Liatete Liasapulo 11:1-47
11 Vokuenda kuotembo, va Isareli vosi va likongela ku Daviti ko Hevirone+ kuenda va popia vati: “Tala! Etu tukepa kuenda tusitu yove.*+
2 Kosimbu eci Saulu a kala osoma, ove wa enda oku songuila o Isareli kovoyaki avo.*+ Kuenje Yehova Suku yove wa ku sapuila hati: ‘Ove o ka linga ungombo womanu vange va Isareli kuenda o ka linga usongui womanu vange va Isareli.’”+
3 Omo liaco, akulu vosi vo ko Isareli veya ku soma ko Hevirone kuenda Daviti wa linga lavo ocisila cimue ko Hevirone kovaso a Yehova. Noke ovo va waveka Daviti oco a linge osoma yo Isareli+ ndeci ci likuata londaka Yehova a popele pocakati ca Samuele.+
4 Noke Daviti lo Isareli yosi va enda ko Yerusalãi okuti, o Yevusi+ muna mua kala va Yevusi okuti,+ olonungi via tungile vofeka yaco.
5 Olonungi vio Yevusi via pembula Daviti viti: “Ove lalimue eteke o ka iñila mulo!”+ Noke, Daviti wa tambula ocitumãlo ceteyuilo co ko Siono okuti,+ kaliye Olupale lua Daviti.+
6 Omo liaco, Daviti wa popia hati: “Omunu wosi o kundula tete va Yevusi, o ka kala usongui* kuenda ombuale.” Yoava+ omõla a Seruya eye wa lamana tete kuenje wa linga usongui.
7 Noke Daviti wa tungila vocitumãlo ceteyuilo. Eli olio esunga lieci ovo va ci tukuila hati, Olupale lua Daviti.
8 Eye wa fetika oku tunga kolonele viosi violupale, oku upisa Kondunda* toke kolonele viaco kuenda Yoava wa tumbulula onepa yikuavo yolupale.
9 Omo liaco, Daviti wamamako oku pama calua+ kuenda Yehova ukualohoka wa kala laye.
10 Ava ovo asongui vasualali va pama va Daviti vana va eca kokuaye ekuatiso lia pama kuviali waye, kumue lo Isareli yosi oco vo lingise osoma ndeci ci likuata londaka ya Yehova yatiamẽla ku Isareli.+
11 Owu owo ulala wolonduko viasualali va pama va Daviti: Yasioveama+ omõla u Hakimoni umue, usongui walume vatatu.+ Vepuluvi limue, eye wa ponda eci ci soka 300 komanu lunga waye.+
12 Noke wa kuamamo Eleasara+ omõla a Dodo u Ahiho.+ Eye wa kala umue pokati kasualali vatatu va pama.
13 Eye wa kala la Daviti ko Pasidamimi,+ kuna va Filisiti va liongoluile pamosi oco va linge uyaki. Kua kala epia limue lieyukile osevata kuenda omanu va tilile omo lia va Filisiti.
14 Pole, eye wa talama pokati kepia kuenda wa li teyuila kuenje wamamako oku kundula va Filisiti kuenje Yehova wa eca eyulo* limue linene.+
15 Pokati keci ci soka 30 kasongui, pa tunda vatatu va lokila toke kewe ku Daviti veleva lio ko Adulama+ osimbu olohoka via va Filisiti via tungile ocilombo Vocimbota* co Refayimi.+
16 Daviti wa kala vocitumãlo ceteyuilo kuenda ocimunga cimue casualali ca va Filisiti ca kala ko Beteleme.
17 Noke Daviti wa situlula onjongole yaye poku popia hati: “Nda nda nyuile ño ovava a tunda vocisimo ci kasi ocipepi lombundi yo Beteleme, nda nda sanjuka!”+
18 Omo liaco, vatatu va iñila vocilombo ca va Filisiti kuenda vopa ovava vocisimo ocipepi lombundi yo Beteleme kuenje va a nena ku Daviti; pole, Daviti wa likala oku a nyua kuenda wa a pesila kovaso a Yehova.
19 Eye wa popia hati: “Ka ca sungulukile kokuange, kovaso a Suku yange oku ci linga! Ndi sukila hẽ oku nyua osonde yalume ava va kapa omuenyo wavo kohele?+ Momo ovo va kapa omuenyo wavo kohele oco va a nene.” Omo liaco, eye wa likala oku a nyua. Evi ovio ovina asualali vaye vatatu va pama va linga.
