Liatete Liasapulo 23:1-32
23 Eci Daviti a kuka haeye wa kala oku panda koku fa,* wa tumbika Salomone kuviali oco a linge osoma yo Isareli.+
2 Kuenje wongolola olombuale viosi vio Isareli, ovitunda+ kuenda va Lewi.+
3 Va Lewi vosi va kuatele 30 kanyamo lava va pitahãlamo va tendiwa+ ulume lulume. Kuenje etendelo liavo, lia tẽla 38.000.
4 Pokati kavo 24.000 va kuatele ocikele coku songola upange wonjo ya Yehova, 6.000 va kala asongui kuenda olonganji,+
5 kua kalavo 4.000 vakualombundi+ kuenda 4.000 va enda oku eca esivayo+ ku Yehova lovisikilo vina Daviti a popele hati: “Nda vi pongiyila oku eca lavio esivayo.”
6 Noke Daviti wa va tepa vovimunga+ ndomo ci likuata lomãla va Lewi okuti: Gerisiono, Kohata kuenda Merari.+
7 Ku va Gerisiono kua kala Laadana kuenda Simei.
8 Omãla va Laadana va kala Yehiyele usongui, Setama kuenda Yoeli+ okuti, vatatu.
9 Omãla va Simei va kala Selomoti, Hasiyele kuenda Harane okuti, vatatu. Ava ovo va kala asongui volonjo via va isia via Laadana.
10 Omãla va Simei va kala Yahate, Sina, Yewusi kuenda Beriya. Kakuãla kavo va kala omãla va Simei.
11 Yahate wa kala usongui kuenda Sisa wa kala wavali. Pole, omo okuti Yewusi la Beriya ka va kuatele omãla valua, va tendiwile okuti, vakuanjo yimosi kuenda va kuatele ocikele cimuamue.
12 Omãla va Kohata va kala Amirama, Yicihare,+ Hevirone la Usiyele+ okuti, vakuãla.
13 Omãla va Amirama va kala Arone+ la Mose.+ Pole, Arone wa tepiwa ku vakuavo,+ ha kolisa Ohondo yi Kola Koku Kola, eye kumue lomãla vaye, oco va ece ovilumba kovaso a Yehova, oku u vumba loku tukula asumũlũho vonduko yaye otembo yosi.+
14 Catiamẽla ku Mose, ukuenje wa Suku yocili, omãla vaye va tendiwile vocikoti ca va Lewi.
15 Omãla va Mose va kala Gerisiomo+ la Eliyesere.+
16 Pokati komãla va Gerisiomo, Sevuele+ eye wa kala usongui.
17 Kovitumbulukila* via Eliyesere, Rehaviya+ eye wa kala usongui; Eliyesere ka kuatele vali omãla vakuavo, pole, Rehaviya wa kuatele omãla valua.
18 Pokati komãla va Yicihare,+ Selomiti+ eye wa kala usongui.
19 Omãla va Hevirone va kala Yeriya okuti, usongui kuenda Amariya eye wa kala wavali, Yahasiele watatu kuenda Yekameama+ wakuãla.
20 Omãla va Usiyele+ va kala Mika usongui kuenda Yisiya eye wa kala wavali.
21 Omãla va Merari va kala Mahili la Musi.+ Omãla va Mahili va kala Eleasara la Kisi.
22 Eleasara wa fa okuti, ka kuatele omãla valume, pole, wa kuatele lika omãla vakãi. Kuenje omãla va Kisi vana va kala vakuepata* liavo va va kuela.
23 Omãla va Musi va kala Mahili, Edere kuenda Yeremote okuti, vatatu.
24 Ava ovo va kala omãla va Lewi va sonehiwa ndomo ci likuata lolonjo via va isiavo okuti, asongui volonjo via va isiavo. Va Lewi vana va kuatele 20 kanyamo lava va pitahãlamo va tendiwa loku tukuiwa kolonduko oco va linge upange wonjo ya Yehova.
25 Daviti wa popele hati: “Yehova Suku ya Isareli wa eca epuyuko komanu vaye+ kuenda o ka kala ko Yerusalãi otembo ka yi pui.+
26 Handi vali, va Lewi ka va kambata vali otavernakulu ale ovikuata viupange va enda oku talavaya lavio kefendelo.”+
27 Ndomo olonumbi via sulako via Daviti via lekisa, va Lewi vakuanyamo 20 lava va pitahãlamo, va tendiwa.
28 Ocikele cavo ca kala coku kuatisa omãla va Arone+ kupange wonjo ya Yehova loku tata ovitali, olohondo vioku lilamo,+ oku yelisa ovina vi kola kuenda upange wosi u sukiliwa vonjo ya Suku yocili.
29 Ovo va enda oku kuatisa oku linga olombolo via tumbikiwa,*+ osema ya fina yocilumba colomema, olombolo ka vi kuete etumbisa,+ olombolo via yokiwa pociyo, osema ya tengiwa lulela+ kuenda ovilemo viosi lolonjongo viosi.
30 Ovo va sukilile oku eca olopandu loku sivaya Yehova omẽle lomẽle+ kuenda oku ci lingavo koñolosi.+
31 Ovo va enda oku kuatisa olonjanja viosi eci ovilumba vioku pia elisi vi lumbiwa ku Yehova Kasambata,+ koku molẽha kuosãi yokaliye+ kuenda kovipito via sokiyiwa,+ ndomo ci likuata letendelo lieci ca kisikiwile vovihandeleko kuenda va enda oku ci linga olonjanja viosi kovaso a Yehova.
32 Ovo va kuatelevo ovikele vioku tata ombalaka yohongele, locitumãlo ci kola kuenda oku kuatisa vamanjavo okuti omãla va Arone, kupange wonjo ya Yehova.
