Esekiele 16:1-63
16 Ondaka ya Yehova yeya vali kokuange yiti:
2 “A mõlomunu, ecelela okuti o Yerusalãi yi kũlĩha ovilinga viayo viumbondo.+
3 O sukila oku popia hati: ‘Eci oco Ñala Tõlo Yehova a sapuila o Yerusalãi hati: “Ocikoti cove kuenda oku citiwa kuove via kala kimbo lia va Kanana. Isiove wa kala u Amori+ kuenda ina yove wa kala u Hiti.+
4 Catiamẽla koku citiwa kuove, keteke wa citiwa, ohopa yove ka ya tetiwile, ka va ku sukuile lovava oco o yele, ka va ku sieketele omongua, ndaño oku ku muñila polonanga.
5 Lomue wa ku kuatela ohenda oco a ku lingile ovina viaco. Lomue wa ku kuatela ocikembe. Pole, ove wa imbiwa voluayela momo ove wa suvukiwa keteke wa citiwa.
6 “‘“Eci nda kala oku pita, nda ku mola okuti wa liyala vosonde yove muẽle loku senga senga olomãhi lovolu ove kuenda osimbu wa liyala vosonde yove muẽle, nda popia hati: ‘Amamako lomuenyo!’ Ocili, osimbu ove wa liyala pocitumãlo caco vosonde yove, nda ku sapuila hati: ‘Amamako lomuenyo!’
7 Nda ku lingisa owiñi walua, ndovikũla vi tunda osongo vepia, ove wa kula kuenda wa lepa kuenje wa wala ovina via fina vioku liposuisa. Avele ove a tãi kuenda esinga liove lia kula; pole, ove handi wa kala epõlõla.”’
8 “‘Eci nda kala oku pita loku ku mola, nda limbuka okuti wa kuatele ale utunga woku soliwa. Omo liaco, nda ku walisa uwalo* wange loku sitika epõlõla liove+ kuenje nda lisila love kuenda nda linga love ocisila cimue,’ oco Ñala Tõlo Yehova a popia, ‘kuenje ove wa linga wange.
9 Handi vali, nda ku sukula lovava kuenda nda puenya osonde yove kuenje nda ku sieketa ulela.+
10 Noke nda ku walisa luwalo umue wa tutiwa loku eca kokuove olohaku viocipa* ciwa kuenda nda ku muñila vuwalo umue wovalatanya kuenda nda ku walisa luwalo umue wa tĩla calua.
11 Nda ku finisa lovina vioku li posuisa, nda kapa ovinunga kovoko ove kuenda omota posingo yove.
12 Nda kapavo ocinunga kenyulu liove kuenda ovimbilingu kovatũi ove lekolowa limue lia fina kutue wove.
13 Ove wamamako oku li posuisa lulu kuenda lopalata kuenje uwalo wove wa kala wovalatanya, olonanga via tĩla kuenda uwalo wa tutiwa. Okulia kuove kua kala osema ya fina, owiki lulela kuenda ove wa posoka calua+ kuenje wa lipongiyila oku kala nasoma.’”*
14 “‘Oluhimo* luove lua fetika oku lisanduila kolofeka+ omo lieposo liove momo eposo liove lia lipuile omo liulamba wange nda kapele kokuove,’+ oco Ñala Tõlo Yehova a popia.”
15 “‘Pole, ove wa fetika oku kolela keposo liove+ kuenda wa linga ocipuepue omo lioluhimo luove.+ Wa piãlisa ovilinga viove viupuepue la vosi va kala oku pita+ kuenda eposo liove lia linga liavo.
16 Ove wa tikula amue pokati kovowalo ove kuenda wa tunga ovitumãlo via lepa+ haivio via fina muna ove wa enda oku lingila upuepue okuti ovina viaco, nda ka via lingiwile kuenda lalimue eteke via sukilile oku pita.