20 Avisiai+ manji a Yoava+ wa linga usongui wocimunga cikuavo calume vatatu; eye wa ponda eci ci soka 300 komanu lunga waye kuenda eye wa kemãlele ndalume vaco vatatu.+
21 Pokati kalume vakuavo vatatu, eye wa kemãlelepo vali calua okuti, alume vavali va kala laye ci sule kuenda eye wa kala usongui wavo; pole, ka pitĩlile vocisoko calume vatatu vatete.
22 Benaya+ omõla a Yehoyada, wa kala ulume umue ukuotõi* una wa linga ovina vialua vi komõhisa ko Kavasele.+ Eye wa ponda omãla vavali va Ariyele wo ko Moavi kuenda eye wa lokila vocisimo cimue keteke limue kua kala ocikokoto kuenje wa ponda ohosi yimue.+
23 Eye wa pondavo ulume umue unene calua u Egito okuti, utunga waye u soka ovikeya vitãlo.*+ Ndaño okuti, u Egito wa kuatele unga umue peka liaye nduti womakina ya vakuakupota,+ eye wa liyaka laye lombueti yimue kuenda wa tambula unga peka liu Egito kuenje wo ponda lunga waco.+
24 Evi ovio ovina Benaya omõla a Yehoyada a linga kuenda eye wa kuatele ekemãlo ndeli liasualali vatatu va pama.
25 Ndaño okuti, eye wa kemãlelepo vali calua okuti alume akũi atatu ci sule, ka pitĩlile vocisoko calume vatatu.+ Pole, Daviti wo nõla oco a linge ondavululi yaye.
26 Asualali va pama volohoka viongusu va kala Asahele+ manji a Yoava, Elihanana omõla a Dodo wo ko Beteleme,+
27 Siamote u Harorite, Helesi u Peloni,
28 Ira+ omõla a Ikesi u Tekoa, Aviyesere+ u Anatote,
29 Sibekai+ u Husiati, Ilai u Ahiho,
30 Maharai+ u Netofa, Helede+ omõla a Baana u Netofa,
31 Itai omõla a Rivai wo ko Givea ya va Benjamini,+ Benaya u Piratoni,
32 Hurai wo kakango* o ko Gasi,+ Aviyele u Aravati,
33 Asimawete u Baharumi, Eliava u Sialavoni,
34 omãla va Hasieme u Gisoni, Yonatão omõla a Siage u Harari,
35 Ahima omõla a Sakare u Harari, Elifale omõla a Uri,
36 Hefere u Mekerati, Ahiya u Peloni,
37 Hesero u Karimele, Naarai omõla a Esivai,
38 Yoeli manji a Natana, Mivihare omõla a Hagiri,
39 Seleki u Amoni, Naharai u Berote okuti, ukuavimalẽho viuyaki via Yoava omõla a Seruya;
40 Ira u Itiri, Gareve u Itiri,
41 Uriya+ u Hiti, Savada omõla a Ahilai,
42 Adina omõla a Sisa u Ruvene, haeye usongui umue wa va Ruvene kuenda ci soka 30 va kala laye;
43 Hanana omõla a Mahaka, Yosiafata u Mitini,
44 Usiya u Asitarote, Siama la Yeyele, omãla va Hotama u Aroere;
45 Yediyaele omõla a Simiri la Yoha manjaye u Tisi;
46 Eliyele u Mahava, Yerivai la Yosiaviya omãla va Elianama kuenda Yitima u Moavi;
47 Eliyele, Ovede kuenda Yahasiyele u Mesova.
Atosi Pombuelo
^ Ale “tuepata liove kosonde.”
^ Lit., “una wa enda oku tundisa loku iñisa ko Isareli.”
^ Lit., “utue.”
^ Ale “Milo.” Okuti ondaka yimue yo Heveru yi lomboloka “oku yukisa.”
^ Ale “epopelo.”
^ Ale “Vetapi Lia Vomba.”
^ Lit., “omõla wulume umue wa kemãla.”
^ Utunga waye wa soka 2.23 kolometulu. Tala Alombo. B14.
^ Tala Elomboluilo.
