Liatete Liasapulo 29:1-30
29 Noke Soma Daviti wa sapuila ekongelo liosi hati: “Omõlange Salomone una Suku a nõla,+ handi umalẽhe, haeye ka kuete uloño*+ walua kuenda upange walua momo oyo hanembeleko* yomunu, pole, ya Yehova Suku.+
2 Ame nda likolisilako oku pongiya oco ku tungiwe onjo ya Suku yange poku angiliya ulu wupange wulu, opalata yupange wopalata, osipi yupange wosipi, utale wupange wutale,+ avaya wupange wavaya,+ ovawe o onixi kuenda ovawe oku laña lonata, ovawe atito oku finisa a kuete avala a litepa, ovawe añi añi a tĩla kuenda ovawe alua o alabastro.
3 Handi vali, omo liocisola ñuetele onjo ya Suku yange,+ kulivo ukuasi wange+ muẽle wulu lopalata vina ndi kasi oku eca konjo ya Suku yange, oco ndi vi vokiye kovina viosi nda pongiyila onjo yi kola,
4 oku kongelamo 3.000 kolotalendo* viulu vio ko Ofiri+ kuenda 7.000 kolotalendo viopalata via yenguluiwa oco va lañe lavio ovimano violonjo,
5 ulu wupange wulu kuenda opalata yupange wopalata lupange wosi wu lingiwa lolomesele. Kaliye helie o lieca olumue etaili lombanjaile yimue peka yoku eca ku Yehova?”+
6 Omo liaco, olombuale violonjo via va isia, lolombuale viovikoti via Isareli, lasongui vohulukãi, lasongui vocita+ kuenda asongui volomĩlu via soma,+ va lieca olumue.
7 Kuenje va eca kupange wonjo ya Suku yocili: 5.000 kolotalendo viulu, 10.000 kolodariku,* 10.000 kolotalendo viopalata, 18.000 kolotalendo viosipi kuenda 100.000 kolotalendo viutale.
8 Omunu wosi wa kuatele ovawe a tĩla wa aca vohondo yoku seleka ukuasi wonjo ya Yehova, una wa kala oku tatiwa la Yehiyele+ u Gerisiono.+
9 Omanu va sanjukila oku eca olombanjaile viaco vi eciwa lutima wosi, momo va eca ovilumba viaco ku Yehova lutima wosi+ kuenda soma Daviti wa kuatavo esanju lialua.
10 Noke Daviti wa sivaya Yehova kovaso yekongelo liosi. Daviti wa popia hati: “A Yehova Suku ya isietu Isareli, o sesamẽla esivayo otembo ka yi pui.*
11 A Yehova, unene,+ lupami,+ lunumbu, leposo kuenda ulamba* viove,+ momo ovina viosi vi kasi kovailu kuenda posi viove.+ Usoma wove, a Yehova.+ Wa li lingisa ove muẽle utue womanu vosi.
12 Ovokuasi lulamba vi tunda kokuove+ kuenje ove o viala ovina viosi+ kuenda peka liove pali unene+ lupami+ kuenje eka liove li tẽla oku lingisa omunu wosi unene+ loku eca ongusu ku vosi.+
13 Kaliye A Suku yetu, tu ku pandula loku sivaya onduko yove ya posoka.
14 “Ame helie kuenda omanu vange ovo velie okuti, tu sukila oku eca olombanjaile ndevi vi eciwa lutima wosi? Momo ovina viosi vi tunda kokuove, letu tua eca kokuove eci ca tunda peka liove muẽle.
15 Kovaso ove etu tuvingendeleyi kuenda tuakombe ndeci vakukululu vetu vosi.+ Momo oloneke vietu kilu lieve vi kasi ndulembo umue+ okuti ka u kuete elavoko.
16 A Yehova Suku yetu, ukuasi wosi owu tua pongiya oco tu tungile onjo yimue onduko yove yi kola, wa tunda peka liove muẽle kuenda wosi wa tiamẽla kokuove.