17 Handi vali, ove wa tikula ovina viove via fina vioku li posuisa via pangiwa lulu kuenda lopalata vina nda ecele kokuove kuenje wa vi panga oviñumañuma vialume kuenje wa linga lavio upuepue.+
18 Ove wa tikula ovowalo ove a tutiwa kuenda wa vi sikĩlĩla* kuenje wa eca kokuavio ulela wange kuenda insensu viange.+
19 Ombolo yina nda ecele kokuove okuti ya pangiwa losema ya fina, lulela kuenda owiki, yina nda ecele kokuove oco o yi lie, ove wa yecavo kokuavo ndelemba limue liwa.* Eci oco muẽle ca pita,+ oco Ñala Tõlo Yehova a popia.”
20 “‘Ove wa tikula omãla vove valume lomãla vove vakãi vana ove wa ndi citila+ kuenda wa va lumba koviteka.+ Anga hẽ ovilinga viove viupuepue ka vi tẽla?
21 Ove wa ponda omãla vange valume kuenda wa va eca ndocilumba poku va yoka vondalu.*+
22 Osimbu wa kala oku linga ovina viosi viumbondo lovilinga viupuepue, kua ivalukile oloneke viove viutila eci wa kala epõlõla okuti, wa liyalele vosonde yove muẽle loku senga senga olomãhi lovolu ove.
23 Noke yoku linga ovina viosi vĩvi, ngongo yove, ngongo yove,’+ oco Ñala Tõlo Yehova a popia.
24 ‘Ove wa li tungila ocitumãlo cefendelo liesanda kuenda wa linga ocitumãlo ca lepa volokololo viosi.
25 Ove wa tunga ovitumãlo viove via lepa pocitumãlo cimue ca kemãla volokololo viosi kuenda eposo liove wa li pongolola ocina cimue ca vĩha poku li eca* ku vosi va kala oku pita+ kuenje wa luisa ovilinga viove viupuepue.+
26 Ove wa linga upuepue lomãla va Egito okuti,+ vana va lisungue love* vakuakahonga kuenje wa wengula onyeño yange lovilinga viove vialua viupuepue.
27 Omo liaco, ndi kolõla eka liange kuenda ndu ku yambula+ kuenje ndi ka tepulula okulia kuove loku ku eca kolonjongole viakãi vana va ku suvuka+ okuti, omãla vakãi va va Filisiti vana va sumua omo liovilinga viove via vĩha.+
28 “‘Omo okuti kua tẽlele, ove wa lingavo upuepue lomãla vo ko Asuria,+ pole, noke yoku linga upuepue lavo, lopo kua tẽlele.
29 Omo liaco, ove wa vokiya upuepue wove toke kofeka ya vakualomĩlu* kuenda toke ku va Kaldea,+ pole, ndaño ndoco kua tẽlele.
30 Utima wove wa vela* calua,’* oco Ñala Tõlo Yehova a popia, ‘eci wa linga ovina evi viosi poku tuwa ndocipuepue ka ci kuete osõi!+
31 Pole, eci wa tunga ocitumãlo cove cefendelo liolosuku viesanda volokololo viosi, povitumãlo vina vi molẽha ciwa kuenda volokololo viosi, ove kua kaile ndocipuepue, momo ove wa likala oku tambula ofeto.
32 Ove wukãi umue ukuakahokolo, una o tambula omanu vañi okuti, ulume waye sio!+
33 Omanu va siata oku eca ombanjaile yimue+ kovipuepue viosi, pole, ove, ove weca olombanjaile ku vosi vana va ku yongola+ kuenda ove weca ovitukiko kokuavo okuti, va tunda kolonepa viosi oco veye kokuove oku linga upuepue.+
34 Ove wa litepa lakãi vakuavo vana va siata oku linga upuepue. Lomue o linga upuepue ndeci ove o lingainga! Ove o feta vakuene, pole, ovo ka va ku feti. Onjila ndomo o ci linga ya litepa calua.’
35 “Omo liaco, Acipuepue,+ yevelela ondaka ya Yehova.
