Elivulu Liavali Liasapulo 3:1-17
3 Salomone wa fetika oku tunga onjo ya Yehova+ vo Yerusalãi Komunda Moriya+ kuna Yehova a molẽhele ku isiaye Daviti,+ pocitumãlo Daviti a pongiyile pocimbandi ca Orinane+ u Yevusi.
2 Eye wa fetika oku tunga keteke liavali, liosãi yavali kunyamo wakuãla wuviali waye.
3 Kuenje ociseveto Salomone a seveta oco a tunge onjo ya Suku yocili, ca kuata 60 kovikeya kusõvi kuenda 20 kovikeya vupati+ ndomo ci likuata loseteko yosimbu.*
4 Ocindumba co kovaso ca kuatele 20 kovikeya kusõvi, ndomo ci likuata lupati wonjo* kuenda oku lepa kuayo kua sokele 120;* kuenje eye wa ci laña vokati lulu wa fina.+
5 Eye wa posuisa onjo yinene lavaya ongaye, noke wa yi laña lulu wa fina+ kuenje wa yi posuisa loviluvialuvia viuti weva+ kuenda lalienge.+
6 Handi vali, wa posuisa onjo lovawe a tĩla a-o a fina;+ kuenje ulu+ a talavaya lawo wa kala ulu wo ko Parawayi.
7 Eye wa laña lulu onjo, olohangalo, ivelo, ovimano kuenda apito aco;+ kuenje wa sokotuila vakeruvi vovimamo.+
8 Eye wa panga Ohondo yi Kola Koku Kola;*+ usõvi waco wa lisokele lupati wonjo okuti, 20 kovikeya kuenda vupati waco wa kuata 20 kovikeya. Eye wa yi laña leci ci soka 600 kolotalendo* viulu wa fina.+
9 Ocilemo culu wolopeleko ca kala 50 kolosiekele;* kuenje eye wa laña lulu olohondo viosapalalo.
10 Noke Vohondo yi Kola Koku Kola* wa songelamo va keruvi vavali kuenje wa va laña lulu.+
11 Usõvi wavava osi a va keruvi+ a kuatele 20 kovikeya; evava limue liu keruvi watete, lia kuatele ovikeya vitãlo kusõvi kuenda lia lamba vocimano conjo kuenda evava likuavo lia kuatele ovikeya vitãlo kusõvi kuenda lia lamba kevava limue liu keruvi ukuavo.
12 Evava limue liu keruvi ukuavo, lia kuatele ovikeya vitãlo kusõvi kuenda lia lamba vocimano cikuavo conjo kuenda evava liayo likuavo lia kuatele ovikeya vitãlo kusõvi kuenda lia lamba kevava limue liu keruvi watete.
13 Avava a va keruvi vaco, a nyanyumuĩwa eci ci soka 20 kovikeya; kuenje ovo va talama kuenda va imba ovaso vokati.*
14 Eye wa tongavo ongumbo+ yonanga yonoloti, leyi yi vumbula, yi kusuka kuenda yonanga yovalatanya kuenje wa tutilamo oviluvialuvia via va keruvi.+
15 Noke wa tunga olongunji vivali+ kovaso yonjo, vi kuete 35 kovikeya vutunga kuenda utue wosungu yongunji longunji, wa kuatele ovikeya vitãlo.+
16 Eye wa panga alienge ndolomota vio posingo kuenje wa a kapa kosungu yolongunji kuenda wa panga 100 kolo romã kuenje wa vi kapa kalienge.
17 Eye wa tumbika olongunji kovaso yonembele, yimue kondio* kuenda yikuavo kepĩli;* eye wa luka yo konele yondio hati, Yakini* kuenda yo kepĩli Boasi.*
Atosi Pombuelo
^ Ukeya wa siata, u soka 44.5 kolosentimetulu, pole vamue va sima okuti, “oseteko yosimbu” yi tiamisiwila kukeya wa lepa u soka 51.8 kolosentimetulu. Tala Alombo. B14.
^ Oseteko yaco ka ya suilepo.
^ Ale “20 kovikeya via sanjavala vupati wonjo.”
^ Otalendo yimosi yi soka 34.2 kolokilu. Tala Alombo. B14.
^ Ale “onjo yi Kola Koku Kola.”
^ Osiekele yimosi yi kuete ocilemo ci soka 11.4 kolograma. Tala Alombo. B14.
^ Ale “onjo yi Kola Koku Kola.”
^ Okuti, ya imba ovaso Kohondo yi Kola.
^ Ale “kombuelo.”
^ Ale “konano.”
^ Ci lomboloka “Eye [okuti Yehova] a Kolise.”
^ Pamue ci lomboloka “Kongusu.”
