Ukanda Wavali ku va Tesalonike 3:1-18
3 Oku sulako, a vamanji, amamiko oku tu likutililako+ okuti, ondaka ya Yehova* yamamako oku lisandula lonjanga+ loku sivayiwa ndeci ci kasi oku pita lene,
2 kuenda oco tu popeliwe komanu vãvi+ haivo olondingaĩvi, momo havosiko va pondola oku kuata ekolelo.+
3 Pole, Ñala wa kolelua kuenda eye o ko pamisi loku vu teyuili kondingaĩvi.
4 Handi vali, tu kuete ekolelo ku Ñala catiamẽla kokuene okuti, vu kasi oku kuama olonumbi tuo wĩhi kuenda vu kamamako oku ci linga.
5 Tu likutilila okuti, Ñala amameko oku songuila ovitima viene, oco ene vu soli Suku+ kuenda vu kuata epandi li sukiliwa oco wamamiko+ oku kuama Kristu.
6 Cilo a vamanji, tu kasi oku eca kokuene olonumbi vonduko ya Ñala yetu Yesu Kristu okuti, vu litepa la manji wosi wa sina,+ haeye ka pokola kelongiso* ene* wa tambuli kokuetu.+
7 Momo ene muẽle wa kũlĩhi ndomo vu tu setukula,+ omo ka tua lekisile esino eci tua kala pokati kene,
8 pamue oku pinga okulia ocali.*+ Pole, tua likolisilako oku talavaya uteke lutanya oco ka tu ka kokele ocilemo komunu umue pokati kene.+
9 Ka ci lekisa okuti, ka tu kuete omoko+ yoku vu tambuli cimue, pole, tua yonguile oku li lekisa ndongangu kokuene okuti, vu yi setukula.+
10 Momo eci tua kala lene, tua enda oku wĩhi onumbi eyi yokuti: “Nda umue ka yongola oku talavaya, ka ka lie.”+
11 Momo tua yeva okuti, vamue pokati kene+ va kasi oku lekisa esino kuenda ka va yongola oku talavaya, haivo va litenga vovitangi viamãle.+
12 Catiamẽla komanu vaco tuo handeleki, loku vu lunguli vu Ñala Yesu Kristu okuti, ovo va sukila oku talavaya loku omboka kuenda va sukila oku lia okulia kuesalamĩho liavo muẽle.+
13 A vamanji, catiamẽla kokuene ko ka liwekipo oku linga eci ciwa.
14 Pole, nda umue ka pokola kondaka yetu pocakati cukanda ulo, kũlĩhĩsi omunu waco kuenda ko ka kuati ukamba laye,+ oco a kutisiwe osõi.
15 Ka vu ko tendi ndunyãli, pole, amamiko oku u lungula+ nda manji.
16 Tu likutilila oco okuti, Ñala yombembua o wĩhi ombembua olonjanja vialua kolonepa viosi.+ Ñala a kale la vosi yene.
17 Ame ndi Paulu ndi tuma ovilamo nda soneha leka liange muẽle+ okuti, ovio ondimbukiso kovikanda viosi; eyi oyo onjila ndomo ndi soneha.
18 Ohenda ya piãla ya Ñala yetu Yesu Kristu, yi kale la vosi yene.