36 Ca popia Ñala Tõlo Yehova ceci hati: ‘Omo okuti, ove wa piãlisa ocisola cove kuenda epõlõla liove lia situluiwa voluayela vokuenda kupuepue wove kumue la vakuacisola cove lovina viove viosi via vĩha okuti, oviteka via vĩha*+ vina ove wa lumbila osonde yomãla vove valume,+
37 omo liaco, ndi ongolola vosi vakuacisola cove, vana ove wa sanjuisa, vosi vana wa lekisa ocisola kumue la vana ove wa suvukile. Ndi ka vongoluila pamosi oco va ku katukile kolonepa viosi kuenda ndi ka situlula epõlõla liove kokuavo kuenje ovo va ka li tala liosi.+
38 “‘Ndi ka ku yambula lasombiso a sesamẽla akãi vakuakahokolo+ kuenda vana va pesela osonde+ kuenje osonde yove yi ka pesiwa lonyeño kuenda lesepa.+
39 Ndi ka ku eca peka liavo kuenda ovo va ka nyõla ovitumãlo viove viefendelo liesanda+ kuenda ovo va ka nyõla ovitumãlo viove via lepa;+ kuenje ovo va ka ku lulisa uwalo wove, va ka tambula ovina viove vioku li posuisa+ kuenje va ka ku sia epõlõla.
40 Ovo va ka ku nenela owiñi+ u ka ku ñualelapo+ kuenje va ka ku sasõla lovawe kuenda va ka ku ponda lolosipata viavo.+
41 Ovo va ka timĩha olonjo viove londalu+ kuenda va ka ku nenela esombiso kovaso yakãi valua; kuenje ndi ka malako upuepue+ wove kuenda ove o ka liwekapo oku eca kokuavo ofeto.
42 Ndi ka wenguila onyeño yange kokuove+ kuenda oku tema kuange ku tunda kokuove;+ kuenje ndi ka tulumũha kuenda si ka tema vali.’
43 “‘Omo okuti kua ivalukile oloneke viove viutila+ kuenda wa wengula onyeño yange omo liovina viosi wa linga, ndi ka nena ovitangi omo liovilinga viove okuti, vi kupukila kutue wove muẽle,’ oco Ñala Tõlo Yehova a popia, ‘kuenje ove ku kamamako vali lovilinga viove via vĩha kuenda lovilinga viove viosi viumbondo.
44 “‘Tala! Vosi vana va ta olosapo, va ka tiamisila olusapo luaco kokuove: “Ndeci ina a tuwa, haico omõla ukãi a tuwa!”+
45 Ove wumõla wukãi wa ina yove, una wa enda oku tomba ulume waye kuenda omãla vaye. Ove wu manji wukãi wa vamanjove akãi, vana va tomba alume vavo kuenda omãla vavo. Ina yove wa kala u Hiti kuenda isiove wa kala u Amori.’”+
46 “‘Manjove ukãi ukulu Samaria,+ una o kasi konele yove* yonano lomãla vaye vakãi*+ kuenda manjove ukãi umalẽhe una o kasi konele yove* yombuelo, Sodoma+ lomãla vaye vakãi.+
47 Ove kua endelele lika volonjila viavo loku setukulavo ovituwa viavo viumbondo, pole, vokatembo kamue wa yapuisiwa vali calua lovituwa viove okuti, ovo ci sule.+
48 Ndeci ndi kasi lomuenyo,’ oco Ñala Tõlo Yehova a popia hati: ‘Manjove ukãi okuti Sodoma lomãla vaye vakãi, ka va la linga eci ove lomãla vove wa lingi.
