Liatete Liasapulo 28:1-21
28 Daviti wongoluila ko Yerusalãi olombuale viosi vio Isareli: olombuale viovikoti, asongui vovimunga+ va kala oku talavayela soma, asongui vohulukãi, asongui vocita,+ asongui ovokuasi osi, loviunda via soma,+ levi viomãla vaye+ oku kongelamo va kesongo kolohoka kuenda alume vosi va pama haivo va loñolõha.+
2 Kuenje Soma Daviti wa votoka loku popia hati:
“Njeveleli, a vamanjange kuenda amanu vange. Onjongole yange yo vutima, ya kala yoku tunga onjo yimue oco yi kale ocitumãlo cepuyuko cocikasia covisila via Yehova kuenda ociliatelo colomãhi via Suku yetu+ kuenje nda linga eliangiliyo lioku tunga.+
3 Pole, Suku yocili wa ndi sapuila hati: ‘Ove ku ka tunga onjo yimue yeca esivayo konduko yange,+ momo wulume umue ukuavita kuenda wa pesela osonde.’+
4 Pole, Yehova Suku ya Isareli wa ndi nõla pokati konjo yosi ya isiange, oco ndi linge osoma yo Isareli otembo ka yi pui,+ momo eye wa nõla Yuda ndusongui+ kuenda vonjo ya Yuda+ wa nõlamo onjo ya isiange, pomãla va isiange eye wa nõlapo ame oco a ndi lingise osoma yo Isareli yosi.+
5 Omo okuti Yehova wa nyĩha omãla valua,+ pokati komãla vange vosi, eye wa nõlapo omõlange Salomone+ oco a tumãle komangu yusoma wa Yehova ko Isareli.+
6 “Eye wa ndi sapuila hati: ‘Omõlove Salomone eye o ka tunga onjo yange lovitali viange, momo ndo nõla ndomõlange kuenda ame ndi ka linga isiaye.+
7 Ndi ka tumbika usoma waye otembo ka yi pui,+ nda eye wamamako oku kapako ovihandeleko viange lolonumbi viange,+ ndeci a kasi oku ci linga cilo.’
8 Omo liaco, ndu sapuili kovaso yo Isareli yosi, ekongelo lia Yehova kuenda kovaso a Suku yetu siti: Pokoli lutate kuenda sandiliyi oku kũlĩha ovihandeleko viosi via Yehova Suku yene, oco wamamiko oku kala vofeka yiwa+ kuenje vu yeca ndocipiñalo ci kala otembo ka yi pui komãla vene.
9 “Love amõlange a Salomone, kũlĩha Suku ya isiove, u vumba lutima wosi*+ kuenda lomuenyo* wosi, momo Yehova o konomuisa ovitima viosi+ loku kũlĩhĩsa ovisimĩlo viosi.+ Nda o sanda, eye ecelela okuti ove u sanga,+ pole, nda wo yanduluka eye o ka ku likala otembo ka yi pui.+
10 Tala, kaliye, Yehova wa ku nõla oco o tunge onjo yimue ndocitumãlo ci kola. Kuata utõi kuenda fetika upange.”
11 Noke Daviti wa eca komõlaye Salomone esokiyo liocindumba+ kuenda violohondo+ vialua via litepa, oku kongelamo olosila vioku seleka, olohondo vio kilu yosapalalo, olohondo viovokati kuenda ohondo yocituviko* cohenda.+
12 Eye wa eca kokuaye esokiyo liovina viosi via situluiwa kokuaye lespiritu lia Suku okuti, viovitali+ vionjo ya Yehova, violohondo viosi vioku lila via ñualako, viohondo yoku seleka ovokuasi vionjo ya Suku yocili kuenda vohondo yoku seleka ovokuasi viovina via kolisiwa.*+
13 Wa ecavo kokuaye olonumbi viatiamẽla kovimunga viovitunda+ kuenda via va Lewi lovina viosi viatiamẽla kupange wonjo ya Yehova kuenda ovikuata viosi viupange wonjo ya Yehova.
14 Eye wa tukulavo ocilemo culu okuti, ulu wovikuata viosi va laikele oku talavaya lavio kovopange a litepa, ocilemo covikuata viosi viopalata kuenda covikuata viosi va laikele oku talavaya lavio kovopange a litepa.
15 Wa tukulavo ocilemo coviyekelo violondiyelo viulu+ kuenda olondiyelo viaco viulu, ocilemo coviyekelo violondiyelo via litepa lolondiyelo viaco kuenda ocilemo coviyekelo violondiyelo viopalata, viociyekelo lociyekelo condiyelo kuenda olondiyelo viaco, ndomo ci likuata locimãho cavio.
16 Handi vali, wa tukula ocilemo culu wolomesa violombolo via tumbikiwa,*+ viomesa lomesa oku kongelamo opalata yolomesa viopalata,
17 ocilemo colongalufu, catiyela kuenda casanga ulu wa fina, locilemo catiyela atito ulu,+ cetiyela letiyela litito kuenda ocilemo catiyela atito opalata, cetiyela letiyela litito.
18 Eye wa ecavo ocilemo culu wa fina coku tunga utala wisensu+ kuenda wocindekaise cekãlu+ ndeci va keruvi+ vulu vana va nyanyumũla avava avo okuti a sikĩlĩla ocikasia covisila via Yehova.
19 Daviti wa popia hati: “Eka lia Yehova lia kala lame kuenda eye wa nyĩha olondunge oco ndi sonehe+ ovina viosi viesokiyo lioku tunga.”+
20 Noke Daviti wa sapuila omõlaye Salomone hati: “Kuata utõi, pama kuenda fetika upange. Ku ka kuate usumba ale oku yokoka, momo Yehova Suku, Suku yange o kasi love.+ Eye ka ka ku siapo, ale oku ku yanduluka,+ pole, eye o ka kala love toke eci upange wosi wonjo ya Yehova u pua.
21 Ovimunga viovitunda+ la va Lewi,+ vi kasi palo oco vi linge upange wosi wonjo ya Suku yocili. Ove o kuete olonalavayi vakuambili haivo va loñolõha koku linga ovopange osi,+ oku kongelamo olombuale+ kuenda omanu vosi vana va ka kuama olonumbi viove viosi.”
Atosi Pombuelo
^ Ale “ombili.”
^ Ale “oku litumbika.”
^ Ale “onjo yoku tuvika akandu.”
^ Ale “ovina via tumbikiwa.”
^ Okuti, olombolo via taliwa.
