Liatete Liasapulo 15:1-29
15 Kuenje Daviti wamamako oku litungila olonjo Volupale lua Daviti kuenda wa pongiya ocitumãlo cimue Cocikasia ca Suku yocili loku ci tungila ombalaka yimue.+
2 Noke Daviti wa popia hati: “Lomue ambata Ocikasia ca Suku yocili te lika va Lewi, momo Yehova wa va nõla oco vambate Ocikasia ca Yehova loku u vumba otembo yosi.”+
3 Kuenje Daviti wongolola o Isareli yosi ko Yerusalãi, oco va nene Ocikasia ca Yehova vocitumãlo cina eye a pongiyile.+
4 Daviti wongolola ovitumbulukila via Arone+ kuenda va Lewi:+
5 ku va Kohata kua kala Uriyele usongui kuenda 120 ya vamanjaye;
6 ku va Merari kua kala Asaya+ usongui kuenda 220 ya vamanjaye;
7 ku va Gerisiomo kua kala Yoeli+ usongui kuenda 130 ya vamanjaye;
8 kovitumbulukila via Elicafana+ kua kala Semaya usongui kuenda 200 ya vamanjaye;
9 kovitumbulukila via Hevirone kua kala Eliyele usongui kuenda 80 ya vamanjaye;
10 kovitumbulukila via Usiyele+ kua kala Aminadava usongui kuenda 112 ya vamanjaye.
11 Handi vali, Daviti wa vilikiya ovitunda Sadoke+ la Aviyatare+ kuenda va Lewi okuti, Uriyele, Asaya, Yoeli, Semaya, Eliyele la Aminadava,
12 kuenje wa va sapuila hati: “Ene wasongui volonjo via va isia via va Lewi. Liyelisi ene muẽle, ene kumue la vamanjene kuenda neni Ocikasia ca Yehova Suku ya Isareli vocitumãlo cina ame nda ci pongiyila.
13 Omo okuti ene ka wa cambateli konjanja yatete,+ onyeño ya Yehova Suku yetu ya tu wengukila+ momo ka tua kuamẽle olonumbi viaye.”+
14 Omo liaco, ovitunda kuenda va Lewi va liyelisa ovo muẽle oco va nene Ocikasia ca Yehova Suku ya Isareli.
15 Kuenje va Lewi, vambata Ocikasia ca Suku yocili kapepe avo lolombueti+ ndeci Mose a ci handelekele pocakati condaka ya Yehova.
16 Noke Daviti wa sapuila asongui va va Lewi oco va nõle vamanjavo olonjimbi oco va imbe lesanju, va kuamiwe lovikuata vioku sika ndeci: ovikuata viovisikilo via pangiwa lovikolo, olohalupa+ kuenda olosimbalu.+
17 Omo liaco, va Lewi va nõla Hemani+ omõla a Yoeli kuenda ku vamanjaye va nõla Asafe+ omõla a Berekiya kuenje ku va vamanjavo va Merari va nõla Etani+ omõla a Kusiaya.
18 Kumue lavo, kua kala vamanjavo va tiamẽla ketepiso liavali+ okuti, Sakariya, Bene, Yaasiyele, Semiramote, Yehiyele, Uni, Eliyava, Benaya, Maaseya, Matitiya, Elifele la Mikineya kuenda vakualombundi, va kala Ovede-Edome la Yeyele.
19 Olonjimbi Hemani,+ Asafe+ la Etani, ovo va laikele oku sika olosimbalu viosipi;+
20 kuenda Sakariya, Asiyele, Semiramote, Yehiyele, Uni, Eliyava, Maaseya la Benaya va sika ovikuata viovisikilo via pangiwa lovikolo via semũlũiwa vo Alamote;*+
21 kuenje Matitiya,+ Elifele, Mikineya, Ovede-Edome, Yeyele la Asasiya va sika olohalupa via semulũiwa vo Seminite*+ oco va kale ndasongui.
22 Kenaniya+ usongui wa va Lewi wa songuila oku ambatiwa Kuocikasia momo wa loñolõhele koku ci linga,
23 kuenje Berekiya la Elikana va kala vakualombundi vana va vumba ocipepi Locikasia.
24 Ovitunda Siebaniya, Yosiafata, Netanele, Amasai, Sakariya, Benaya la Eliyesere va sika lolukandi olombeta kovaso Yocikasia ca Suku yocili+ kuenda Ovede-Edome la Yehiya va kalavo vakualombundi vana va vumba ocipepi Locikasia.
25 Noke Daviti kuenda akulu vo Isareli lasongui vohulukãi va enda lonjolela+ konjo ya Ovede-Edome+ oco va kope ocikasia covisila via Yehova.
26 Eci Suku yocili a kuatisa va Lewi vana va kala oku ambata ocikasia covisila via Yehova, ovo va lumba olonãle epanduvali lovitupi violomeme epanduvali.+
27 Daviti wa walele ocikutu cimue ka ci kuete ovoko ca pangiwa lonanga yovalatanya kumue la va Lewi vosi vana va kala oku ambata Ocikasia, olonjimbi kuenda Kenaniya una wa kala oku songuila olonjimbi vina viambata Ocikasia; Daviti wa walelevo evendalia liovalatanya.+
28 Va Isareli vosi va kala oku nena ocikasia covisila via Yehova loku kaluka lesanju+ kumue locileñi combinga, lolombeta,+ lolosimbalu okuti va kala oku sika lolukandi ovikuata viovisikilo via pangiwa lovikolo kuenda olohalupa.+
29 Pole, eci ocikasia covisila via Yehova ca pitĩla Volupale lua Daviti,+ Mikale omõla ukãi wa Saulu+ wa vanjela ponjanela kuenje wa mola okuti, Soma Daviti wa kala oku tẽha tẽha loku linga ocipito; noke eye wa fetika oku u pembula vutima waye.+