49 Tala! Eli olio lia kala eko lia Sodoma manjove ukãi: Eye kumue lomãla vaye+ va kala vakuepela,+ va kuata okulia kualua+ kuenda va kolelepo;+ pole, ka va kuatisile vana va tala ohali kuenda olohukũi.+
50 Ovo vamamako oku lipanda+ kuenda oku linga ovina viumbondo kovaso ange,+ omo liaco, nda nõlapo oku va nyõla.+
51 “‘Samaria+ ka lingilevo ekandu ndaño muẽle onepa yimue yakandu wa linga. Ove wa linga vali ovina vialua viumbondo okuti ovo ci sule kuenje va molẽha ndu okuti vakuesunga omo liovilinga viove viosi viumbondo.+
52 Kaliye pandikisa lesepu liove momo ove wa kuatisa kovilinga* via vamanjove akãi. Omo liekandu liove lioku piãlisapo vali ovina viumbondo okuti ovo ci sule, ovo va tendiwa okuti vakuesunga, ove ci sule. Kaliye, kuata osõi kuenda kapako esepu omo lioku lingisa okuti vamanjove akãi va kala nda vakuesunga.’
53 “‘Ndi kongolola olomandekua viavo, olomandekua vio ko Sodoma kuenda viomãla vaye vakãi, olomandekua vio Samaria lomãla vayo vakãi; ndi kongololavo olomandekua viove kumue lavo,+
54 oco o kũlĩhe esepu liove; kuenda ove o ka liyeva okuti, wa sepuiwa omo lieci wa linga, poku va lembeleka.
55 Vamanjove muẽle vakãi okuti, Sodoma lomãla vaye vakãi, va ka kala vali ndeci va kala ale kuenda Samaria lomãla vaye vakãi, va ka kala vali ndeci va kala ale kuenje ove lomãla vove vakãi vu ka kala vali ndeci wa kali ale.+
56 Sodoma manjove ukãi, ka sesamẽlele oku tukuiwa love kotembo ove wa kala ukuepela,
57 osimbu handi evĩho liove ka lia situluiwile.+ Cilo omãla vakãi va Suria la vana va lisungue laye, va kasi oku ku sepula kuenda omãla vakãi va va Filisiti,+ la vosi vana va ku ñuala, va ku tata lesepu.
58 Ove o ka tala ohali omo liovilinga viove via vĩha kuenda liovilinga viove viumbondo,’ oco Yehova a popia.”
59 “Ca popia Ñala Tõlo Yehova ceci hati: ‘Cilo ndi ka linga muẽle love ndeci ove wa linga,+ momo ove wa sepula ovisila viove poku lueya ocisila cange.+
60 Pole, ame ndi ka ivaluka ocisila nda linga love koloneke viove viutila kuenda ndi ka tumbika ocisila cimue love cotembo ka yi pui.+
61 Ove o ka ivaluka ovituwa viove kuenda o ka liyeva okuti, wa sepuiwa,+ poku yolela vamanjove akãi, ci kaile akulu kuenda amalẽhe okuti ove o sule kuenda ndi ka va eca kokuove ndomãla, pole, si ka ci lingila omo liocisila nda linga love.’
62 “‘Ame ndi ka tumbika love ocisila cange; kuenje o ka kũlĩha okuti, ame ndi Yehova.
63 Kuenje o ka ivaluka kuenda o ka kuata osõi poku yikula omẽla wove omo liesepu liove,+ eci ndi ka ku ecela,* omo liovina viosi wa linga,’+ oco Ñala Tõlo Yehova a popia.”
Atosi Pombuelo
^ Ale “esaya.”
^ Ale “ocipa conjundu.”
^ Ale “komangu yusoma.”
^ Lit., “onduko.”
^ Okuti, oviteka vialume.
^ Ale “lipepa.”
^ Lit., “oku pitisa vondalu.”
^ Lit., “oku yikula ovolu.”
^ Lit., “vana va lisungue love vakuasitu yinene.”
^ Lit., “ofeka yo Kanana.”
^ Ale “oku hongua.”
^ Ale pamue, “Ndu ku kuetele onyeño yalua.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Citava okuti ci tiamisiwila kovaimbo a sungueko.
^ Lit., “kondio yove.”
^ Lit., “kepĩli liove.”
^ Ale “oku lekisa ohenda.”
^ Lit., “ocilumba coku tuvika akandu.”
