Liatete Liasapulo 12:1-40
-
Oloñuatisi viuviali wa Daviti (1-40)
12 Ava ovo va kala alume va likongela ku Daviti ko Cikilage,+ osimbu eye a kala oku tila omo lia Saulu+ omõla a Kisi kuenda ovo va kala pokati kasualali va pama vana va kala oku u kuatisa kuyaki.+
2 Ovo va limalẽhele lohonji kuenda va tẽlele oku talavaya leka liondio kuenda leka liepĩli,+ oco va imbe ovawe lepipili+ ale oku asa ovisongo lohonji. Ovo va kala vamanji va Saulu okuti, vakuacikoti ca Benjamini.+
3 Usongui wa kala Ahiesere kuenda wa kuamamo Yoasi okuti, vosi yavo omãla va Sema u Givea;+ Kua kalavo Yisiyele la Pelete omãla va Asimawete, Beraka, Yehu u Anatote,+
4 Yisimaya u Giveone okuti,+ esualali limue lia pama pokati kakũi atatu,+ haeye usongui wavo; kuendavo Yeremiya, Yahasiele, Yohanana, Yosavada u Gedera,
5 Elusai, Yerimote, Bialiya, Semariya, Sefatiya u Harifi
6 Elikana, Yisiya, Asariele, Yoesere kuenda Yasioveama va Kora;+
7 la Yoela kuenda Sevadiya omãla va Yerohama wo ko Gedore.
8 Vamue pokati ka va Gadi, va likongela ku Daviti kocitumãlo ceteyuilo vekalasoko;+ ovo va kala asualali va pama, asualali va pindisiwa ciwa kuyaki haivo va limalẽha lociyepelo cinene kuenda onjelia okuti, ovipala viavo via kala ndevi violohosi kuenda va kala vakuanjanga ndolombambi kilu liolomunda.
9 Eseri wa kala usongui, Ovadiya wavali, Eliyava watatu,
10 Mesimana wakuãla, Yeremiya watãlo,
11 Atayi wepandu, Eliyele wepanduvali,
12 Yohanana wecelãla, Elisavade wecea,
13 Yeremiya wekũi kuenda Makibanai wekũi lamosi.
14 Ava ovo va kala va Gadi+ asongui volohoka. U o sule wa tẽlele oku liyaka leci ci soka 100 kasualali kuenda u wa velapo leci ci soka 1.000 kasualali.+
15 Ava ovo alume vana va yoka o Yordão kosãi yatete, eci oyo ya kala oku samõhaila kolohulo vialuo kuenda ovo va tundisa vosi vana va kala kolofeka vio kombuelo kutundilo kuenda kutakelo.
16 Vamue pokati kalume va Benjamini kuenda va Yuda veyavo ku Daviti kocitumãlo caye ceteyuilo.+
17 Noke Daviti wa tunda oco a ñualẽhele lavo kuenda wa va sapuila hati: “Nda weyi kokuange lombembua oco vu ndi kuatisi, tu kala akamba. Pole, nda weyilili oku ndi pakula kovanyãli vange osimbu ovaka ange ka a lingile lacimue cĩvi, Suku ya vakukululu yetu a ci mole kuenda a sombise.”+
18 Kuenje espiritu lia wila* Amasai+ usongui wakũi atatu kuenje wa popia hati:
“Etu tuakuenje vove, A Daviti kuenda tu kasi love Amõla a Jese.+
Ombembua, ombembua yi kale love kuenda ombembua yi kale la vana va kasi oku ku kuatisa,Momo Suku yove, o kasi oku ku kuatisa.”+
Omo liaco, Daviti wa va tambula kuenda wa va nõla oco va kale pokati kasongui vasualali.
