Liatete Liasapulo 5:1-26
5 Ava ovo omãla va Ruvene+ omõla uveli wa Isareli. Eye wa kala uveli, pole, omo lioku sepula* ula wa isiaye,+ unuñulu waye wa eciwa komãla va Yosefe+ omõla a Isareli; omo liaco, eye ka kongeliwile vulala wepata lepata oco a kale onuñulu.
2 Ndaño okuti, Yuda+ wa velelepo vamanjaye kuenda vokuaye mua tunda una wa laikele oku kala usongui,+ pole, unuñulu wa eciwa ku Yosefe.
3 Omãla va Ruvene uveli wa Isareli, va kala Hanoke, Falu, Hecirone kuenda Karimi.+
4 Omãla va Yoeli va kala Semaya omõlaye, Goge omõlaye, Simei omõlaye,
5 Mika omõlaye, Raya omõlaye, Baale omõlaye,
6 kuenda Beera omõlaye, una Soma Tigilati-Pinesere+ wo ko Asuria ambatele kumandekua; eye wa kala usongui umue wa va Ruvene.
7 Vamanjaye ndomo ci likuata lapata avo vana va sonehiwa vulala wepata lepata ndomo ci likuata lovitumbulukila viavo, va kala Yeyele usongui, Sakariya,
8 kuenda Bela omõla a Asasa omõla a Sema omõla a Yoeli, una wa kala kofeka yupisa ko Aroere+ toke ko Nevo kuenda ko Baale-Meone.+
9 Kutundilo eye wa tunga toke kefetikilo liekalasoko Kolui Ferati,+ momo oviunda viavo via livokiyile calua vofeka yo Gileada.+
10 Koloneke via Saulu, ovo va linga uyaki la va Hagere kuenje va va yula, ovo va kala volombalaka viavo vocikanjo cosi co kutundilo wo Gileada.
11 Ovitumbulukila via Gadi, via kala ocipepi lavo vofeka yo Basiane toke ko Saleka.+
12 Ko Basiane, Yoeli wa kala usongui, Siafama wa kala wavali kuenda kua kalavo Yaanai la Siafata.
13 Kuenje vamanjavo vana va tiamẽlele kolonjo via va isiavo va kala Mingeli, Mesiulama, Sieva, Yorai, Yakana, Sia kuenda Evere okuti, vosi yavo va soka epanduvali.
14 Ava ovo va kala omãla va Avihayili omõla a Huri omõla a Yaroha omõla a Gileada omõla a Mingeli omõla a Yesisiai omõla a Yahido omõla a Busi.
15 Ahi omõla a Avidiyele omõla a Guni, wa kala usongui wonjo ya va isiavo.
16 Ovo va kala ko Gileada,+ ko Basiane+ lo kovaimbo a sungueko kuenda kovisenge viosi via Siarone vioku lisila oviunda, toke oku via sulila.
17 Vosi yavo va sonehiwile vulala wepata lepata koloneke via Yotama Soma+ ya Yuda kuenda koloneke via Yerevoama*+ Soma ya Isareli.
18 Va Ruvene, va Gadi kuenda onepa yimue yocikoti ca Manase, va kuatele eci ci soka 44.760 kasualali va pama volohoka viavo vana vambatele oviyepelo, lolosipata loku limalẽha lolohonji* kuenda ovo va pindisiwile kuyaki.
19 Ovo va linga uyaki la va Hagere, la Yeturi,+ la Nafisi+ kuenda la Nodava.
20 Eci ovo va kala oku liyaka lavo, Suku wa va kuatisa kuenda wa eca peka liavo va Hagere la vosi vana va kala lavo, momo ovo va pinga ekuatiso kokuaye vokuenda kuyaki kuenda eye wa tambulula epingilo liavo momo vo kolelele.+
21 Ovo va tambula oviunda viavo okuti, 50.000 violongamelo, 250.000 violomeme, 2.000 viovimbulu kuenda 100.000 komanu.
22 Ovanyãli valua va pondiwa momo uyaki wa kala oku lingiwa la Suku yocili.+ Kuenje ovo va tunga vofeka yomanu vaco toke kotembo yumandekua.+
23 Ovitumbulukila vionepa yimue yocikoti ca Manase+ via kala vofeka oku upisa ko Basiane toke ko Baale-Herimone kuenda ko Senire lo Komunda Herimone.+ Ovio via luile calua.
24 Ava ovo va kala asongui volonjo via va isiavo: Efere, Yisi, Eliyele, Asiriyele, Yeremiya, Hodaya kuenda Yahidiyele; ovo va kala asualali va pama, alume va kemãla kuenda asongui volonjo via va isiavo.
25 Pole, ovo va lingila ekandu Suku ya vakukululu yavo kuenda ovo va linga ukahonga lolosuku viomanu vo kofeka+ yina Suku a kunduile kovaso avo.
26 Omo liaco, Suku ya Isareli wa vetiya espiritu lia Soma Pulu wo ko Asuria+ (okuti, Soma Tigilati-Pinesere+ wo ko Asuria) kuenje eye wambata kumandekua va Ruvene, la va Gadi kuenda onepa yimue yocikoti ca Manase kuenje wa va nena toke ko Hala, ko Havore, ko Hara kuenda kolui Gosane+ kuna ovo va kasi toke etaili.
Atosi Pombuelo
^ Ale “oku lavisa.”
^ Okuti, Yerevoama II.
^ Lit., “kuenda va enda oku liata ohonji.”
