Liatete Liasapulo 18:1-17
18 Noke yotembo yimue, Daviti wa kundula va Filisiti kuenje wa va yula loku tambula o Gati+ kumue lovaimbo a sungueko povaka a va Filisiti.+
2 Eye wa yula Moavi+ kuenje va Moavi va linga apika va Daviti kuenda va enda oku feta ulambu.+
3 Daviti wa yula Soma Hadadesere+ wo ko Sova+ ocipepi lo Hamati+ osimbu eye a kala oku enda oku ka tumbika omoko yaye yoku viala Kolui Ferati.+
4 Daviti wa tambula 1.000 kakãlu, 7.000 kalume vakuakuendela kolokavalu kuenda 20.000 kasualali vakuakuendela posi.+ Noke, Daviti wa teta asipa akonjo olokavalu viosi viakãlu uyaki, pole, wa supisapo 100.+
5 Eci va Suria vo ko Damasko veya oco va kuatise Soma Hadadesere wo ko Sova, Daviti wa ponda 22.000 ya va Suria.+
6 Noke Daviti wa tumbika asualali ko Suria yo ko Damasko kuenje va Suria va linga apika va Daviti kuenda va enda oku feta ulambu. Yehova wa eca ku Daviti eyulo* kuosi eye a enda.+
7 Handi vali, Daviti wa tambula oviyepelo viulu kakuenje va Hadadesere kuenje wa vi nena ko Yerusalãi.
8 Oku upisa ko Tivihati lo ko Kuni, alupale a Hadadesere, Daviti wa tambula etendelo limue linene liosipi. Losipi yaco, Salomone wa tunga ombasia yinene yovava yosipi yi tukuiwa okuti Okalunga,+ lolongunji kuenda ovikuata viosipi.+
9 Eci Soma Tou wo ko Hamati a yeva okuti, Daviti wa yula olohoka viosi via Soma Hadadesere+ wo ko Sova,+
10 vepuluvi liaco, eye wa tuma omõlaye Hadorama ku Soma Daviti oco o lame loku u pandiya, omo a liyaka la Hadadesere loku u yula (momo Hadadesere olonjanja vialua wa liyaka la Tou) kuenje eye wa nena ovikuata viñi viñi viulu, viopalata kuenda viosipi.
11 Soma Daviti wa kolisa ovina viaco ku Yehova+ kumue lopalata kuenda ulu eye a pundile kolofeka viosi okuti: ko Edome lo ko Moavi, ku va Amoni,+ ku va Filisiti+ kuenda ku va Amaleke.+
12 Avisiai+ omõla a Seruya+ wa kundula 18.000 ya va Edome Vocimbota Comongua.+
13 Eye wa kapa asualali ko Edome kuenje va Edome vosi va linga akuenje va Daviti.+ Yehova wa eca ku Daviti eyulo* kuosi eye a enda.+
14 Daviti wamamako oku viala o Isareli+ yosi kuenje wa tumbika esunga kuenda esunguluko komanu vaye vosi.+
15 Yoava omõla a Seruya wa kala usongui wolohoka,+ Yehosafata+ omõla a Ahilude wa kala ulomboluili,
16 Sadoke omõla a Ahituva la Ahimeleke omõla a Aviyatare, va kala ovitunda kuenda Siavisia wa kala usonehi.
17 Benaya omõla a Yehoyada, wa kala usongui wa va Kereti+ la va Peleti+ kuenje omãla va Daviti va kala asongui va velapo va soma.