Elivulu Liatete Lia Samuele 21:1-15
21 Noke Daviti weya ko Nove+ ku Ahimeleke ocitunda. Ahimeleke wa fetika oku luluma eci a lisanga la Daviti kuenje wo pula hati: “Momo lie weyilila lika liove okuti, lomue wa ku kuama?”+
2 Daviti wa tambulula Ahimeleke ocitunda hati: “Soma wa numa oku linga cimue, pole, wa popia hati: ‘Ku ka sapuileko laumue upange nda ku tuma lolonumbi nda ku ĩha.’ Nda likunda lakuenje vange oco tu lisange pocitumãlo cimue.
3 Kaliye nda o kuete olombolo vitãlo, vi nyĩhe ale cimue cikuavo o kuete.”
4 Pole, ocitunda ca tambulula Daviti citi: “Ka kuli ombolo yaño, kuli lika ombolo yi kola,+ citava okuti, vu yi lia nda akuenje vove ka va la lipekela lakãi.”+
5 Daviti wa tambulula ocitunda hati: “Kolela okuti, akãi va kala ocipãla letu ndeci olonjanja vikuavo eci tua endele kuyaki.+ Nda kupange waño atimba akuenje vaco a kola, ca piãla enene etaili te a kola!”
6 Ocitunda co wĩha olombolo vi kola,+ momo ka pa kaile vali olombolo vikuavo te lika olombolo via taliwa, vina viopiwa kovaso a Yehova oco vi piñanyiwe lolombolo viokaliye keteke va viupapo.
7 Keteke liaco, upika umue wa Saulu opo a kala. Eye wa kisikiwa oku kala kovaso a Yehova. Onduko yaye Doege+ u Edome,+ haeye usongui wangombo va Saulu.
8 Noke Daviti wa sapuila Ahimeleke hati: “Anga hẽ ove o kuete unga umue ale osipata? Sia nenele osipata yange, ale ovimãleho viange viuyaki, momo upange soma a numa wonjanga.”
9 Ocitunda citi: “Kulo tu kuete osipata ya Goliata+ u Filisiti, una ove wa ponda Vocimbota* co Ela,+ ya muñiwa vuwalo konyima yevendalia.+ Nda o yongola oku yi tikula oco yi kale yove citava, momo oyo lika tu kuete kulo.” Daviti hati: “Ka kuli osipata ya lisoka leyi. Yi nyĩhe.”
10 Keteke liaco, Daviti wa votoka wamamako lungende waye woku tila+ Saulu kuenje wa enda ku Soma Akisi wo ko Gati.+
11 Apika va Akisi vo pula vati: “U siti Daviti soma yofeka? Siti eye una ovo va imbila ocisungo eci va kala oku piluka loku popia vati:‘Saulu wa ponda olohulukãi,Kuenda Daviti wa ponda ekũi liolohulukãi’?”+
12 Daviti wa sokolola kolondaka viaco kuenje wa kuatela usumba+ Soma Akisi wo ko Gati.
13 Osimbu a kala pokati kavo*+ eye wa likembisa ndeyui. Wa fetika oku soneha olondimbukiso polombundi kuenda wa ecelela okuti ovate aye a lokila kolonjele.
14 Noke Akisi wa sapuila apika vaye hati: “Ene wa moli okuti, ulume u eyui! Momo lie wo neneli kokuange?
15 Siti ndi kuete ale alume valua ayui, handi vu ndi nenela vali umue? Momo lie ulume u a eceliwa oku iñila vonjo yange?”
