Liatete Liasapulo 21:1-30
21 Noke Satana* wa nõlapo oku katukila o Isareli kuenda wa vetiya Daviti oco a tende o Isareli.+
2 Omo liaco, Daviti wa sapuila Yoava+ lasongui vomanu hati: “Kuendi, tendi o Isareli oku upisa ko Beresieva toke ko Dani;+ noke ndi sapuili oco ndi kũlĩhe etendelo liavo.”
3 Pole, Yoava wa popia hati: “Yehova a vokiye omanu vaye ci soka 100 kolonjanja! A ñala yange a soma, vosi yavo hakuenjeko hẽ va ñala yange? Momo lie ñala yange a yonguila oku ci linga? Momo lie eye a nenela eko limue ko Isareli?”
4 Pole, ondaka ya soma ya yula ondaka ya Yoava. Kuenje Yoava wa tunda kuenda wa linga ungende ko Isareli, noke liovina viaco, weya ko Yerusalãi.+
5 Yoava wa eca ku Daviti etendelo liomanu vana va sonehiwa. O Isareli yosi ya tẽla 1.100.000 kalume va limalẽha lolosipata kuenda o Yuda ya tẽla 470.000 kalume va limalẽha lolosipata.+
6 Pole, ovikoti via Lewi levi via Benjamini ka via sonehiwile pokati kavo,+ momo ondaka ya soma ka ya sungulukile ku Yoava.+
7 Ovina viaco via sumuisa Suku yocili kuenje eye wa yambula o Isareli.
8 Noke Daviti wa sapuila Suku yocili hati: “Nda linga ekandu+ linene omo lieci nda linga. Kaliye linga ohenda, ecela oku lueya kukuenje wove,+ momo eci nda linga uveke.”+
9 Kuenje Yehova wa popia la Gadi+ una wa enda oku sapuila ku Daviti ovinjonde via tunda ku Suku hati:
10 “Kuende, sapuila Daviti hati: ‘Ca popia Yehova ceci hati: “Ndi laika oku eca kokuove ayambulo atatu. Nõla eli ndi laika oku nena kokuove.”’”
11 Omo liaco, Gadi weya ku Daviti kuenda wo sapuila hati: “Ca popia Yehova ceci hati: ‘Nõla eci o yongola
12 nda ku kala anyamo atatu onjala,+ nda olosãi vitatu okuti o yuliwa lovanyãli vove osimbu osipata yovanyãli vove yi ku katukila,+ ale nda oloneke vitatu vieyambulo losipata ya Yehova osimbu ku kala efengi vofeka+ kuenje ungelo wa Yehova o nena ekundu+ kocikanjo cosi ca Isareli.’ Kaliye sokolola ketambululo ndi ka eca ku Una wa numa.”
13 Omo liaco, Daviti wa sapuila Gadi hati: “Eci ca tĩla calua kokuange. Mange ohenda, hĩse ndi kupukile peka lia Yehova, momo ohenda yaye yalua calua;+ pole, ku ka ecelele okuti ndi kupukila peka liomunu.”+
14 Noke Yehova wa tuma efengi+ limue vo Isareli kuenje kua fa 70.000 komanu va Isareli.+
15 Handi vali, Suku yocili wa tuma ungelo umue ko Yerusalãi oco a yi kundule; pole, eci a laikele oku ci linga, Yehova wa ci mola kuenda wa livela* omo liefengi liaco+ kuenje wa sapuila ungelo wa laikele oku nena enyõleho liaco hati: “Ci tẽla!+ Eka liove li liwekepo.” Ungelo wa Yehova wa talama ocipepi locimbandi ca Orinane+ u Yevusi.+
16 Eci Daviti a petula ovaso aye, wa mola okuti ungelo wa Yehova o tãi pokati kongongo lovailu losipata+ yimue peka okuti, wa yolũila ko Yerusalãi. Daviti kumue lakulu va li sikĩlĩla locikelẽyi+ kuenda vepuluvi liaco, va petamisa ovipala viavo posi.+
17 Daviti wa sapuila Suku yocili hati: “Hameko hẽ nda tuma oku tenda omanu? Ame, ame nda linga ekandu kuenda ame nda lueya;+ pole, olomeme evi nye via linga? A Yehova Suku yange, mange ohenda, eka liove li mbuile ame kuenda vakuanjo ya isiange; pole, ku ka nene efengi eli komanu vove.”+
18 Noke ungelo wa Yehova wa tuma Gadi+ oco a sapuile Daviti oku lamana loku tungila Yehova utala umue pocimbandi ca Orinane u Yevusi.+
19 Omo liaco, Daviti wa lamana ndondaka ya Gadi, yina eye a popela vonduko ya Yehova.
20 Vepuluvi liaco, Orinane wa ñualapo yu wa mola ungelo kuenje omãla vaye vakuãla vana va kala laye va salama. Orinane wa kala oku sasa otiliku.
21 Eci Daviti a pitĩla kokuaye, Orinane wa vanja, yu wa mõla Daviti kuenje vepuluvi liaco, wa tunda pocimbandi kuenda wa kekamẽla Daviti locipala caye posi.
22 Daviti wa sapuila Orinane hati: “Ndandise* ocitumãlo co pocimbandi oco nungilepo Yehova utala. Ci ndandise vondando yaco yosi, oco efengi li kasi pokati komanu li imũhe.”+
23 Pole, Orinane wa sapuila Daviti hati: “Ci kale cove kuenda ñala yange soma a linge eci co sungulukila.* Ñasi oku eca olongombe viovilumba vioku pia elisi lomakina yoku sasa+ oco yi linge olohũi kuenda otiliku ndocilumba colomema. Ame ndi vi eca viosi.”
24 Pole, Soma Daviti wa sapuila Orinane hati: “Sio, ndi sukila oku ci landa vondando yaco yosi, momo si tambula ocina cove loku ceca ku Yehova ale oku eca ocilumba coku pia elisi okuti, si feti cimue.”+
25 Omo liaco, Daviti wa eca 600 kolosiekele* viulu ku Orinane ndomo ci likuata locitumãlo caco.
26 Kuenje Daviti wa tungila Yehova utala+ pocitumãlo caco kuenda wa eca ovilumba vioku pia elisi lovilumba viombembua kuenje wa vilikiya ku Yehova una wo tambulula poku tuma ondalu+ oku upisa kovailu kilu liutala wocilumba coku pia elisi.
27 Noke Yehova wa handeleka ungelo+ oco a tiuwiye osipata yaye vocilalo cayo.
28 Kotembo yaco, eci Daviti a mola okuti Yehova wo tambuluila pocimbandi ca Orinane u Yevusi, eye wamamako oku lumbila pocitumãlo caco.
29 Otavernakulu ya Yehova yina Mose a tungile vekalasoko kuenda utala wocilumba coku pia elisi, kotembo yaco, via kala pocitumãlo ci kola ko Giveone.+
30 Pole, Daviti ka tẽlele oku enda kocitumãlo caco oco a kũlĩhĩse Suku, momo wa kala lusumba walua, omo liosipata yungelo wa Yehova.
Atosi Pombuelo
^ Ale pamue, “unyãli umue.”
^ Ale “covala kutima.”
^ Lit., “Nyĩhe.”
^ Lit., “eci ca sunguluka kovaso aye.”
^ Osiekele yimosi yi kuete ocilemo ci soka 11.4 kolograma. Tala Alombo. B14.
