Esekiele 13:1-23
13 Ondaka ya Yehova yeya vali kokuange yiti:
2 “A mõlomunu, imba owanji watiamẽla kovaprofeto va Isareli+ kuenda sapuila vana va luvikiya owanji*+ wavo muẽle hoti: ‘Yeveleli ondaka ya Yehova.
3 Ca popia Ñala Tõlo Yehova ceci hati: “Ngongo yovaprofeto aveke, vana va imba owanji wovisimĩlo viavo muẽle ndaño okuti, ka va tambuile ocinjonde cimue ca tunda kokuange.+
4 A Isareli, ovaprofeto vove va linga ndolombulu pokati kovingululu.
5 Ene ka vu ka enda kapangu ovimbaka viovawe oco vu a tumbuluili onjo ya Isareli+ oco okuti, o Isareli yamamako oku kolapo kuyaki weteke lia Yehova.”+
6 “Ovo va kuete ovinjonde viuhembi kuenda va imba owanji wuhembi, poku popia vati: ‘Eyi ondaka ya Yehova,’ ndaño okuti Yehova ka va tumĩle kuenda va sima okuti eye o ka tẽlisa ondaka yavo.+
7 Anga hẽ ovinjonde vu kuete haviuhembiko? Kuenda ka wa imbili hẽ owanji wene wuhembi poku popia hoti: ‘Eyi ondaka ya Yehova,’ ndaño sia popele cimue?”’
8 “‘Omo liaco, ca popia Ñala Tõlo Yehova ceci hati: “‘Omo okuti ene vu popia uhembi kuenda ovinjonde viene viuhembi, ame ndu vu katukili,’ oco Ñala Tõlo Yehova a popia.”+
9 Eka liange li katukila ovaprofeto vana va kuete ovinjonde viesanda haivo va popia uhembi.+ Ovo ka va ka kala pokati komanu va koleliwa; ndaño oku sonehiwa vulandu wonjo ya Isareli; ale oku tiuka kofeka ya Isareli; kuenda vu ka kũlĩha okuti, ame Ñala Tõlo Yehova.+
10 Ovina viaco viosi via pita omo okuti va yapuisa omanu vange poku popia vati: “Kuli ombembua!” osimbu ka kuli ombembua.+ Eci ku tungiwa ocimbaka cimue ca hongua, va ci laña lohala.’*+
11 “Sapuila vana va laña ocimano lohala okuti, ci ka kupuka. Ku ka loka ombela yalua, ku ka loka ociwe* kuenda ofela yalua yi ka kupula ocimano caco.+
12 Kuenje eci ocimano ci kupuka, va ko pulisi hati: ‘Ocimbaka wa lañi lohala ci kasi pi?’+
13 “Omo liaco, Ñala Tõlo Yehova wa popia hati: ‘Vonyeño yange mu ka tunda ofela yalua, ku iya ombela yalua voku tema kuange kuenda vonyeño yange yoku nyõla ndi ka lokisa ombela yociwe.
14 Ndi ka nyõla ocimbaka cina wa lañi lohala kuenda ndi ka ci kupuila posi kuenda ociseveto calio ci ka kũlĩhĩwa. Eci olupale lu ka kupuka, ene vu ka kunduiwi lawo; kuenda vu ka kũlĩha okuti, ame ndi Yehova.’
15 “‘Eci ndi ka lekisa onyeño yange yosi kocimbaka kuenda ku vana va laña ohala kocimano caco, ndi ka vu sapuili siti: “Ocimbaka ka ci kasiko vali kuenda ka kuli vali vana va laña ohala kocimano caco.+
16 Ovaprofeto va Isareli ka va kasiko vali, vana va enda oku imba owanji ko Yerusalãi kuenda vana va mola ovinjonde viatiamẽla kombembua+ osimbu okuti, ka kuli ombembua,”’ oco Ñala Tõlo Yehova a popia.
17 “Catiamẽla kokuove a mõlomunu, ñualisa ocipala cove poku katukila omãla vakãi vomanu vove, vana va luvikiya ovitumasuku viavo muẽle kuenda imba owanji woku va katukila.
18 Va sapuila hati: ‘Ca popia Ñala Tõlo Yehova ceci hati: “Ngongo yakãi vana va li tongela ovinunga kovoko* avo osi kuenda oku tonga oloveu vioku kapa kovitue viomanu vakuavitunga viosi oco va kembe omanu poku kapa kohele omuenyo wavo! Anga hẽ vu pondola oku yeva ovimuenyo viomanu vange loku seteka oku popela omuenyo wene?
19 Anga hẽ ene vu ka ndi sepula pokati komanu vange omo liapupu osevata kuenda olosisi viombolo+ poku ponda vana ka va sesamẽla oku fa, loku supisapo vana ka va sesamẽla oku kala lomuenyo, poku sapuila uhembi omanu vange, vana va yevelela ovohembi ene?”’+
20 “Omo liaco, Ñala Tõlo Yehova wa popia hati: ‘Ene akãi, ñatukila ovinunga viene, vina ene vu yeva lavio omanu ndolonjila kuenda ame ndi vi tukũla kovoko ene loku yovola vana va kasi oku yeviwa ndolonjila.
21 Ndi ka tukũla oloveu viene kuenda ndi ka yovola omanu vange peka liene kuenje ka va ka kala vali ndocina cimue coku yeva kokuene; kuenda vu ka kũlĩha okuti, ame ndi Yehova.+
22 Momo ene wa sumuisi ukuesunga lovohembi ene+ eci sia nenele ohali* kokuaye kuenda ene wa pamisi ovaka ondingaĩvi+ oco eye ka ka liwekepo kevĩho liaye okuti amamako lomuenyo.+
23 Omo liaco, ene akãi ka vu ka mola vali ovinjonde viuhembi kuenda ka ku ka lingiwa vali ovilinga vioku tãha;+ kuenje ame ndi ka yovola omanu vange povaka ene kuenda ene vu ka kũlĩha okuti, ame ndi Yehova.’”
Atosi Pombuelo
^ Ale “vana va imba owanji wo vutima wavo muẽle.”
^ Okuti, oku tunga ocimano cimue ca hongua kuenda va ci lingisa ndu okuti ca pama poku ci laña lohala.
^ Lit., “kuenda Ene aciwe.”
^ Okuti, ovinunga vioku tãha vi kasi kohokolua ale kokuokuo.
^ Ale “evalo.”