19 Alume vamue vo kocikoti ca Manase va siapovo olohoka via Saulu oco va likongele ku Daviti eci eya la va Filisiti oco va linge uyaki la Saulu; pole, eye ka kuatisile va Filisiti momo olombiali via va Filisiti+ noke yoku li kũlĩhĩsa, vio tuma oku tiukila loku popia vati: “Eye o ka likongela ku ñala yaye Saulu kuenje eci ci ka kapa omuenyo wetu kohele.”+
20 Alume vo kocikoti ca Manase vana va likongela kokuaye eci eye a enda ko Cikilage+ vava: Adina, Yosavada, Yediyaele, Mingeli, Yosavada, Elihu kuenda Silitai okuti, asongui volohulukãi via Manase.+
21 Ovo va kuatisa Daviti kovingumba, momo vosi yavo va kala alume va pama, vakuotõi+ kuenda va linga asongui volohoka.
22 Eteke leteke, omanu vamamako oku likongela ku Daviti+ oco vo kuatise toke eci ocilombo caye ca linga cinene ndocilombo ca Suku.+
23 Eli olio etendelo liasongui valume vana va limalẽhela uyaki okuti, veya toke ku Daviti ko Hevirone+ oco va pongolole usoma wa Saulu kokuaye ndeci Yehova a ci handelekele.+
24 Kua kala 6.800 kalume va Yuda vana vambata ociyepelo cinene kuenda onjelia haivo va limalẽhela oku linga uyaki.
25 Ku va Simeone, kua kala 7.100 kalume volohoka va pama haivo vakuotõi.
26 Ku va Lewi kua kala 4.600 kalume.
27 Yehoyada+ wa kala usongui womãla va Arone+ kuenda eye wa kala leci ci soka 3.700 kalume,
28 kua kalavo Sadoke+ umalẽhe umue wa pama haeye ukuotõi, leci ci soka 22 kasongui vonjo ya isiaye.
29 Ku va Benjamini vamanji va Saulu+ kua kala 3.000 kalume kuenda onepa yalua yetendelo liaco, kosimbu ya enda oku teyuila olonjongole vionjo ya Saulu.
30 Ku va Efarimi kua kala 20.800 kalume va pama, vakuotõi haivo va kemãla pokati kolonjo via va isiavo.
31 Konepa yocikoti ca Manase, kua kala 18.000 kalume vana va nõliwa kolonduko oco veye ku Daviti oku u lingisa osoma.
32 Kocikoti ca Isakare, kua kala 200 kasongui vana va kuatele elomboloko liolotembo kuenda va kũlĩhĩle eci Isareli a sukilile oku linga. Vamanjavo vosi va kala oku songuiwa lavo.
33 Kocikoti ca Sevulono kua kala 50.000 kalume vana va tẽlele oku vumba kolohoka okuti va lipongiya ndovimunga viasualali lovimalẽho viosi viuyaki, vosi va likongela ku Daviti lutima umue wocili.*
34 Kocikoti ca Nafitali kua kala 1.000 kasongui leci ci soka 37.000 kalume va limalẽha lociyepelo cinene kuenda unga.
35 Ku va Dani, vana va lipongiya ndovimunga viasualali va kala 28.600.
36 Kocikoti ca Asiyere, vana va tẽlele oku vumba kolohoka okuti va lipongiya ndovimunga viasualali va kala 40.000.
37 Konele yikuavo yo Yordão,+ ku va Ruvene, ku va Gadi kuenda onepa yimue yocikoti ca Manase kua kala 120.000 kasualali va limalẽha lovimalẽho viosi viuyaki.
38 Vosi yavo va kala alume vuyaki okuti, va enda oku likongela kulala wuyaki; ovo veya lutima wosi* ko Hevirone oco va lingise Daviti osoma ko Isareli yosi kuendavo va Isareli vosi vakuavo va kala lutima umuamue koku lingisa Daviti osoma.+
39 Kuenje ovo vamamako oku kala la Daviti vokuenda kuoloneke vitatu, va lia loku nyua ovina vamanjavo va va pongiyila.
40 Handi vali, vana va tunga ocipepi lavo la vana va tunga ocipãla ndeci Isakare, Sevulono kuenda Nafitali, va kala oku nena okulia poku kuambatela kovimbulu, kolongamelo, kolomula kuenda kolongombe ndeci: osema, akende a pangiwa lakuyu, ayuva a kukuta, ovinyu kuenda ulela. Va nenavo olongombe lolomeme vialua momo kua kala esanju ko Isareli.
Atosi Pombuelo
^ Lit., “lia walisa.”
^ Ale “vosi vana va likongela ku Daviti ka va kuatele utima wa tepiwa.”
^ Lit., “va kala lutima umosi.”
