuenda kokuange.
12 Ñasi loku u tiula kokuove lutima wange wosi.*
13 Nda yonguile okuti eye o kala kulo lame okuti o ñuatisa pomangu yove osimbu ndi kasi vokayike omo liolondaka viwa.
14 Pole, si yongola oku linga cimue nda ove ku ci tava, okuti elinga liove liwa ka li lingiwa locikukũi, te lutima wosi.
15 Pamue eli olio esunga lieci eye a litepela kokuove okatembo kamue,* okuti o tiuka vali kokuove oloneke ka vi pui,
16 ka kala vali ndupika, pole, upika ci sule, o linga manjove wa soliwa, ca piãla kokuange, puãi ca velapo kokuove omo o linga manjove vetimba kuenda kupange wa Ñala.
17 Kuenje nda okuti o ndi tenda ndekamba,* u tambula locisola ndeci nda wa linga lame.
18 Puãi nda wa ku linga cĩvi, ale wa ku levala cimue, ndi ci feta.
19 Ame ndi Paulu, ñasi oku soneha leka liange muẽle: Ndi ci feta—si sukila oku ku ci sapuila, ove wa ndi levala omuenyo wove muẽle.
20 A manjange ndi sesamẽla oku tambula ekuatiso eli kokuove vu Ñala; lembeleka utima wange* vu Kristu.
21 Nda kolela okuti o pokola, oco nda ku sonehela momo nda kũlĩha okuti o linga eci ca velapo okuti eci ñasi loku popia ci sule.
22 Handi vali, ndi pongiyilevo ocitumãlo coku kala, momo nda kolela okuti omo liolohutililo viene ndi tiuka vali kokuene.*
23 Lamisapo Epafra ekamba liange liumandekua vomunga kumue la Kristu Yesu,
24 la Marko, Aristarko, Dema, kuenda Luka ekamba liange liupange.
25 Ohenda ya piãla ya Ñala Yesu Kristu yi kale locituwa ene wa lekisi.
Atosi Pombuelo
^ Ale, “ocikembe.”
^ Lit., “kovikolo.”
^ Ale, “locikembe cange.”
^ Lit., “owola yimosi.”
^ Lit., “oñuatisi.”
^ Ale, “ocikembe.”
^ Ale, “oku yovuiwa omo liene.”
