Liatete Liasapulo 20:1-8
20 Kefetikilo liunyamo* okuti, oyo otembo olosoma via siata oku enda kuyaki, Yoava+ wa songuila olohoka kuenda wa kundula ofeka ya va Amoni; eye wa enda kuenda wa ñuala ocingonja o Raba,+ osimbu Daviti a kala vo Yerusalãi.+ Yoava wa katukila o Raba kuenda wa yi kundula.+
2 Noke Daviti wopa ekolowa kutue wa Malikama* kuenda wa limbuka okuti, ekolowa liaco lia kuatele ocilemo cotalendo* yimosi yulu kuenda vekolowa liaco, mua kala ovawe a tĩla; kuenje lia kapiwa kutue wa Daviti. Eye wa tikulavo ovina vialua via pundiwa volupale.+
3 Kuenje eye wopa omanu va kalamo, wa va kapa koku linga upange+ woku songa ovawe, oku talavaya lovimalẽho viutale via tua kuenda lolondiaviti. Eci oco Daviti a linga lalupale osi a va Amoni. Noke Daviti lasualali vaye vosi va tiukila ko Yerusalãi.
4 Noke liovina viaco, uyaki wa fetika pokati ka va Isareli la va Filisiti ko Gesere. Vokuenda kuotembo yaco, Sibekai+ u Husiati wa ponda Sipai, una wa kala ocitumbulukila ca Refayimi+ kuenda va Filisiti va yuliwa.
5 Kua kala vali uyaki la va Filisiti kuenje Elihanana omõla a Yairi wa ponda Lahimi manji a Goliata+ u Giti una okuti, unga waye wa kuatele ocikundo cimue ca kala ndomakina ya vakuakupota.+
6 Kueya vali uyaki ko Gati+ kuna kua kala ulume umue unene calua okuti,+ eka leka lia kuatele ovimuine 6 kuenda omãhi lomãhi ya kuatelevo ovimuine 6 okuti vo cosi wa kuatele 24 kovimuine; eye wa kalavo ukuacitumbulukila ca Refayimi.+
7 Eye wa enda oku sepula+ Isareli. Kuenje Yonatão omõla a Simea+ okuti, manji a Daviti wa ponda ulume waco.
8 Alume vaco va kala ovitumbulukila via Refayimi+ ko Gati+ kuenje Daviti kumue lakuenje vaye va va ponda.
Atosi Pombuelo
^ Okuti, kotembo yonjovo.
^ Citava okuti osuku yimue ale ociteka ca va Amoni, kovitumãlo vikuavo o tukuiwavo hati, Moloke ale Milikome.
^ Yi soka 34.2 kolokilu. Tala Alombo. B14.
