Liatete Liasapulo 13:1-14
13 Daviti wa kũlĩhĩsa asongui volohulukãi lava vocita kuenda asongui vosi vakuavo.+
2 Noke Daviti wa sapuila ekongelo liosi lio Isareli hati: “Nda ca sunguluka kokuene kuenda nda ci taviwa la Yehova Suku yetu, tu tumi ondaka ku vamanjetu va supapo kovaimbo osi o Isareli kuendavo kovitunda, ku va Lewi valupale avo+ kumue lovisenge vioku lisila oviunda, oco veye oku likongela kokuetu.
3 Tu neni vali Ocikasia+ ca Suku yetu.” Momo koloneke via Saulu, ovo ka va endaile oku ci tata.+
4 Ekongelo liosi lia tava oku ci linga, momo ocisimĩlo caco ca sungulukile komanu vosi.
5 Omo liaco, Daviti wongolola o Isareli yosi oku upisa kolui* luo Egito toke ko Lebo-Hamati*+ oco va nene Ocikasia ca Suku yocili, oku upisa ko Kiriyata-Yeari.+
6 Daviti kuenda o Isareli yosi va enda ko Baala+ ko Kiriyata-Yeari yina ya tiamẽla ko Yuda oco va kope Ocikasia ca Suku yocili Yehova, una wa tumãla kocalo kilu* lia va keruvi,+ muna onduko yaye yi tukuiwa.
7 Pole, ovo va kapa Ocikasia ca Suku yocili vokalosa kokaliye+ kuenda va cupa konjo ya Avinadave kuenje Usa la Ahiyo ovo va kala oku songuila okalosa kaco.+
8 Daviti kumue lo Isareli yosi va kala oku linga ocipito kovaso a Suku yocili longusu yavo yosi, lovisungo, lolohalupa, lovikuata vikuavo viovisikilo via pangiwa lovikolo, lolopandelu,+ lolosimbalu+ kuenda alumbeta.+
9 Pole, eci ovo va pitĩla pocimbandi co Kidono, Usa wolõla okuokuo kuaye kuenda wa kuata Kocikasia momo olongombe nda via ci kupula.
10 Omo liaco, onyeño ya Yehova ya wengukila Usa kuenda Eye wo ponda, momo eye woluĩla eka liaye Kocikasia+ kuenje eye opo a fila kovaso a Suku.+
11 Pole, Daviti wa tema* momo onyeño ya Yehova ya wengukila Usa; kuenje ocitumãlo caco ceya oku tukuiwa hati, Perece-Usa* toke etaili.
12 Omo liaco, Daviti wa kuatela usumba Suku yocili keteke liaco kuenje wa popia hati: “Ndi pondola oku nena ndati Ocikasia ca Suku yocili oku ñasi?”+
13 Daviti ka nenele Ocikasia kuna eye a kala okuti, Volupale lua Daviti, pole, eye wa handeleka oco cambatiwe konjo ya Ovede-Edome u Giti.
14 Ocikasia ca Suku yocili, ca kala kumue la vakuanjo ya Ovede-Edome kuenda camamako oku kala konjo yaye vokuenda kuolosãi vitatu kuenje Yehova wamamako oku sumũlũisa vakuanjo ya Ovede-Edome la cosi a kuatele.+
Atosi Pombuelo
^ Ale “ko Sihore.”
^ Ale “poku iñilila kuo Hamati.”
^ Ale pamue, “pokati.”
^ Ale “wa sumua.”
^ Ci lomboloka “Oku Vetiwa Kua Usa.”