17 A Suku yange, ame nda kũlĩha ciwa okuti, ove o kũlĩhĩsa utima+ kuenda ove o sanjukila esunguluko.+ Vesunga* liutima wange, nda eca lutima wosi ovina viosi evi kuenda nda sanjukila oku mola omanu vove vana va kasi palo oku eca kokuove ovilumba vi eciwa lutima wosi.
18 A Yehova, Suku ya Avirahama, ya Isake kuenda ya Isareli vakukululu yetu, kapa onjongole eyi lovisimĩlo vovitima viomanu vove otembo ka yi pui kuenda songuila ovitima viavo kokuove.+
19 Kuenje eca utima umue wa sunguluka*+ komõlange Salomone oco eye a pokole kovihandeleko viove,+ kolonumbi viove, koviholo viove kuenda a linge ovina evi viosi loku tunga onembele* yina ame nda lingila eliangiliyo.”+
20 Noke Daviti wa sapuila ekongelo liosi hati: “Kaliye sivayi Yehova Suku yene.” Kuenje ekongelo liosi lia sivaya Yehova Suku ya vakukululu yavo kuenda lia petama loku kekamẽla Yehova kuenda soma.
21 Ovo vamamako oku eca ovilumba ku Yehova kuenda ovilumba vioku pia elisi+ ku Yehova keteke lia kuamamo okuti 1.000 kolonãle, 1.000 kovitupi violomeme, 1.000 kovitupi viotulomeme kuenda ovilumba viavo vioku nyua;+ ovo va lumbilavo o Isareli yosi ovilumba vialua.+
22 Keteke liaco, ovo vamamako oku lia loku nyua kovaso a Yehova lesanju lialua+ kuenje va lingisa Salomone omõla a Daviti osoma onjanja yavali loku u wavekela kovaso a Yehova ndusongui+ kuenda va wavekavo Sadoke ndocitunda.+
23 Noke Salomone wa tumãla kocalo+ ca Yehova ndosoma oku piñainya isiaye Daviti kuenje eye wa litunda ciwa kuenda va Isareli vosi va enda oku pokola kokuaye.
24 Olombuale viosi,+ lasualali va pama+ kuenda omãla vosi va Soma Daviti+ va enda oku pokola ku soma Salomone.
25 Kuenje Yehova wa kemãlisa calua Salomone kovaso yo Isareli yosi kuenda wa eca kokuaye ulamba walua okuti layimue osoma ko Isareli ya u kuatele kosimbu.+
26 Omo liaco, Daviti omõla a Jese wa viala o Isareli yosi,
27 kuenda otembo* yuviali waye ko Isareli ya kala 40 kanyamo. Ko Hevirone eye wa vialako 7 kanyamo+ kuenda ko Yerusalãi wa vialako 33 kanyamo.+
28 Kuenje eye wa fa noke yoku kala komuenyo otembo yalua+ loku sanjukila omuenyo walua,* lukuasi kuenda ulamba; kuenje omõlaye Salomone wa linga osoma pomangu yaye.+
29 Ulandu wa Soma Daviti, tunde kefetikilo toke kesulilo, wa sonehiwa vovisonehua via Samuele ukuavinjonde, via Natana+ uprofeto kuenda via Gadi+ ukuavinjonde,
30 kumue lusoma waye wosi, upami waye kuenda ovolandu olotembo mua kongeliwa eye lo Isareli kuenda olosoma viosi vi sungueko.
Atosi Pombuelo
^ Ale “ka kolele.”
^ Ale “elombe.”
^ Otalendo yimosi yi soka 34.2 kolokilu. Tala Alombo. B14.
^ Odariku ya kala ocingangu cimue culu co ko Persia. Tala Alombo. B14.
^ Ale “tunde ka ku ci toke ka ku ci.”
^ Ale “ekemãlo.”
^ Ale “vocili.”
^ Ale “woku lieca lutima wosi.”
^ Ale “elombe.”
^ Lit., “oloneke.”
^ Lit., “loloneke.”
