Wavali wa Yoano 1:1-13
1 Ame ndulume wa kuka,* ndi sonehela manji ukãi* wa nõliwa, kumue lomãla vaye vana ndi sole cocili, pole, hameko lika, la vosi va kũlĩha ocili,
2 omo liocili camamako vokuetu kuenda ci ka kala letu otembo ka yi pui.
3 Ohenda ya piãla, locali, lombembua vi tunda ku Suku Isia kuenda ku Yesu Kristu Omõla a Isia, kumue locili kuenda ocisola, vi ka kala letu.
4 Nda sanjuka calua momo nda sanga okuti vamue pokati komãla vove va kasi oku endela vocili,+ ndomo tua tambula ocihandeleko ca tunda ku Isia.
5 Omo liaco, okãi, kaliye ndu ku pinga okuti, tu li sola pokati. (Si kasi oku ku sonehela ocihandeleko cokaliye, te ocihandeleko cosimbu, cina tu kasi laco tunde kefetikilo.)+
6 Ocisola ci lomboloka okuti, tu enda ndomo ci likuata lovihandeleko viaye.+ Ndeci wa ci yevi tunde kefetikilo ocihandeleko caco ceci cokuti, vu sukila oku amamako oku endela vocisola.
7 Momo olondimbiki vialua via molẽha voluali,+ haivio ka vi limbuka okuti, Yesu Kristu weyile palo posi ndomunu.+ Omunu o ci linga ondimbiki haeye antikristu.*+
8 Lunguki oco ka vu ka pumbi ovina wa likolisiliko oku talavaya okuti, vu tambula onima ya suapo.+
9 Wosi o vokiya kelongiso lia Kristu kuenda kamamako kelongiso liaco, ka taviwa la Suku.+ Wosi amamako kelongiso liaco, eye o taviwa la Isia kuenda Lomõla.+
10 Nda umue iya kokuene kuenje ka nena elongiso eli, ku ko tambuli kolonjo viene,+ ndaño oku u lama.
11 Momo wosi u lama, o panga onepa kovilinga viaye vĩvi.
12 Ndaño ñuete ovina vialua vioku vu soneheli, si yongola oku ci linga lopapelo kuenda otinda, puãi ndi lavoka oku iya kokuene, oco tu sapele polo la polo okuti, esanju liene li suapo.
13 Omãla va manjove ukãi okuti wa nõliwa, va ku tumisa ovilamo.
Atosi Pombuelo
^ Ale “Ukulu.”
^ Lit., “ndona.” Ondaka eyi yi tiamisiwila kekongelo limue.
^ Ale “unyãli wa Kristu.”
