Liatete Liasapulo 22:1-19
22 Daviti wa popia hati: “Palo opo pa ka kala onjo ya Yehova Suku yocili kuenda palo opo pa ka kala utala una va Isareli va ka ecaila ovilumba vioku pia elisi.”+
2 Noke Daviti wa handeleka oku ongolola ovingendeleyi via kala+ vofeka yo Isareli kuenje wa eca kokuavo ocikele coku kala vakuakuteta ovawe oco va tete loku pongiya ovawe oku tunga onjo ya Suku yocili.+
3 Daviti wa pongiyavo utale walua woku panga olopeleko viapito olombundi kuenda ovitokeko, losipi yalua okuti ka ca tẽliwile oku yi pesalisa,+
4 handi vali, wa pongiyavo avaya alua osedru,+ momo va Sidono+ la va Turo+ va nenele etendelo lialua liavaya osedru ku Daviti.
5 Kuenje Daviti wa popia hati: “Omõlange Salomone handi umalẽhe, ka kuete uloño*+ walua kuenda onjo yi tungilua Yehova, yi sukila oku posoka calua+ oco okuti ekemãlo liayo lulamba+ wayo vi kũlĩhĩwa kolofeka viosi.+ Kuenje ame ndu pongiyilako.” Omo liaco, Daviti wa pongiya ovikuata vialua osimbu ka file.
6 Noke eye wa vilikiya Salomone omõlaye kuenda wo handeleka oco a tungile onjo yimue Yehova Suku ya Isareli.
7 Daviti wa sapuila omõlaye Salomone hati: “Onjongole yange yo vutima, ya kala yoku tunga onjo yimue yeca esivayo konduko ya Yehova Suku yange.+
8 Pole, ondaka ya Yehova yeya kokuange yiti: ‘Ove wa pesela osonde yalua kuenda wa linga ovoyaki anene. Ku ka tunga onjo yimue yeca esivayo konduko yange,+ momo wa pesela osonde yalua kilu lieve kovaso ange.
9 Tala! Ove o ka kuata omõla+ umue o ka kala ulume umue ukuambembua* kuenje ndi ka eca kokuaye epuyuko kovanyãli vaye vosi vo ñuala,+ onduko yaye yi ka kala Salomone*+ kuenda koloneke viaye ndi ka eca ombembua lekavuluko ko Isareli.+
10 Eye, eye o ka tunga onjo yimue yeca esivayo konduko yange.+ Eye o ka kala omõlange kuenda ame ndi ka kala isiaye.+ Ndi ka kolisa ocalo cusoma waye ko Isareli otembo ka yi pui.’+
11 “Kaliye amõlange, Yehova a kale love oco o sumũlũhe loku tunga onjo ya Yehova Suku yove, ndeci eye a popia catiamẽla kokuove.+
12 Yehova a ku ĩhe olondunge lelomboloko+ eci a ka ku ĩha omoko yoku viala o Isareli oco o lave ocihandeleko ca Yehova Suku yove.+
13 Kuenje o ka sumũlũha nda wa pokola kovisila+ kuenda koviholo vina Yehova a handelekele Mose oku eca ku Isareli.+ Kuata utõi kuenda pama. Ku ka kuate usumba ale oku yokoka.+
14 Lelikolisilo lialua, nda pongiyila onjo ya Yehova 100.000 kolotalendo* viulu, 1.000.000 kolotalendo viopalata kuenda etendelo lialua liosipi, lutale+ okuti ka ca tavele oku vi pesalisa kuenda nda pongiyavo avaya lovawe,+ pole, ove o ka vokiya kovina viaco.
15 O kuete etendelo lialua liolondingupange ndeci: Vakuakuteta ovawe,+ vakuakutunga, olokalupindelu kuenda olomesele viosi via loñoloha kovopange.+
16 Etendelo liulu, opalata, osipi kuenda utale, ka via tẽliwile oku vi tenda.+ Votoka, fetika upange kuenda Yehova a kale love.”+
17 Noke Daviti wa handeleka olombuale viosi vio ko Isareli, oco vi kuatise omõlaye Salomone poku popia hati:
18 “Yehova Suku yene ka kasi hẽ pokati kene kuenda ka ecele hẽ kokuene epuyuko kovanyãli vene vosi vo ñuali? Momo eye wa eca peka liange olonungi viofeka kuenda ofeka yaco ya pokuisua kovaso a Yehova lo kovaso omanu vaye.
19 Kaliye lutima wene wosi, lomuenyo wene wosi nõlipo oku sanda Yehova Suku yene+ kuenda fetiki oku tunga ocitumãlo ci kola ca Yehova Suku yocili,+ oco vu neni ocikasia covisila via Yehova kuenda ovikuata vi kola via Suku yocili+ vonjo yi laika oku tungiwa yeca esivayo konduko ya Yehova.”+
Atosi Pombuelo
^ Ale “ka kolele.”
^ Ya tunda kondaka yo Heveru yi lomboloka, “Ombembua.”
^ Lit., “epuyuko.”
^ Otalendo yimosi yi soka 34.2 kolokilu. Tala Alombo. B14.
