Liatete Liasapulo 17:1-27
17 Eci Daviti a kala vonjo* yaye muẽle, wa sapuila Natana+ uprofeto hati: “Ame ñasi vonjo yimue yolosedru,+ osimbu okuti ocikasia covisila via Yehova ci kasi vemẽhi liombalaka.”+
2 Natana wa tambulula Daviti hati: “Linga cosi ci kasi vutima wove, momo Suku yocili o kasi love.”
3 Vuteke waco, ondaka ya Suku yeya ku Natana, yiti:
4 “Kuende, sapuila ukuenje wange Daviti okuti: ‘Ca popia Yehova ceci hati: “Haveko o ndi tungila onjo oco ndi kalemo.+
5 Momo lalimue eteke nda kalele vonjo yimue, tunde keteke ndopa Isareli Kegito toke etaili, pole, nda endaenda kombalaka lombalaka kuenda kotavernakulu lotavernakulu.*+
6 Vokuenda kuotembo yosi, eci nda endaenda kumue lo Isareli yosi, anga hẽ eteke limue nda popele ondaka yimue ku umue pokati kolonganji via Isareli vina ame nda nõla oco vi linge angombo vomanu vange loku popia hati: ‘Momo lie ka wa nungilili onjo yimue yolosedru?’”’
7 “Kaliye sapuila ukuenje wange Daviti okuti: ‘Ca popia Yehova ukualohoka ceci hati: “Ame nda ku upa vovisenge vioku lisila oviunda, konyima yoviunda, oco o linge usongui womanu vange va Isareli.+
8 Ndi ka kala love kuosi wenda+ kuenda ndi ka imũla* ovanyãli vove vosi kovaso ove;+ kuenje ndi ka lingisa onduko yimue kokuove ndonduko yalume va kemãla vo kilu lieve.+
9 Ndi ka nõlela omanu vange va Isareli ocitumãlo cimue loku va kapamo. Ovo omo va ka kala kuenda lomue o ka va sakalaisa vali; kuenje olondingaĩvi ka vi ka va talisa vali ohali* ndeci via linga kosimbu,+
10 tunde keteke nda nõlela omanu vange va Isareli+ olonganji. Kuenda ndi ka yula ovanyãli vove vosi.+ Handi vali, ndu ku sapuila siti: ‘Yehova o ka ku tungila onjo* yimue.’
11 “‘“Eci oloneke viove vi pitĩla kesulilo kuenda o fa,* ndi ka katula ocitumbulukila* cove ci kuamamo okuti, umue pokati komãla vove+ kuenda ndi kolisa usoma waye.+
12 Eye o ka nungila onjo yimue+ kuenda ndi ka kolisa ocalo caye otembo ka yi pui.+
13 Ame ndi ka linga isiaye kuenda eye o ka linga omõlange.+ Ocisola cange ka ci pongoloka si cupi kokuaye+ ndeci nda cupa ku una wa ku lianga.+
14 Ndu u tumbika vonjo yange kuenda kusoma wange otembo ka yi pui+ kuenje ocalo caye ci ka kala otembo ka yi pui.”’”+
15 Natana wa sapuila Daviti olondaka evi viosi locinjonde eci cosi.
16 Omo liaco, Soma Daviti wa iñila kuenda wa tumãla kovaso a Yehova loku popia hati: “Ame helie, A Yehova Suku? Kuenda vakuepata liange hẽ velie oco o ndi nene toke palo?+
17 Handi vali hacoko lika, A Suku, ove o popiavo catiamẽla konjo yukuenje wove toke otembo yalua kovaso yoloneke+ kuenda wa mbanja ndu okuti, ndulume umue o sesamẽla oku kemãlisiwa* calua, A Yehova Suku.
18 Nye vali ukuenje wove Daviti a pondola oku ku sapuila catiamẽla kesumbilo lia eciwa kokuange osimbu okuti, ove wa kũlĩha ciwa ukuenje wove?+
19 A Yehova, omo liukuenje wove kuenda ndomo ci likuata lutima wove,* wa linga ovina evi viosi vinene poku situlula unene wove.+
20 A Yehova, ka kuli laumue wa lisoka love+ kuenda ka kuli Suku te lika ove;+ ovina viosi tua yeva lovatũi etu vi cimbila uvangi.
21 Ofeka yipi yikuavo kilu lieve ya lisoka lomanu vove va Isareli?+ Suku yocili wa va yovola ndomanu vaye.+ Ove muẽle wa li lingila onduko yimue omo liovilinga viove+ vinene haivio vi komõhisa poku tundisa olofeka kovaso yomanu vove+ vana ove wa yovola Kegito.
22 Omanu vove va Isareli wa va lingisa omanu vove muẽle otembo yosi;+ kuenda ove A Yehova, wa linga Suku yavo.+
23 Kaliye A Yehova, ohuminyo wa linga yatiamẽla kukuenje wove kuenda konjo yaye yi tẽlisiwe otembo yosi kuenda linga ndomo wa likuminya.+
24 Onduko yove yi kale otembo yosi* kuenda yi kemãlisue otembo ka yi pui+ oco omanu va popie vati: ‘Yehova ukualohoka Suku ya Isareli eye Suku ku Isareli’ kuenda onjo yukuenje wove Daviti yi kolisiwe kovaso ove.+
25 Momo ove a Suku yange, wa situluila kukuenje wove ocipango cove coku u tungilako onjo yimue. Eli olio esunga lieci ukuenje wove a kuetele ekolelo lioku linga ohutililo eyi kokuove.
26 Kaliye, A Yehova ove wu Suku yocili kuenda wa likuminya ovina evi viwa viatiamẽla kukuenje wove.
27 Omo liaco, sanjukila oku sumũlũisa onjo yukuenje wove kuenda oyo yamameko otembo ka yi pui kovaso ove, momo ove A Yehova, wa yi sumũlũisa kuenda oyo yi sumũlũisiwe otembo ka yi pui.”
Atosi Pombuelo
^ Ale “velombe.”
^ Pamue ci lomboloka “oku upisa kocitumãlo cimue combalaka toke kocitumãlo cikuavo kuenda kocitumãlo cimue coku kala toke kocitumãlo cikuavo.”
^ Ale “oku teta.”
^ Lit., “oku va takatisa.”
^ Ale “onjo yolosoma.”
^ Lit., “o ka li kongela la vakukululu yove.”
^ Lit., “ombuto.”
^ Ale “ulume umue wa velapo.”
^ Ale “ndomo ci likuata locipango cove.”
^ Ale “oku kala ukuacili.”
