Esekiele 10:1-22
10 Osimbu nda kala oku vanja, nda muila kilu liosi yovitulu* yina ya kala kilu liovitue via va keruvi, ocina cimue ci kasi ndewe liosafira kilu liavo kuenda emolẽho liocina caco, lia kala ndocalo cimue.+
2 Noke Suku wa sapuila ulume wa wala uwalo wovalatanya hati:+ “Iñila pokati kalola,+ vemẽhi lia va keruvi kuenda yukisa ovaka ove lakala ataima+ opiwa pokati ka va keruvi kuenda imba akala aco volupale.”+ Omo liaco, eye wa iñila osimbu nda kala oku vanja.
3 Va keruvi va kala konele yondio yonembele eci ulume a iñila kuenda elende lia sikĩlĩla ocitali co vokati.
4 Noke ulamba wa Yehova+ wa tunda ku va keruvi kuenda wa enda kolukuki wepito lionembele kuenda onembele ya yukisiwa lelende+ kuenda ocitali ca yukisiwa locinyi culamba wa Yehova.
5 Noke onjuvungo yavava a va keruvi ya yeviwa kocitali co kosamua, ndonjuvungo ya Suku Ukuonene Wosi eci a vangula.+
6 Kuenje eye wa handeleka ulume wa wala uwalo wovalatanya hati: “Tikula ondalu yi kasi pokati kalola, pokati ka va keruvi,” noke eye wa iñila kuenda wa talama konele yelola.
7 Noke umue pokati ka va keruvi woluĩla eka liaye kondalu ya kala pokati ka va keruvi.+ Wa tikula onepa yimue yondalu kuenje wa yi kapa povaka wulume wa wala uwalo wovalatanya,+ una wa yi kuata kuenje wa enda.
8 Vemẽhi liavava a va keruvi mua kala cimue ci kasi ndovaka omanu.+
9 Osimbu nda kala oku vanja, nda mola alola akuãla konele ya va keruvi, konele lonele ya va keruvi kua kala elola limue kuenda alola aco a kala oku nina ndewe lio krisolitu.+
10 Catiamẽla kemolẽho liao, kakuãla ka-o a li setahãlele ndu okuti, elola limue li kasi vokati kelola likuavo.
11 Poku enda, a ponduile oku enda kolonele viosi vikuãla okuti ka a ñuala osimbu a enda, momo o-o a enda oku loña kuna utue wa suñamẽla okuti ka a ñuala.
12 Atimba osi a va keruvi, olonyima viavo, ovaka avo kuenda avava avo eyukile ovaso kolonele viosi. Kakuãla kavo va kuata alola kolonele viavo kuenda eyukilevo ovaso.+
13 Catiamẽla kalola, nda yeva ondaka yimue ya vilikiya yiti: “Ñuali!”
14 U keruvi lu keruvi wa kuata ovipala vikuãla. Ocipala catete ca kala cu keruvi, ocipala cavali ca kala comunu,* ocipala catatu ca kala cohosi kuenda ocipala cakuãla ca kala congonga.+
15 Kuenje va keruvi va votoka, ovo va kala oviluvo* vimuamue vina nda muile kolui Kevare,+
16 kuenda eci va keruvi va enda, alola a ponduile oku endela konele yavio kuenda eci va keruvi va votola avava avo oco va katuke posi, alola ka a ñuala ale oku ñualela konele yavo.+
17 Eci ovo va talama, alola a talamavo kuenda eci va votoka alola a votokelavo kumue lavo, momo espiritu lina lia kala oku songuila oviluvo* viaco, lia kalavo valola.
18 Noke ulamba wa Yehova+ wa tunda kolukuki luonembele kuenda wa talama kilu lia va keruvi.+
19 Va keruvi va votola avava avo kuenda va katuka posi osimbu nda kala oku vanja. Eci va tunda, alola a endavo konele yavo. Va talama ocipepi lombundi yonele yokutundilo yonembele ya Yehova kuenda ulamba wa Suku ya Isareli wa kala kilu liavo.+
20 Ovio via kala oviluvo vi kasi lomuenyo* vina nda mola vemẽhi lia Suku ya Isareli kolui Kevare,+ omo liaco, nda limbuka okuti ovio via kala va keruvi.
21 Kakuãla kavio via kuata ovipala vikuãla, avava akuãla kuenda vemẽhi liavava mua kala cimue ci kasi ndovaka omunu.+
22 Emolẽho liovipala viavo, lia kala ndovipala nda muile kolui Kevare.+ Ociluvo lociluvo ca suñamẽla kovaso.+
Atosi Pombuelo
^ Ale “yovindalasa.”
^ Ale “culume.”
^ Lit., “ca kala ociluvo.”
^ Lit., “espiritu liociluvo.”
^ Lit., “Eci ociluvo ci kasi lomuenyo.”
