Liatete Liasapulo 19:1-19
19 Noke liovina viaco, Nahase soma ya va Amoni wa fa kuenje omõlaye wa linga osoma pomangu yaye.+
2 Noke Daviti wa popia hati: “Ndi ka lekisa ocisola ka ci pongoloka+ ku Hanuni omõla a Nahase, momo isiaye wa lekisa ocisola ka ci pongoloka kokuange.” Omo liaco, Daviti wa tuma olomunga oco vo lembeleke omo liolofa via isiaye. Pole, eci akuenje va Daviti va pitĩla vofeka ya va Amoni+ oco va lembeleke Hanuni,
3 olombuale via va Amoni via sapuila Hanuni viti: “Ove o sima hẽ okuti, Daviti o kasi oku lekisa esumbilo ku isiove poku ku tumisa vakuakulembeleka? Akuenje vaye ka veyilile hẽ oco va konomuise lutate, oku ku yula loku kũlĩhĩsa ofeka?”
4 Omo liaco, Hanuni wa kuata akuenje va Daviti+ kuenda wa va teta olonjele, wa tetavo ovowalo avo pokati toke vatako avo kuenje wa va tuma oku enda.
5 Eci Daviti vo sapuila ovina via pita lalume vaco, vepuluvi liaco, wa tuma alume vakuavo oku ka liñualẽhela lavo, momo alume vaco va kutisiwa osõi yalua; kuenje soma wa va sapuila hati: “Kali vo Yeriko+ toke eci olonjele viene vi kula vali, noke tiuki.”
6 Vokuenda kuotembo, va Amoni va limbuka okuti va suvukiwa la Daviti, omo liaco, Hanuni la va Amoni va tuma 1.000 kolotalendo* viopalata oco va pañinye akãlu uyaki kuenda vakuakuendela kolokavalu ko Mesopotamia,* ko Arama-Maaka lo ko Sova.+
7 Omo liaco, va pañinya 32.000 kakãlu uyaki, kumue la soma yo Mahaka kuenda omanu vaye. Noke ovo veya kuenda va tunga ocilombo kovaso a Medeva.+ Va Amoni va tunda valupale avo kuenda va liongoluila pamosi oco va linge uyaki.
8 Eci Daviti a yeva ovina viaco, wa tuma Yoava+ kuenda olohoka viosi oku kongelamo asualali vaye va pamapo vali.+
9 Va Amoni va tunda kuenda va lipongiya ndovimunga viasualali puvelo wolupale osimbu olosoma vina vieya via kala vusenge.
10 Eci Yoava a limbuka okuti asualali va kala oku iya kokuaye kovaso lo konyima, eye wa nõla vamue pokati kasualali va velapo vo ko Isareli kuenda wa va pongiya ndovimunga viasualali oco va liyake la va Suria.+
11 Eye wa kapa alume vakuavo oco va songuiwe* la manjaye Avisiai+ okuti, o va pongiya ndovimunga viasualali oco va liyake la va Amoni.
12 Noke eye wa popia hati: “Nda va Suria+ va pamapo vali calua okuti ame ci sule, enju oco o ndi kuatise; pole, nda va Amoni va pamapo vali calua okuti ove ci sule, ndiya oku ku kuatisa.
13 Tu sukila oku pama loku kuata utõi+ oco tu kuatise omanu vetu, lalupale a Suku yetu kuenda Yehova o ka linga eci ciwa kovaso aye.”
14 Noke Yoava kumue lalume vaye vamako oco va liyake la va Suria kuenje va Suria va tila kovaso aye.+
15 Eci va Amoni va limbuka okuti va Suria va tila, ovo va tilavo Avisiai manji a Yoava kuenje va iñila volupale. Noke liovina viaco, Yoava weya ko Yerusalãi.
16 Eci va Suria va limbuka okuti va yuliwa la va Isareli, va tuma olomunga oco va kovonge va Suria va kala vimbo Liolui*+ kuenje va kala oku songuiwa la Siofake usongui wolohoka via Hadadesere.+
17 Eci va ci sapuila ku Daviti vepuluvi liaco, eye wongolola o Isareli yosi kuenda wa yoka o Yordão kuenje weya kokuavo loku lipongiya ndovimunga viasualali poku liyaka lavo. Daviti wa lipongiya ndovimunga viasualali oco a lisange la va Suria kuenje va liyaka laye.+
18 Pole, va Suria va tila va Isareli; kuenda Daviti wa ponda 7.000 kalume vakuakuendisa akãlu kuenda 40.000 kasualali a va Suria vakuakuendela posi kuenda wa ponda Siofake usongui wolohoka.
19 Eci akuenje va Hadadesere va limbuka okuti va yuliwa lo Isareli,+ haico va linga ombembua la Daviti kuenje va linga apika vaye;+ noke o Suria ka ya yonguile vali oku kuatisa va Amoni.
Atosi Pombuelo
^ Otalendo yimosi yi soka 34.2 kolokilu. Tala Alombo. B14.
^ Lit., “Arama-Naharayima.”
^ Lit., “peka.”
^ Okuti, o Ferati.
